ଚିକିଟି,୧୧ା୫ (ଡି.ଏନ୍.ଏ.):ଗଞ୍ଜାମ ଜିଲାର ୧୨ଟି ୱାର୍ଡକୁ ନେଇ ଗଠିତ ଚିକିଟି ବିଜ୍ଞାପିତ ଅଞ୍ଚଳ ଅଧୀନ ୬, ୭, ୮ ଓ ୯ ନମ୍ବର ୱାର୍ଡରେ ଜନସ୍ବାସ୍ଥ୍ୟ ବିଭାଗ ଅଧୀନରେ ଥିବା ପାଇପ୍ରୁ ଗୋଳିଆ ପାଣି ବାହାରୁଥିବା ଅଭିଯୋଗ ହେଉଛି। ଚିକିଟି ଏନ୍ଏସିର ଉପରୋକ୍ତ ୪ ୱାର୍ଡରେ ପ୍ରାୟ ୧୫ଟି ସାହି ରହିଛି। ଏଠାରେ ଲୋକସଂଖ୍ୟା ୫ ହଜାରରୁ ଊର୍ଦ୍ଧ୍ୱ। ସେଥିମଧ୍ୟରୁ ୩୦% ହେଉଛନ୍ତି ତଫସିଲଭୁକ୍ତ ଉପଜାତିର। ଏହି ସାହିଗୁଡିକ ମଧ୍ୟରେ ରହିଛି ଶାନ୍ତିନଗର ସାହି, ବକ୍ସିସାହି, ଚଉରାସାହି, ବଡ଼ସାହି, ବୈଷ୍ଣବସାହି, ନୂଆସାହି, ମେଦିରିସାହି, ନାଇକସାହି, ଓଡ଼ିଆସାହି, ସିନେମାହଲ୍ ସାହି, ସାନଦେବସାହି ଏବଂ ଚିକିଟିପେଣ୍ଠ ମୁଖ୍ୟ ବଜାର। ଉକ୍ତ ୪ ୱାର୍ଡରେ ପାନୀୟଜଳ ମୁଖ୍ୟ ସମସ୍ୟା। କୂଅ, ନଳକୂପରୁ ପାଣିନେବା ପାଇଁ ମହିଳାମାନଙ୍କୁ ଧାଡ଼ିବାନ୍ଧି ଠିଆହେବାକୁ ପଡୁଛି। ଏହି ୧୫ ସାହିରେ ୨୫ରୁ ଊର୍ଦ୍ଧ୍ୱ ନଳକୂପ ଓ ୪୦ରୁ ଊର୍ଦ୍ଧ୍ୱ ପିଏଚ୍ଡି ଷ୍ଟାଣ୍ଡପୋଷ୍ଟ ରହିଛି। ତେବେ ଏଗୁଡ଼ିକ ମଧ୍ୟରୁ କେତେକ ନଳକୂପରୁ ବିଳମ୍ବରେ ପାଣି ବାହାରୁଥିବା ବେଳେ ଆଉ କେତୋଟି ଷ୍ଟାଣ୍ଡପୋଷ୍ଟ ଅଚଳ ହୋଇପଡ଼ିଛି। ପିଏଚ୍ଡି ପକ୍ଷରୁ ଜେନାପୁର ଓ ଧାନଘରଠାରେ ଓଭରହେଡ୍ ଟାଙ୍କିରୁ ଦିନକୁମାତ୍ର ଏକ ଘଣ୍ଟା ପାଣି ଛଡ଼ାଯାଉଛି। ଏତିକି ପାଣି ସମୁଦ୍ରକୁ ଶଙ୍ଖେ ସଦୃଶ। ତେଣୁ ନିକଟରେ ଥିବା ପୋଖରୀ ପାଣିକୁ ସେମାନେ ପାନୀୟଜଳ ରୂପେ ବ୍ୟବହାର କରୁଛନ୍ତି। ଦୀର୍ଘଦିନ ହେଲା ଉକ୍ତ ଅଞ୍ଚଳରେ ପାଇପ୍ରୁ ଗୋଳିଆ ପାଣି ବାହାରୁଥିବା ନେଇ ବିଭାଗୀୟଙ୍କ ନିକଟରେ ଏହି ସମସ୍ୟାର ସମାଧାନ ପାଇଁ ଅଭିଯୋଗ କରାଯାଇଥିଲେ ସୁଦ୍ଧା କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହାନ୍ତି ବୋଲି ସାହିବାସିନ୍ଦା ଅଭିଯୋଗ କରିଛନ୍ତି। ଏ ନେଇ ସମ୍ପୃକ୍ତ ଅଞ୍ଚଳରେ ଜଣ୍ଡିସ୍, ଚର୍ମ ଓ ପେଟ ରୋଗରେ ଆକ୍ରାନ୍ତ ହେବା ଆଶଙ୍କା କରାଯାଉଛି। ଅପରପକ୍ଷରେ ଏନ୍ଏସି ପକ୍ଷରୁ ଟାଉନପ୍ଲାନିଂ ବ୍ୟବସ୍ଥା କାର୍ଯ୍ୟକାରୀ ହୋଇନଥିବା ବେଳେ ରାସ୍ତା ଉପରକୁ ମାଡିଆସି ଲୋକମାନେ ଘର କରୁଥିବାରୁ ରାସ୍ତା ସଂକୀର୍ଣ୍ଣ ହୋଇଯାଇଛି। ନର୍ଦ୍ଦମାପାଣି ନିଷ୍କାସନ ପାଇଁ କେତେକ ସାହିରେ ଡ୍ରେନ୍ ବ୍ୟବସ୍ଥା ହୋଇଥିଲେ ସୁଦ୍ଧା କିଛି ସ୍ଥାନରେ ଭାଙ୍ଗିରୁଜି ଯାଇଛି। ଫଳରେ ନର୍ଦ୍ଦମା ପାଣି ରାସ୍ତା ଉପରେ ବୋହୁଛି। ସାମାନ୍ୟ ବର୍ଷା ହେଲେ ଏହି ନର୍ଦ୍ଦମାପାଣି ଘର ଭିତରେ ମଧ୍ୟ ପଶିଯାଉଛି। ଅପରପକ୍ଷରେ ଡ୍ରେନ୍ପାଣି ଜମି ରହି ପରିବେଶ ପ୍ରଦୂଷିତ ହେବା ସହିତ ମଶାବଂଶ ବୃଦ୍ଧି ପାଉଛି। ଉକ୍ତ ସମସ୍ୟାଗୁଡ଼ିକର ସମସ୍ୟା ସମାଧାନ କରିବା ପାଇଁ ସାହିବାସିନ୍ଧା ପକ୍ଷରୁ ସାଧାରଣରେ ଦାବି ହେଉଛି। ଏ ନେଇ ଚିକିଟି ଜନସ୍ବାସ୍ଥ୍ୟ ବିଭାଗ କନିଷ୍ଠଯନ୍ତ୍ରୀ ବି ଦୁଃଖୀଶ୍ୟାମ ପାତ୍ରଙ୍କ ସହ ଯୋଗାଯୋଗ କରିବାରୁ ଅଭିଯୋଗ ଆସିଛି। ବୁଧବାର ପଦ୍ମନଗରରେ ଥିବା ଗୋଟିଏ ଟାଙ୍କି ସଫା ଚାଲିଛି। ଗୁରୁବାର ଏହି ସମସ୍ୟାର ସମାଧାନ ହୋଇଯିବ ବୋଲି ସେ କହିଛନ୍ତି।
