ନୂଆଦିଲ୍ଲୀ,୧୪।୨: ସମସ୍ତ କ୍ରିକେଟ ପ୍ରେମୀ ବର୍ତ୍ତମାନ ଚାମ୍ପିଅନ୍ସ ଟ୍ରଫିକୁ ଅପେକ୍ଷା କରିଛନ୍ତି। ଏହା ପରେ ବିଶ୍ୱର ସବୁଠାରୁ ଲୋକପ୍ରିୟ କ୍ରିକେଟ ଲିଗ୍ ’ଇଣ୍ଡିଆନ ପ୍ରିମିୟର ଲିଗ(IPL)’ ଆରମ୍ଭ ହେବ। ମାର୍ଚ୍ଚରୁ ଆଇପିଏଲ୍ର ପରବର୍ତ୍ତୀ ସିଜିନ ଆରମ୍ଭ ହେବାକୁ ଯାଉଛି। ହେଲେ ତାହା ପୂର୍ବରୁ ଲିଗ୍ର ପ୍ରଶଂସକମାନଙ୍କୁ ଏକ ବଡ଼ ଝଟକା ଲାଗିଛି। ଏପର୍ଯ୍ୟନ୍ତ ପ୍ରଶଂସକମାନେ ଜିଓ ସିନେମାରେ ଆଇପିଏଲ୍ ମ୍ୟାଚ ଲାଇଭ୍କୁ ଉପଭୋଗ କରୁଥିଲେ। କିନ୍ତୁ ଏହି ସିଜନରୁ ସେଭଳି ଘଟିବ ନାହିଁ। ପ୍ରକୃତରେ Jio Cinema ଏବଂ Disney+ Hotstar କୁ ମିଶ୍ରଣ କରାଯାଇଛି। ଏବେ ଏହା JioHotstar ଭାବେ ଲଞ୍ଚ ହୋଇଛି। ଏଥିରେ IPL ମ୍ୟାଚ୍ର ଲାଇଭ ଷ୍ଟ୍ରିମିଂ କରାଯିବ ସତ ହେଲେ ତାହା ଦେଖିବା ପାଇଁ ବ୍ୟବହାରକାରୀଙ୍କୁ ଟଙ୍କା ଦେବାକୁ ପଡିବ।
ନିକଟରେ ଡିଜନି+ ହଟଷ୍ଟାର ଏବଂ ଜିଓ ସିନେମାର ମିଶ୍ରଣ ହୋଇଥିଲା। ଶୁକ୍ରବାର ଦିନ ଉଭୟଙ୍କ ନାମକୁ ମିଶାଇ JioHotstar ଆପ୍ ଲଞ୍ଚ କରାଯାଇଥିଲା। ଏହା ଅମ୍ବାନୀ ଗ୍ରୁପର ମାଲିକାନାରେ ଚାଲିବ। ଏଥିରେ ପ୍ରଶଂସକମାନେ IPLର ପ୍ରଥମ କିଛି ମିନିଟ ଲାଇଭ ଦେଖିପାରିବେ। ମାତ୍ର ସମ୍ପୂର୍ଣ୍ଣ ମ୍ୟାଚ ଦେଖିବା ପାଇଁ ସେମାନଙ୍କୁ ଏକ ସବସ୍କ୍ରିପସନ୍ ପ୍ଲାନ କିଣିବାକୁ ପଡିବ। ଆରମ୍ଭିକ ସବସ୍କ୍ରିପସନ ପ୍ଲାନର ମୂଲ୍ୟ ୧୪୯ ଟଙ୍କା। ୨୯୯ ଟଙ୍କିଆ ଗୋଟିଏ ଯୋଜନା ରହିଛି ଯେଉଁଥିରେ ଉପଭୋକ୍ତାମାନେ ଅଧିକ ସୁବିଧା ଏବଂ ଲାଭ ପାଇବେ। ସେହିଭଳି ୪୯୯ ଟଙ୍କାର ପ୍ଲାନରେ ଉପଭୋକ୍ତାମାନେ ବିନା ବିଜ୍ଞାପନରେ ମ୍ୟାଚ୍ ଦେଖିପାରିବେ। ଏହି ତିନୋଟିଯାକ ଯୋଜନା ତିନି ମାସ ପାଇଁ ବୈଧ ରହିବ।
IPL ୨୦୦୮ ମସିହାରେ ଆରମ୍ଭ ହୋଇଥିଲା। ଏପର୍ଯ୍ୟନ୍ତ ୧୭ଟି ସିଜିନ ଖେଳାଯାଇଛି। ଚେନ୍ନାଇ ସୁପର କିଙ୍ଗ୍ସ ଏବଂ ମୁମ୍ବାଇ ଇଣ୍ଡିଆନ୍ସ ପାଞ୍ଚ ପାଞ୍ଚ ଥର ଏହି ଟାଇଟଲ ଜିତିଛନ୍ତି। IPLର ପରବର୍ତ୍ତୀ ସିଜିନ ୨୧ ମାର୍ଚ୍ଚରୁ ଆରମ୍ଭ ହେବ। ପ୍ରଥମ ମ୍ୟାଚ୍ କୋଲକାତାର ଇଡେନ ଗାର୍ଡେନରେ ଡିଫେଣ୍ଡିଂ ଚାମ୍ପିଅନ କୋଲକାତା ନାଇଟ ରାଇଡର୍ସ (KKR) ଏବଂ ସନରାଇଜର୍ସ ହାଇଦ୍ରାବାଦ (SRH) ମଧ୍ୟରେ ଖେଳାଯାଇପାରେ।
ବିସିସିଆଇ ଇଣ୍ଡିଆନ ପ୍ରିମିୟର ଲିଗର ପରବର୍ତ୍ତୀ ସିଜିନର କାର୍ଯ୍ୟସୂଚୀ ଘୋଷଣା କରିନାହିଁ। ତଥାପି ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଳା ସମ୍ପ୍ରତି ଏହାର ଆରମ୍ଭ ତାରିଖ ବିଷୟରେ ସୂଚନା ଦେଇଥିଲେ। ସେହି ସମୟରେ ଫାଇନାଲ ସମେତ ପ୍ଲେ-ଅଫ ସମ୍ପର୍କରେ ମଧ୍ୟ ଗୁରୁତ୍ୱପୂର୍ଣ୍ଣ ସୂଚନା ପ୍ରକାଶ ପାଇଥିଲା। ଫାଇନାଲ ମ୍ୟାଚ ୨୫ ମଇରେ ଇଡେନ ଗାର୍ଡେନରେ ଖେଳାଯିବ। ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ଦୁଇଟି ପ୍ଲେଅଫ୍ ମ୍ୟାଚ ଅନୁଷ୍ଠିତ ହେବାର ଆଶା କରାଯାଉଛି।
