ଭୁବନେଶ୍ୱର,୨୯ା୧(ସୌମ୍ୟରଞ୍ଜନ ରାଉତ): ଚାଲିଛି ଖଣ୍ଡଗିରି କୁମ୍ଭମେଳା। ଦିନ ଯେତେ ଗଡୁଛି, ଜନଗହଳି ମଧ୍ୟ ସେତିକି ବଢ଼ିବାରେ ଲାଗିଛି। ସାଧୁସନ୍ଥଙ୍କ ଦର୍ଶନ ଲାଗି ଖଣ୍ଡଗିରି ପାହାଡ଼ ଉପରେ ସକାଳୁ ରାତି ପର୍ଯ୍ୟନ୍ତ ଶ୍ରଦ୍ଧାଳୁଙ୍କର ଭିଡ଼ ଲାଗୁଛି। ପ୍ରାତଃରୁ ହୋମଯଜ୍ଞ ଚାଲୁଥିବା ବେଳେ ସାରୁ ରାତ୍ରି ପର୍ଯ୍ୟନ୍ତ ବେଦମନ୍ତ୍ର, ଜଣାଣ, ଭଜନ କୀର୍ତ୍ତନରେ ଖଣ୍ଡଗିରି ପରିବେଶ ପ୍ରକମ୍ପିତ ହେଉଛି। ଘଣ୍ଟ, ଘଣ୍ଟା, ମୃଦଙ୍ଗ ଓ ଶଙ୍ଖ ନାଦରେ ପରିବେଶକୁ ଆଧ୍ୟାତ୍ମିକତାରେ ଭରି ଦେଉଛି। ଏପଟେ ପାହାଡ଼ ପାଦଦେଶରେ ଚାଲିଥିବା ମେଳା ବି ସଭିଁଙ୍କୁ ଆକର୍ଷିତ କରୁଛି। ମେଳା ବୁଲା ସାଙ୍ଗକୁ ରାତିରେ ଯାତ୍ରା ଦେଖିବାକୁ ମଧ୍ୟ ଲୋକେ ଖଣ୍ଡଗିରି ମୁହଁା ହେଉଛନ୍ତି। ତେବେ ଏହାରି ଭିତରେ ମେଳାରେ ଆଧ୍ୟାତ୍ମିକତାର ବର୍ତ୍ତା ଦେଉଥିବା ସାଧୁସନ୍ଥ, ସନ୍ନ୍ୟାସୀ ଓ ସନ୍ନ୍ୟାସିନୀଙ୍କ କାହାଣୀ ମଧ୍ୟ ନିଆରା ଅନୁଭୂତି ଦେଉଛି।
ଶିକ୍ଷକତାରୁ ସନ୍ୟାସ, ସତ୍ୟ ପଥର ମାର୍ଗ ଦର୍ଶକ
ଏକ ଘରୋଇ ସ୍କୁଲରେ ଶିକ୍ଷକତା କରୁଥିଲେ। ପରିବାରର ସମସ୍ୟା, ମନୋମାଳିନ୍ୟ, ବିଶୃଙ୍ଖଳା ତାଙ୍କୁ ବହୁତ କଷ୍ଟ ଦେବାରୁ ସେ ଆଧ୍ୟାତ୍ମିକ ମାର୍ଗକୁ ଆପଣେଇଛନ୍ତି। ସେ ୨୫ ବର୍ଷ ଧରି ସନ୍ୟାସ ଜୀବନ ବିତାଉଛନ୍ତି। ସେ ହେଉଛନ୍ତି ପୁରୀରୁ ଆସିଥିବା ସ୍ବାମୀ ଲକ୍ଷ୍ମୀଧର ପରମହଂସ। ସେ ଖଣ୍ଡଗିରି ମେଳାକୁ ଆରମ୍ଭରୁ ଆସୁଛନ୍ତି। ମେଳାରେ ଭଗବତ୍ ଦର୍ଶନ ପାଇଁ ଶ୍ରଦ୍ଧାଳୁଙ୍କୁ ସତ୍ୟ ପଥରେ ଯିବାକୁ ମାର୍ଗ ଦେଖାଉଛନ୍ତି।
୧୭ ବର୍ଷ ବୟସରୁ ମାତା
ମୁଣ୍ଡର ଜଟ ବଦଳାଇ ଦେଲା ଜୀବନ। ମାତ୍ର ୧୭ ବର୍ଷ ବୟସରୁ ମାତା ପାଲଟିଗଲେ ପଦ୍ମା। ନୟାଗଡ଼ ଜିଲା ଦଶପଲ୍ଲାର ମୂଳନିବାସୀ ପଦ୍ମା ବାପା-ମା’ଙ୍କର ୩ ପୁଅରେ ଗୋଟିଏ ଝିଅ ଥିଲେ। କେଶରେ ବାରମ୍ବାର ଜଟ ହେଲା। ତାଙ୍କ ପ୍ରତି ଈଶ୍ୱରଙ୍କର କିଛି ଭିନ୍ନ ଇଚ୍ଛା ଅଛି ବୋଲି ଭାବି ସେ ଆଧ୍ୟାତ୍ମିକ ମାର୍ଗକୁ ବାଛିଲେ। ପୁରୀ ଯାଇ ମହାଦେବଙ୍କ ଦୀକ୍ଷା ନେଲେ। ଆଉ ପାଲଟିଗଲେ ଆଧ୍ୟାତ୍ମିକ ମାତା। ଏବେ ସେ ପୁରୀର ଏକ ମଠରେ ରହୁଛନ୍ତି। ୩ ବର୍ଷ ହେଲା ଖଣ୍ଡଗିରି ମାଘ ମେଳାକୁ ଆସୁଛନ୍ତି। ତାଙ୍କ ପାଖରୁ ଆଶୀର୍ବାଦ ନେବାକୁ ପିଲାଠୁ ବୟସ୍କ ସମସ୍ତଙ୍କ ଭିଡ଼ ଜମୁଛି।
ମଶାରୀ ଭିତରେ ବାବା
ମଶାରୀ ଭିତରେ ସାଧନା କରୁଛନ୍ତି ବାବା। ପ୍ରାୟ ୪୦ବର୍ଷ ଧରି ସେ ଏପରି ତପ କରୁଛନ୍ତି। ଏଭଳି ଜଣେ ଆଧ୍ୟାତ୍ମବାଦୀ ହେଲେ ଉତ୍ତରପ୍ରଦେଶରୁ ଆସିଥିବା ବାବା ବଳରାମ ଦାଶ। ତାଙ୍କର କହିବା ମୁତାବକ, ସେ ଜଣେ ସ୍ବତନ୍ତ୍ର ମଣିଷ। ସଂସାର, ଦୁନିଆରୁ ପୂରା ଅଲଗା ରହୁଛନ୍ତି। ମଣିଷଠାରୁ ଦୂରେଇ ରହିବାକୁ ମଶାରୀ ଭିତରେ ରହୁଛନ୍ତି।
ପ୍ରେମରେ ବିଫଳ, ଚାକିରି ଛାଡ଼ି ସନ୍ନ୍ୟାସ
ପ୍ରେମରେ ବିଫଳତା ଜଣେ ଯୁବକଙ୍କ ଜୀବନକୁ ସମ୍ପୂର୍ଣ୍ଣ ଭାବେ ପରିବର୍ତ୍ତନ କରିଦେଇଛି। ପିଲାବେଳୁ ଈଶ୍ୱର ଓ ଆଧ୍ୟାତ୍ମିକ ମାର୍ଗରେ ଥିଲେ। ଭଲ ପାଠ ବି ପଢ଼ୁଥିଲେ। ରେଲ୍ଓ୍ବେ ଚାକିରି ବି କରିଥିଲେ। ହେଲେ ସମୟକ୍ରମେ ଜଣେ ଯୁବତୀଙ୍କ ଗଭୀର ପ୍ରେମରେ ପଡିଯାଇଥିଲେ। କିନ୍ତୁ ପ୍ରେମରେ ବିଫଳ ହେବା ପରେ ସେ ଚାକିରି ଛାଡି ଆଧ୍ୟାତ୍ମିକ ମାର୍ଗକୁ ବାଛିଲେ, ଆଉ ହୋଇଗଲେ ସନ୍ୟାସ। ସେ ହେଉଛନ୍ତି ବାବା ପଞ୍ଚାୟତି ନିରଞ୍ଜନ ଆଖଡ଼ା। ଦୀର୍ଘ ୪୦ ବର୍ଷ ଧରି ସନ୍ନ୍ୟାସ ଜୀବନରୁ ଶାନ୍ତି ପାଉଥିବାବେଳେ ପ୍ରତିବର୍ଷ ଖଣ୍ଡଗିରି କୁମ୍ଭମେଳାକୁ ଆସୁଥିବା କହିଛନ୍ତି। ଏଥିସହ ସେ ବିଭିନ୍ନ ଅଧ୍ୟାତ୍ମିକ ମେଳା, ମହୋତ୍ସବକୁ ଯାଇଥାନ୍ତି। ମେଳା ନ ଥିବା ସମୟରେ ପୁରୀ ଗୁରୁ ଆଶ୍ରମ ଲଙ୍ଗୁଳି ମଠରେ ରୁହନ୍ତି।
Dharitri – Odisha’s No.1 Odia Daily
