ଭବାନୀପାଟଣା,୨୦।୪( ଉତ୍ତମ କୁମାର ଦାଶ ): ରାଜ୍ୟରେ ନୂଆ ସରକାର ଆସିବାପରେ ‘ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା’, ‘ଗୋପବନ୍ଧୁ ଜନ ଆରୋଗ୍ୟ ଯୋଜନା’ ଏବଂ ‘ଆୟୁଷ୍ମାନ ବୟୋ ବନ୍ଦନା ଯୋଜନା’ ଲାଗୁ ହୋଇଯାଇଛି। ଏହି ପରିପ୍ରେକ୍ଷୀରେ କଳାହାଣ୍ଡି ଜିଲାରେ ମଧ୍ୟ ଏହି ଯୋଜନା ଆରମ୍ଭ ହୋଇଯାଇଛି। ପ୍ରଥମ ପାଳିରେ ଆଶା ଦିଦିମାନେ ଘର ଘର ବୁଲି ହିତାଧିକାରୀଙ୍କୁ ଆୟୁଷ୍ମାନ ଭାରତ ସ୍ବାସ୍ଥ୍ୟ କାର୍ଡ ବଣ୍ଟନ କରୁଛନ୍ତି। ଆୟୁଷ୍ମାନ କାର୍ଡ ସହ ବାୟୋମେଟ୍ରିକ ଯୋଡିବା କିମ୍ବା ଇ-କେୱାଇସି ପାଇଁ ଗ୍ରାମ ସ୍ତରୀୟ ଉଦ୍ୟୋଗୀ – ସାଧାରଣ ସେବା କେନ୍ଦ୍ର ( ସିଏସସି ) ସେଣ୍ଟର ଗୁଡିକୁ ଦାୟିତ୍ୱ ଦିଆଯାଇଛି। ଯାହାକି ରାଜ୍ୟ ଓ କେନ୍ଦ୍ର ସରକାର ଘୋଷଣା ମୁତାବକ ହିତାଧିକାରୀଙ୍କୁ ଏହି ବାବଦକୁ କୌଣସି ଅର୍ଥ ପୈଠ କରିବାକୁ ପଡିବ ନାହିଁ। ହେଲେ କଳାହାଣ୍ଡି ଜିଲା ଭବାନୀପାଟଣା ସହରରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ଭବାନୀପାଟଣାର କିଛି କମନ ସର୍ଭିସ ସେଣ୍ଟର ଗୁଡିକରେ ବାୟୋମେଟ୍ରିକ ବା ଇ-କେୱାଇସି ପାଇଁ ହିତାଧିକାରୀଙ୍କ ଠାରୁ ଅର୍ଥ ଆଦାୟ କରୁଥିବା ଅଭିଯୋଗ ହୋଇଛି। ତେବେ ଏହି ଇ-କେୱାଇସି ବା ଆଧାର ସଂଯୋଗ ପାଇଁ ୧୦୦ଟଙ୍କା ଲେଖାଏଁ ଦାବି କରାଯାଉଥିବା ଅଭିଯୋଗ ହୋଇଛି। ଏନେଇ ଭବାନୀପାଟଣାର ଶତାଧିକ ହିତାଧିକାରୀ କଳାହାଣ୍ଡି ଜିଲାପାଳଙ୍କୁ ଶନିବାର ଏକ ଦାବିପତ୍ର ପ୍ରଦାନ କରିଛନ୍ତି। ପ୍ରଧାନମନ୍ତ୍ରୀ ଆବାସ ଯୋଜନା ମିଳିବ ବୋଲି ଅନଲାଇନ ବାବଦକୁ ୬୦୦ ଟଙ୍କା ଲେଖାଏଁ ନେଇଥିବା ମଧ୍ୟ ଏହି ଦାବିପତ୍ରରେ ଉଲ୍ଲେଖ କରାଯାଇଛି। ତେବେ ଉଭୟ ଯୋଜନାରେ ହିତାଧିକାରୀଙ୍କୁ ଯୋଡିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ସମ୍ପୂର୍ଣ୍ଣ ମାଗଣା ଘୋଷିତ କରିଥିବା ବେଳେ ଲାଭଖୋର ମନୋବୃତ୍ତି ରଖିଥିବା କମନ ସର୍ଭିସ ସେଣ୍ଟର ଗୁଡିକରେ ଗରୀବ ଲୋକଙ୍କୁ ଶୋଷଣ କରୁଥିବା ଅଭିଯୋଗ ହୋଇଛି। ପୂର୍ବରୁ ଜିଲାପାଳଙ୍କ କାର୍ଯ୍ୟାଳୟରୁ ଏକ ଚିଠି ନଂ.୮୨ ତା-୧୫. ୦୪. ୨୦୨୫ ଦିନ ପ୍ରକାଶ ପାଇଛି ଯେଉଁଥିରେ କି ସିଧାସଳଖ କମନ ସର୍ଭିସ ସେଣ୍ଟର ଗୁଡିକୁ ଆୟୁଷ୍ମାନ ଯୋଜନାରେ କୌଣସି ପ୍ରକାରର ଅର୍ଥ ଆଦାୟ ନ କରିବା ଓ ହିତାଧିକାରୀଙ୍କଠୁ ଅନ୍ୟଥା ଟଙ୍କା ନ ନେବା ପାଇଁ ସିଧାସଳଖ ମନା କରାଯାଇଛି। ଯଦି ଏହାର ଅବମାନନା କରାଯାଏ ତାହେଲେ କମନ ସର୍ଭିସ ସେଣ୍ଟର ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଓ ଆକାଉଣ୍ଟ ରଦ୍ଦ କରାଯିବା ନେଇ କଡା ନିର୍ଦ୍ଦେଶ ରହିଛି। ହେଲେ ଏଠି ଜିଲାପାଳଙ୍କ କଡା ନିର୍ଦ୍ଦେଶକୁ ମଧ୍ୟ କମନ ସର୍ଭିସ ସେଣ୍ଟର ଗୁଡିକରେ ଖୁଲମଖୁଲା ଅବମାନନା କରୁଥିବା ଦେଖାଦେଇଛି। ତେବେ ଏହାର ପୁଙ୍ଖାନୁପୁଙ୍ଖ ଭାବେ ତଦନ୍ତ କରିବା ସହ ଏଭଳି କରୁଥିବା କମନ ସର୍ଭିସ ସେଣ୍ଟର ବିରୋଧରେ ଆଇନ ଅନୁସାରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସେମାନେ ଦାବି କରିଛନ୍ତି ।
