ଅମରପାଲି,୧୧ା୬(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ କେନଝିରିଆପାଲି ଗ୍ରାମରେ ଥିବା ଆୟୁଷ୍ମାନ ଆରୋଗ୍ୟ ମନ୍ଦିର ଦୀର୍ଘଦିନ ଧରି କାର୍ଯ୍ୟକ୍ଷମ ଥିଲେ ମଧ୍ୟ ଏପର୍ଯ୍ୟନ୍ତ ବିଦ୍ୟୁତ୍ ସଂଯୋଗ ପାଇନାହିଁ। ଫଳରେ ପ୍ରଚଣ୍ଡ ଖରା ଓ ଅସହ୍ୟ ଗରମ ମଧ୍ୟରେ ରୋଗୀ, ଗର୍ଭବତୀ ମହିଳା, ଶିଶୁ ଓ ସ୍ବାସ୍ଥ୍ୟକର୍ମୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ସୂଚନାନୁଯାୟୀ, ୨୦୧୪ରେ ପ୍ରାୟ ୧୫ ଲକ୍ଷ ଟଙ୍କା ବ୍ୟୟରେ କେନଝିରିଆପାଲିରେ ଏକ ସବ-ସେଣ୍ଟର ଭବନ ନିର୍ମାଣ ହୋଇଥିଲା। ପରେ ଏହାକୁ ଆୟୁଷ୍ମାନ ଆରୋଗ୍ୟ ମନ୍ଦିର ଭାବେ ପରିଣତ କରାଯାଇଥିଲା। ଭବନରେ ବିଦ୍ୟୁତ୍ ଉପକରଣ ସ୍ଥାପନ କରାଯାଇଥିଲେ ମଧ୍ୟ ଏଯାଏ ବିଦ୍ୟୁତ ସଂଯୋଗ ହୋଇ ନ ଥିବାରୁ ସମସ୍ତ ଉପକରଣ ଅଚଳ ହୋଇପଡ଼ିଛି। କେନଝିରିଆପାଲି ପଞ୍ଚାୟତର ଅନେକ ଗ୍ରାମର ଲୋକ ଏହି ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭରଶୀଳ। ବର୍ତ୍ତମାନ ବୀରମହାରାଜପୁର ଅଞ୍ଚଳରେ ତାପମାତ୍ରା ୪୩ରୁ ୪୪ ଡିଗ୍ରୀ ସେଲସିଅସ ମଧ୍ୟରେ ରହୁଥିବାବେଳେ ଆରୋଗ୍ୟ ମନ୍ଦିରରେ ପଙ୍ଖା କିମ୍ବା କୁଲର ଚାଲୁ ନ ଥିବାରୁ ରୋଗୀମାନେ ଅସହ୍ୟ ଗରମରେ ଛଟପଟ ହେଉଛନ୍ତି। ପ୍ରତି ମାସର ପ୍ରଥମ ସୋମବାର ଆୟୁଷ୍ମାନ ଆରୋଗ୍ୟ ଶିବିର, ମଙ୍ଗଳବାର ମମତା ଦିବସ ଏବଂ ବୁଧବାର ଟିକାକରଣ କାର୍ଯ୍ୟକ୍ରମ ହେଉଥିବାରୁ ବିଭିନ୍ନ ଗ୍ରାମରୁ ଗର୍ଭବତୀ ମହିଳା ଓ ଶିଶୁମାନେ ଏଠାକୁ ଆସୁଛନ୍ତି। କିନ୍ତୁ ବିଦ୍ୟୁତ ଅଭାବ ଯୋଗୁ ସେମାନଙ୍କୁ ଗରମ ଓ ଗୁଳୁଗୁଳି ମଧ୍ୟରେ ସମୟ କାଟିବାକୁ ପଡ଼ୁଛି। ଏହାଛଡ଼ା ବିଦ୍ୟୁତ ନ ଥିବାରୁ ଜଳଯୋଗାଣ ବ୍ୟବସ୍ଥା ମଧ୍ୟ ବନ୍ଦ ରହିଛି। ରୋଗୀଙ୍କ ଡ୍ରେସିଂ, ହାତ ଧୋଇବା ଓ ପାନୀୟ ଜଳ ପାଇଁ ବାହାର ନଳକୂପ ଉପରେ ନିର୍ଭର କରିବାକୁ ପଡ଼ୁଛି। ଭିତରେ ଥିବା ଶୌଚାଳୟ ମଧ୍ୟ ଅଚଳ ହୋଇପଡ଼ିଛି। ଫଳରେ ରୋଗୀସେବା ଗୁରୁତର ଭାବେ ପ୍ରଭାବିତ ହେଉଛି।
ଏ ସମ୍ପର୍କରେ ସ୍ବାସ୍ଥ୍ୟ ବିଭାଗୀୟ ଯନ୍ତ୍ରୀ କମଳିନୀ ଷଡ଼ଙ୍ଗୀଙ୍କୁ ପଚାରିବାରୁ, ବିଦ୍ୟୁତ ସଂଯୋଗ ପାଇଁ ଡିଏଫ୍ଡବ୍ଲ୍ୟୁ ବିଭାଗକୁ ଆବଶ୍ୟକ କାଗଜପତ୍ର ପଠାଯାଇଥିବା ଏବଂ ମଞ୍ଜୁରୀ ମିଳିଲେ ସଂଯୋଗ ଦିଆଯିବ ବୋଲି ସେ କହିଛନ୍ତି। ତେବେ ଜନସାଧାରଣଙ୍କ ସ୍ବାସ୍ଥ୍ୟସେବା ସହ ଜଡ଼ିତ ଏହି ଗୁରୁତ୍ୱପୂର୍ଣ୍ଣ କେନ୍ଦ୍ରରେ ଶୀଘ୍ର ବିଦ୍ୟୁତ୍ ସଂଯୋଗ ଯୋଗାଇବାକୁ ସ୍ଥାନୀୟ ଲୋକେ ଜିଲା ପ୍ରଶାସନଙ୍କ ହସ୍ତକ୍ଷେପ ଦାବି କରିଛନ୍ତି।
