ଅଯୋଧ୍ୟା,୨।୨: ଉତ୍ତରପ୍ରଦେଶ ଅଯୋଧ୍ୟାର ରାମ ଜନ୍ମଭୂମିକୁ ବୋମାରେ ଉଡ଼ାଇଦେବାକୁ ମିଳିଛ ଧମକ। ରାମ ଜନ୍ମଭୂମିର ୟୋଲୋ ଜୋନ ଅଞ୍ଚଳ ସ୍ଥିତ ରାମଲାଲା ସଦନରେ ରହୁଥିବା ମନୋଜ କୁମାରଙ୍କ ମୋବାଇଲକୁ ଏହି ଫୋନ୍ କଲ୍ ଆସିଥିଲା। ଏଥିରେ ଜଣେ ଅଜ୍ଞାତ ଯୁବକ ଫୋନ କରି ମନୋଜଙ୍କୁ ଏହି ଧମକ ଦେଇଥିଲେ। ଉକ୍ତ ଧମକ ସକାଳ ସାଢ଼େ ୫ଟାରେ ଆସିଥିଲା। ସକାଳ ୧୦ଟା ସୁଦ୍ଧା ରାମ ଜନ୍ମଭମିକୁ ଉଡ଼ାଇ ଦେବେ ବୋଲି ଧମକ ଦେଇଥିବା ବ୍ୟକ୍ତି କହିଥିଲେ। ଏହାପରେ ମନୋଜଙ୍କ ସୂଚନା ଅନୁଯାୟୀ ଥାନା ପ୍ରଭାରୀ ଏକ ଏଫ୍ଆଇଆର ରୁଜୁ କରି ତଦନ୍ତ ଆରମ୍ଭ କରିଥିଲେ। ଏହି ମାମଲାକୁ ନେଇ ଥାନା ରାମ ଜନ୍ମଭୂମିର ପ୍ରଭାରୀ ସଞ୍ଜୀବ କୁମାର କହିଛନ୍ତି, ଗୁରୁବାର ମନୋଜ କୁମାରଙ୍କୁ ଜଣେ ଅଜ୍ଞାତ ଫୋନ୍ ଆସିଥିଲା। ବର୍ତ୍ତମାନ ମନୋଜ ପ୍ରୟାଗରାଜ ମାଘ ମେଳାରେ ଅଛନ୍ତି। ତାଙ୍କୁ ସକାଳ ୬ଟାରେ ଫୋନରେ ଏହି ଧମକ ମିଳିଥିଲା। କେବଳ ଏତିକି ନୁହେଁ, ଅଜ୍ଞାତ ଯୁବକ ଜଣଙ୍କ ଦିଲ୍ଲୀର ବୋଲି ମନୋଜଙ୍କୁ କହି ସକାଳ ୧୦ଟାରେ ରାମ ଜନ୍ମଭୂମିକୁ ବୋମାରେ ଉଡାଇଦେବେ ବୋଲି କହିଥିଲେ। ଏହି ମାମଲାର ସୂଚନା ମିଳିବା ପରେ ପୋଲିସ ସତର୍କ ହେବା ସହ ଯାଞ୍ଚ ଅଭିଯାନକୁ ଜୋରଦାର କରିଛି। ଏଥିସହ ଯେଉଁ ନମ୍ବରରୁ ଫୋନ୍ କଲ୍ ଆସିଥିଲା ତା’କୁ ମଧ୍ୟ ଯାଞ୍ଚ କରାଯାଉଛି। ଏତଦ୍ ବ୍ୟତୀତ କ୍ୟାମ୍ପସ ପରିସରରେ ନିୟୋଜିତ ସୁରକ୍ଷା କର୍ମୀଙ୍କୁ ସତର୍କ କରାଯାଇଥିବା ସଞ୍ଜୀବ କୁମାର କହିଛନ୍ତି।
