ନୂଆଦିଲ୍ଲୀ, ୨୨।୧: ଅଯୋଧ୍ୟା ରାମମନ୍ଦିର ପ୍ରାଣ ପ୍ରତିଷ୍ଠା ପୂର୍ବରୁ ସହରରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ୧୩ ହଜାର ସୁରକ୍ଷା କର୍ମୀଙ୍କୁ ମୁତୟନ କରାଯାଇଥିବାରୁ ଅଯୋଧ୍ୟା ସହର ଏକ ଦୁର୍ଗରେ ପରିଣତ ହୋଇଛି। ରାଜ୍ୟ ପୋଲିସ ସମେତ ଆର୍ପିଏଫ୍ ଯବାନ, ଅର୍ଦ୍ଧସାମରିକ ଯବାନ, ଏନ୍ଡିଆର୍ଏଫ୍ ଟିମ୍, ବମ୍ ସ୍କ୍ବାଡ୍ ଏବଂ ଡଗ୍ ସ୍କ୍ବାଡ୍ ମଧ୍ୟ ନିୟୋଜିତ ହୋଇଛନ୍ତି।
ଏହା ବ୍ୟତୀତ ନାଇଟ୍ ଭିଜନ ଉପକରଣଠାରୁ ଆରମ୍ଭ କରି କୃତ୍ରିମ ବୁଦ୍ଧିମତ୍ତା (ଏଆଇ) ପରିଚାଳିତ ସିସିଟିଭି କ୍ୟାମେରା ଲଗାଯାଇଛି। ମନ୍ଦିରକୁ ବହୁ ଟନ୍ ଫୁଲ ଏବଂ ରଙ୍ଗିନ ଆଲୋକମାଳାରେ ସଜାଯାଇଛି। ପ୍ରାଣପ୍ରତିଷ୍ଠା ଉତ୍ସବ ପୂର୍ବରୁ ସାଧୁସନ୍ଥ, ନିମନ୍ତ୍ରିତ ଅତିଥି ଏବଂ ସେଲିବ୍ରିଟିମାନେ ଅଯୋଧ୍ୟାରେ ପହଞ୍ଚତ୍ବାରେ ଲାଗିଛନ୍ତି। ପୂର୍ବରୁ ଶୂନ୍ଶାନ ଦେଖାଯାଉଥିବା ଏହି ସହରରେ ଏବେ ପ୍ରବଳ ଗହଳି ହେବା ସହ ଏକ ଆଧ୍ୟାତ୍ମିକ ଭକ୍ତି ପରିବେଶ ସୃଷ୍ଟି ହୋଇଛି। ଡାକବାଜି ଯନ୍ତ୍ରରେ ରାମଧୁନ୍ ବାଜିବା ସହ ବିଭିନ୍ନ ରଙ୍ଗରେ ଫୁଲରେ ସହର ସଜେଇ ହୋଇଛି। ଭକ୍ତମାନେ ରାମ, ଲକ୍ଷ୍ମଣ, ସୀତା ଓ ହନୁମାନ ବେଶରେ ଶୋଭଯାତ୍ରାରେ ଯାଉଛନ୍ତି।
ପ୍ରାଣପ୍ରତିଷ୍ଠା ଉତ୍ସବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଯୋଗଦେବେ। ରାମମନ୍ଦିର ଆନ୍ଦୋଳନରେ ସାମିଲ ଥିବା କେତେଜଣଙ୍କୁ ମଧ୍ୟ ଉତ୍ସବକୁ ନିମନ୍ତ୍ରଣ କରାଯାଇଛି। ଏହା ବ୍ୟତୀତ ବଲିଉଡ୍ ସୁପରଷ୍ଟାର ଅମିତାଭ ବଚ୍ଚନ, ବିଶିଷ୍ଟ ବ୍ୟବସାୟୀ ମୁକେଶ ଅମ୍ବାନୀ, ଗୌତମ ଆଦାନୀ, କ୍ରିକେଟର ସଚିନ ତେନ୍ଦୁଲକର ଏବଂ ଏମ୍.ଏସ୍. ଧୋନୀ ପ୍ରମୁଖଙ୍କୁ ନିମନ୍ତ୍ରଣ କରାଯାଇଛି।
