ପୁଣେ,୨୫।୩(ପି.ଟି.): ଭାରତୀୟ ମିଡ୍ଲ ଅର୍ଡର ବ୍ୟାଟ୍ସମ୍ୟାନ ଶ୍ରେୟାସ ଆୟାର ଚଳିତ ଇଂଲଣ୍ଡ ବିପକ୍ଷ ଦିନିକିଆ ସିରିଜ ଓ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରୁ ବାଦ୍ ପଡିଛନ୍ତି। ମଙ୍ଗଳବାର ପ୍ରଥମ ଦିନିକିଆରେ ଫିଲ୍ଡିଂ କରିବା ଅବସରରେ ସେ ବାମ କାନ୍ଧରେ ଆଘାତ ପାଇଥିଲେ। ଏହି ଇଞ୍ଜୁରି ପାଇଁ ସେ ଅତିକମ୍ରେ ୪ ମାସ କ୍ରିକେଟରୁ ଦୂରେଇ ରହିବେ। ଫଳରେ ଆଇପିଏଲ୍ ଆରମ୍ଭ ହେବା ପୂର୍ବରୁ ଦିଲ୍ଲୀ କ୍ୟାପିଟାଲ୍ସକୁ ଶକ୍ତ ଧକ୍କା ଲାଗିଛି।
ପ୍ରଥମ ମ୍ୟାଚ୍ରେ ଇଂଲଣ୍ଡ ଇନିଂସର ଅଷ୍ଟମ ଓଭରରେ ଶାର୍ଦ୍ଦୁଳ ଠାକୁରଙ୍କ ବଲ୍ରେ ଜନି ବେୟାରଷ୍ଟୋ ଏକ ଶଟ୍ ଖେଳିଥିଲେ। ଆୟାର ଡାଇଭ୍ ମାରି ବଲ୍ ରୋକିବାକୁ ପ୍ରୟାସ କରିଥିଲେ। ଫଳରେ ସେ କାନ୍ଧରେ ଆଘାତ ପାଇଥିଲେ। ପ୍ରବଳ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ପଡିଆ ବାହାରକୁ ନିଆଯାଇଥିଲା। ଦିନିକିଆ ସିରିଜ ସମେତ ସେ ଆଇପିଏଲ୍ରୁ ବାଦ୍ ପଡିଛନ୍ତି ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ କୁହାଯାଇଛି। ଏବେ ସେ ପ୍ରବଳ ଯନ୍ତ୍ରଣା ଅନୁଭବ କରୁଛନ୍ତି। ତେଣୁ ତାଙ୍କ ବାମକାନ୍ଧରେ ଆସ୍ତ୍ରୋପଚାର କରାଯିବା ଜରୁରୀ ହୋଇପଡିଛି। ଫଳରେ ସେ ଅତିକମ୍ରେ ୪ ମାସ ଖେଳରୁ ଦୂରେଇ ରହିବେ ବୋଲି ବୋର୍ଡ ସୂତ୍ରରୁ ପ୍ରକାଶ। ଏଥିପାଇଁ ଆୟାର ମଧ୍ୟ ଲଙ୍କାସାୟାର ତରଫରୁ ଇଂଲିଶ କାଉଣ୍ଟି ଖେଳିପାରିବେ ନାହିଁ। କାଉଣ୍ଟି ଦିନିକିଆ ଟୁର୍ନାମେଣ୍ଟ ଜୁଲାଇ ୨୩ ତାରିଖରୁ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ୨୬ ବର୍ଷୀୟ ଆୟାରଙ୍କ ସହ ଲଙ୍କାସାୟାର ଚୁକ୍ତି କରିଛି ବୋଲି ସୋମବାର ଘୋଷଣା କରିଥିଲା।
ଆୟାର ଆଇପିଏଲ୍ରେ ଦିଲ୍ଲୀ କ୍ୟାପିଟାଲ୍ସର ନେତୃତ୍ୱ ନେଉଛନ୍ତି। ଆସନ୍ତା ଏପ୍ରିଲ ୯ ତାରିଖରୁ ଆଇପିଏଲ୍ ଆରମ୍ଭ ହେବ। ଅବଶ୍ୟ ଆହତ ହେବା ପୂର୍ବରୁ ସେ ପ୍ରଥମ ଦିନିକିଆରେ ବ୍ୟାଟିଂରେ ବିଫଳ ହୋଇଥିଲେ। ମାତ୍ର ୬ ରନକରି ସେ ଆଉଟ ହୋଇଥିଲେ। ଆଇପିଏଲ୍ର ଗତ ସଂସ୍କରଣରେ ତାଙ୍କ ନେତୃତ୍ୱରେ ଦିଲ୍ଲୀ କ୍ୟାପିଟାଲ୍ସ ଫାଇନାଲରେ ପହଞ୍ଚିଥିଲା। ଆୟାରଙ୍କ ଅନୁପସ୍ଥିତିରେ ରିଷଭ ପନ୍ତ, ଅଷ୍ଟ୍ରେଲିଆର ଷ୍ଟିଭ ସ୍ମିଥ୍ କିମ୍ବା ଅଭିଜ୍ଞ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ଦିଲ୍ଲୀ କ୍ୟାପିଟାଲ୍ସର ନେତୃତ୍ୱ ନେଇପାରନ୍ତି।
