ଭୁବନେଶ୍ବର,୧୬ା୧(ବ୍ୟୁରୋ):ପ୍ରଧାନମନ୍ତ୍ରୀ ଆବାସ ଯୋଜନାରେ ଶ୍ରେୟ ନେବାକୁ ବିଜେଡି-ଭାଜପା ମଧ୍ୟରେ ପୁଣି ଟଣାଓଟରା ଆରମ୍ଭ ହୋଇଯାଇଛି। ଏଣିକି ଆବାସ ଯୋଜନାରେ କେନ୍ଦ୍ରର ପିଏମ୍ଏୱାଇ ଲୋଗୋକୁ ସ୍ପଷ୍ଟ ଭାବେ ପ୍ରଦର୍ଶିତ କରାଯିବ। ରାଜ୍ୟ ସରକାରଙ୍କ ତରଫରୁ ଏନେଇ କେନ୍ଦ୍ର ସରକାରଙ୍କୁ ଜଣାଯାଇଛି। ତେବେ ପୂର୍ବପରି ବିଜୁ ପକ୍କାଘର ଲୋଗୋ ରହିବ ନା ନାହିଁ ସେନେଇ ଦ୍ବନ୍ଦ୍ବ ଲାଗି ରହିଥିବାବେଳେ ଏହାକୁ ନେଇ ରାଜନୀତି ଜୋର୍ ଧରିଛି।
ଭାଜପା ରାଜ୍ୟ ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ କହିଛନ୍ତି, ପ୍ରଧାନମନ୍ତ୍ରୀ ଆବାସ ଯୋଜନାରେ ଯେଉଁ ଲୋଗୋ ରହିଛି, ତାହା ଲାଗିବ। ଏଥିସହିତ ଏହି ଘର ପ୍ରଧାନମନ୍ତ୍ରୀ ଆବାସର ବୋଲି ଚିହ୍ନିତ ହେବ। ଏଥିରେ କୌଣସି ଜାଗାରେ ବଦମାସି କରିବାକୁ ଚେଷ୍ଟା କରାଗଲେ ପରିଣାମ ଭୟଙ୍କର ହେବ। ସେଥିପାଇଁ ପ୍ରସ୍ତୁତ ରୁହନ୍ତୁ ବୋଲି ପୃଥ୍ବୀରାଜ କହିଛନ୍ତି। ଅନ୍ୟପକ୍ଷରେ ବିଜେଡି ବିଧାୟକ ଦେବୀ ପ୍ରସାଦ ମିଶ୍ର କହିଛନ୍ତି, ଏହି ଯୋଜନାରେ କେନ୍ଦ୍ର-ରାଜ୍ୟର ଅଂଶ ୬୦:୪୦ ରହିଛି। ପ୍ରଶାସନିକ ଖର୍ଚ୍ଚ ଏବଂ ରାଜ୍ୟ ସରକାରଙ୍କ ପ୍ରୋତ୍ସାହନକୁ ବିଚାର କଲେ ଏହା ୫୦:୫୦ ହେବ। ତେଣୁ ବିଜୁ ପକ୍କାଘର ଲୋଗୋ ଲାଗିଲେ, ଚିହିଙ୍କିବାର କାରଣ କ’ଣ ବୋଲି ସେ ପଚାରିଛନ୍ତି।
