ବ୍ରହ୍ମପୁର,୭।୨(ଅଶୋକ କୁମାର ସାହୁ):ଗଞ୍ଜାମ ଜିଲାର ଶିଳ୍ପାଞ୍ଚଳ ଭିତ୍ତିଭୂମିରେ ସାମିଲ ହୋଇଥିବା ରଙ୍ଗେଇଲୁଣ୍ଡା ବ୍ଲକ ହଳଦିଆପଦରସ୍ଥିତ ଅଟୋନଗର ସ୍ଥିତି ଦୟନୀୟ ହୋଇପଡ଼ିଛି। ଦୀର୍ଘ ୩୩ ବର୍ଷ ହେଲା ଏକ ଦୂଷିତ ପରିବେଶରେ ଥିବା ଏହି ଶିଳ୍ପାଞ୍ଚଳ ନିଜ ଅସ୍ତିତ୍ୱ ଖୋଜିବାରେ ଲାଗିଛି। ବହୁ ଅଭିଯୋଗ ପରେ ଓଡ଼ିଶା ଶିଳ୍ପାଞ୍ଚଳ ଭିତ୍ତିଭୂମି ଉନ୍ନୟନ ନିଗମ (ଇଡକୋ) ଏହାର ବିକାଶ ପାଇଁ ଅଣ୍ଟା ଭିଡ଼ିଛି।
ଜିଲାରେ ଥିବା ୫ଟି ଶିଳ୍ପାଞ୍ଚଳ ମଧ୍ୟରୁ ୯୦ ଦଶକରେ ନିର୍ମାଣ ହୋଇଥିବା ଅଟୋନଗର କେବଳ ଅଟୋମୋବାଇଲ ସେକ୍ଟର ପାଇଁ ପ୍ରଯୁଜ୍ୟ। ୭୪ ଏକର ଜମିରେ ଏହି ଶିଳ୍ପାଞ୍ଚଳ ରହିଛି। ସେଥିରୁ ୨୫ ଏକର ରାସ୍ତା ଓ ଡ୍ରେନେଜ ପାଇଁ ଛଡାଯାଇଥିବାବେଳେ ବାକି ୪୯ ଏକର ଜମିରେ ୪୯୪ ପ୍ଲଟ ରହିଛି। ଅଟୋନଗର ଭିତରକୁ ଦୈନିକ ବହୁ ଭାରିଯାନ ଯାତାୟାତ କରୁଛି। ସେଠାରେ ଏକ ନୂଆ ବସଷ୍ଟାଣ୍ଡ ନିର୍ମାଣ ହୋଇଛି। ତାହା ବି ଅଲୋଡା ହୋଇପଡିଛି। କନିଷି ତହସିଲଦାରଙ୍କ କାର୍ଯ୍ୟାଳୟ ରହିଛି। ସମ୍ମୁଖ ରାସ୍ତାର କିଛି ଅଂଶ ପିଚୁ ହୋଇଥିବାବେଳେ ବାକି ସବୁ ରାସ୍ତାରେ ମାଟି ମୁଠାଏ ବି ପଡିନି। ଡ୍ରେନ, ପାନୀୟଜଳ ଓ ଷ୍ଟ୍ରିଟ ଲାଇଟର ସୁବିଧା ନାହିଁ। ଭଲ ହୋଟେଲ ନାହିଁ। ଶ୍ରମିକମାନେ ଆଶ୍ରୟ ନେବା ପାଇଁ ସୁବିଧା କରାଯାଇନାହିଁ। ରାତି ହେଲେ ଅଟୋନଗର ଅସାମାଜିକ ଲୋକଙ୍କ ଆଡ୍ଡାସ୍ଥଳ ପାଲଟୁଛି। ୩୦ରୁ ୪୦ ପ୍ରତିଶତ ପ୍ଲଟରେ ଲୋକେ କିଛି କରିନାହାନ୍ତି। କେବଳ ପ୍ଲଟ ନେଇ ପକାଇ ରଖିଛନ୍ତି। ଇଡକୋ ପକ୍ଷରୁ ନାମାନୁସାରେ ତଦନ୍ତ କରାଯିବା ପରେ ପ୍ଲଟ ନେଇଥିବା ପ୍ରାୟ ୯୦ ପ୍ରତିଶତ ଲୋକ ସେମାନଙ୍କ ପ୍ଲଟ ଭଡାରେ ଲଗାଇଛନ୍ତି। ସେମାନଙ୍କୁ ନୋଟିସ କରାଯାଇ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ଇଡକୋର ଇଷ୍ଟେଟ କୋର୍ଟରେ ଏ ସମ୍ପର୍କିତ ପ୍ରାୟ ୩୦ ମାମଲା ଥିବା ଇଡକୋ କାର୍ଯ୍ୟାଳୟରୁ ସୂଚନା ମିଳିଛି। ଏ ସଂକ୍ରାନ୍ତରେ ଓଡ଼ିଶା ଆସେମ୍ବ୍ଲି ଅଫ ସ୍ମାଲ ଆଣ୍ଡ ମିଡିୟମ ଏଣ୍ଟରପ୍ରେନର, ଗଞ୍ଜାମ ଚାପ୍ଟେରର ସାଧାରଣ ସମ୍ପାଦକ ଇଂ.ମନୋରଞ୍ଜନ ମହାପାତ୍ରଙ୍କୁ ପଚାରିବାରୁ ସେ କହିଲେ, ଅଟୋନଗର ଜିଲାରେ ଅଟୋମୋବାଇଲ ଶିଳ୍ପର ଏକ ବୃହତ୍ ହବ ପାଲଟିଛି। କିନ୍ତୁ ଏଠାରେ ବହୁ ସମସ୍ୟା ରହିଛି। ଷ୍ଟ୍ରିଟ ଲାଇଟ, ରୋଡ, ଡ୍ରେନେଜ ବ୍ୟବସ୍ଥା ନାହିଁ। ଯେଉଁ ରାସ୍ତା ରହିଛି ପ୍ରାୟ ସ୍ଥାନରେ ୩ରୁ ୪ ଫୁଟ ପର୍ଯ୍ୟନ୍ତ ଖାଲ ହୋଇଯାଇଛି। ଖାଲ ଢିପ ରାସ୍ତା ଭାରିଯାନ ଯାତାୟାତରେ ବିପଦ ସୃଷ୍ଟି କରୁଛି। ସବୁଠୁ ବଡକଥା ହେଲା ଯେଉଁମାନେ ପ୍ଲଟ ନେଇଛନ୍ତି ସେମାନଙ୍କୁ ୩ବର୍ଷ ପାଇଁ ପ୍ରଥମେ ଲିଜ ଏଗ୍ରିମେଣ୍ଟ କରାଯାଉଛି। ୩ ବର୍ଷିଆ ମଡଗେଜ ଦେଲେ ବ୍ୟାଙ୍କ ଋଣ ମିଳୁନି। ଅର୍ଥ ଅଭାବରୁ ଉଦ୍ୟୋଗପତିମାନେ କୌଣସି ଉଦ୍ୟୋଗ ଖୋଲିପାରୁନାହାନ୍ତି। ଗୋଟିଏ ପଟେ ୩ବର୍ଷିଆ ଲିଜ କାଟି ସ୍ଥାୟୀ ଲିଜ ଦେବାକୁ ପଡିବ ନଚେତ ବ୍ୟାଙ୍କ ଋଣ ଦେବାକୁ ପଡିବ। ଏହି ସବୁ ସମସ୍ୟାର ସମାଧାନ କରାଗଲେ ଅଟୋନଗରର ଅସ୍ଥିତ୍ୱ ରହିବ ନଚେତ ଆଗାମୀ ଦିନରେ ଏହାର ଅଅସ୍ତିତ୍ୱ ହଜିଯିବ। ଏ ନେଇ ଇଡକୋକୁ ଅବଗତ କରାଯାଇଛି ବୋଲି ମହାପାତ୍ର କହିଛନ୍ତି। ଇଡ୍କୋର ଡିଭିଜନାଲ ମୁଖ୍ୟ ସ୍ମରଣିକା ପାଣିଗ୍ରାହୀଙ୍କୁ ପଚାରିବାରୁ ସେ କହିଲେ, ଅଟୋନଗରର ବିକାଶ ପାଇଁ ୩୫.୬୫ କୋଟି ଟଙ୍କା କେନ୍ଦ୍ରୀୟ ଅନୁଦାନ ମିଳିବ ବୋଲି ମୁଖ୍ୟ କାର୍ଯ୍ୟାଳୟରୁ ଜଣାପଡିଛି। ୩୨ କୋଟି ଟଙ୍କାରେ ଫେଜ-୧ରେ ନିରବଚ୍ଛିନ୍ନ ପାନୀୟ ଜଳ ଯୋଗାଣ, ସିସି ରୋଡ, ଡ୍ରେନେଜ, ନିରବଚ୍ଛିନ୍ନ ବିଦ୍ୟୁତ ଯୋଗାଣ, ହୋଟେଲ, ଶ୍ରମିକମାନଙ୍କ ରହଣିସ୍ଥଳ ଆଦି ବ୍ୟବସ୍ଥା ରହିବ। ସେହିପରି ଫେଜ-୨ ପାଇଁ ୩.୬୫ କୋଟି ଟଙ୍କାରେ ସିସି ରୋଡ, ଡ୍ରେନ, ବିଦ୍ୟୁତ ସୁବିଧା, ପ୍ରଶାସନିକ କୋଠା, ପ୍ରାଥମିକ ଚିକିତ୍ସା ବ୍ୟବସ୍ଥା କରାଯିବ। ଜଳଯୋଗାଣ ପାଇଁ ଘଟକେଶ୍ୱର ନିକଟ ଜଳଅମଳ ପ୍ରକଳ୍ପରୁ ପାଣି ଯୋଗାଣ ହେବ। ବିଭାଗୀୟ ନିର୍ଦ୍ଦେଶ ଅନୁସାରେ ଟେଣ୍ଡର ହୋଇଛି। କିନ୍ତୁ କାର୍ଯ୍ୟାଦେଶ ଦିଆଯାଇପାରିନାହିଁ। ସେଠାରେ ଖୁବଶୀଘ୍ର କାର୍ଯ୍ୟାରମ୍ଭ ହେବ ବୋଲି ଡିଭିଜନାଲ ମୁଖ୍ୟ କହିଛନ୍ତି।
