ନୂଆଦିଲ୍ଲୀ, ୩ା୮ (ପି.ଟି.)-ଭାରତର ସର୍ବ କନିଷ୍ଠ ବାସ୍କେଟବଲ୍ ଅଧିନାୟକ ବିଶେଷ ଭୃଗୁବଂଶୀଙ୍କ ଆତ୍ମଜୀବନୀ ଉପରେ ଲିଖିତ ପୁସ୍ତକ ଅଗଷ୍ଟ ୨୯ ଜାତୀୟ କ୍ରୀଡ଼ା ଦିବସରେ ବଜାରକୁ ଆସିବ ବୋଲି ପ୍ରକାଶନ ସଂସ୍ଥା ବ୍ୁଲ୍ରୋଜ୍ ପକ୍ଷରୁ ସୂଚନା ଦିଆଯାଇଛି। ପୁସ୍ତକଟିର ଶିରୋନାମା ରଖାଯାଇଛି ” ଭିନେଶ: କୋଡ୍ ଟୁ ଓ୍ବିନ୍’। ଏକ କ୍ରିକେଟ ଲୋକପ୍ରିୟ ଦେଶରେ ଜଣେ ବାସ୍କେଟବଲ୍ ଖେଳାଳିଙ୍କୁ ଅଧିନାୟକ ହେବା ଲାଗି କେତେ ଯେ ବାଧାବିଘ୍ନ ଅତିକ୍ରମ କରିବାକୁ ହୋଇଥାଏ ତାହା ଏଥିରେ ବର୍ଣ୍ଣିତ ହୋଇଛି। ମହିଳା କ୍ରୀଡ଼ାବିତ୍ରୁ ଲେଖିକା ବନିଥିବା ନିରୁପମା ଯାଦବ ପୁସ୍ତକଟିର ରଚନା କରିଛନ୍ତି। ୨୯ବର୍ଷୀୟ ଭୃଗୁବଂଶୀଙ୍କ ଜନ୍ମ ସ୍ଥାନ ହେଉଛି ଉତ୍ତରପ୍ରଦେଶ ଅନ୍ତର୍ଗତ ବାରାଣସୀ ସହରରେ। ଭାରତ ତରଫରୁ ସେ ୨୦୦୭ରୁ ପ୍ରତିନିଧିତ୍ୱ କରି ଆସୁଛନ୍ତି। ୨୦୧୦ରେ ସେ ପ୍ରଥମେ ଭାରତୀୟ ଦଳର ଅଧିନାୟକ ଦାୟିତ୍ୱ ଗ୍ରହଣ କରିଥିଲେ। ସେ ତାଙ୍କ ୧୫ ବର୍ଷରୁ ଊର୍ଦ୍ଧ୍ୱ କ୍ୟାରିୟରରେ ବିଭିନ୍ନ ଚାମ୍ପିୟନଶିପ୍ ଯଥା ଏସିଆନ ଗେମ୍ସ (୨), ଏସିଆନ ଚାମ୍ପିୟନଶିପ୍ (୫), ବିଚ୍ ଏସିଆନ ଗେମ୍ସ (୩), ଇନ୍ଡୋର ଏସିଆନ ଗେମ୍ସ (୨), ସାଉଥ ଏସିଆନ ଗେମ୍ସ (୨) ଓ ସାଉଥ ଏସିଆନ ଚାମ୍ପିୟନଶିପ୍ରେ ଭାଗ ନେଇଛନ୍ତି। ୨୦୧୭ରେ ଭୃଗୁବଂଶୀ ପ୍ରଥମ ଭାରତୀୟ ଭାବେ ଅଷ୍ଟ୍ରେଲିଆର ନ୍ୟାଶନାଲ ବାସ୍କେଟବଲ ଲିଗ୍ (ଏନବିଏଲ୍)ରେ ଖେଳିବା ଲାଗି ଚୁକ୍ତି ବଦ୍ଧ ହୋଇଥିଲେ। ଦେଶରେ କ୍ରିକେଟ ଅଧିକ ଲୋକପ୍ରିୟ ହୋଇଥିବାରୁ ଯୁବ ପିଢି ଏହି ଖେଳ ପ୍ରତି ବିଶେଷ ଆଗ୍ରହ ପ୍ରକାଶ କରୁଛନ୍ତି। ଭାରତରେ ବାସ୍କେଟବଲ ଖେଳ ପ୍ରତି ଆଗ୍ରହ ବୃଦ୍ଧି ପାଉ। ବିଶେଷ ସେମାନଙ୍କ ପାଇଁ ପ୍ରେରଣାର ଉତ୍ସ ପାଲଟନ୍ତୁ ବୋଲି ସେ ଚାହାନ୍ତି ବୋଲି ଲେଖିକା ଜଣକ କହିଛନ୍ତି। ନିରୁପମା କହିଛନ୍ତି କ୍ରିକେଟକୁ ଛାଡ଼ି ଆହୁରି ଅନେକ ଖେଳ ଭାରତରେ ଖେଳାଯାଏ। ଏହି ସବୁ ଖେଳ ଉପରେ ପୁସ୍ତକ ରଚନା କରି ଭାରତୀୟ ଯୁବ ପୀଢିଙ୍କ ମଧ୍ୟରେ ସଚେତନତା ସୃଷ୍ଟି କରିବା ତାଙ୍କର ଲକ୍ଷ୍ୟ ରହିଛି।
