ନନ୍ଦପୁର,୧୬।୬(ତୁଷାର କାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ବ୍ଲକ ସଦର ମହକୁମା ଦେଇ ଯାଇଥିବା ଏମଡିଆର ୫୫ ରାସ୍ତାର ସୀମାଦ୍ରୀ ମଣ୍ଡପ ସମ୍ମୁଖରେ ଏକ ବଡ଼ ଧରଣର ସଡ଼କ ଦୁର୍ଘଟଣା ହୋଇଛି । ରବିବାର ରାତି ୯ଟା ସମୟରେ ଏକ ଉପୁଡ଼ି ପଡିଥିବା ଗଛକୁ ଦୁଇ ପଟରୁ ଆସୁଥିବା ଅଟୋ ଓ ପିକଅପ ଗାଡ଼ି ମୁହାଁ ମୁହିଁ ଧକ୍କା ହେବାରେ ୯ ଜଣ ଗୁରୁତର ହୋଇଛନ୍ତି। ସେମାନଙ୍କ ମଧ୍ୟରୁ ୮ ଜଣ ଶ୍ରମିକ ଯୁବତୀ ଥିବା ବେଳେ ଜଣେ ପୁରୁଷ ଭାବେ ଅଟୋ ଚାଳକ ଥିବା ଜଣାପଡ଼ିଛି।
ଅଟୋ ଚାଳକ ପଦଲାମ ଆର୍ଲାବଙ୍କ ସମେତ ୭ ଜଣ ଯୁବତୀଙ୍କ ସ୍ଥିତି ଅଧିକ ଗୁରୁତର ହେବାରୁ ଡାକ୍ତର ୮ ଜଣଙ୍କୁ କୋରାପୁଟ ସ୍ଥାନାନ୍ତର କରିଛନ୍ତି । ସୂଚନା ମୁତାବକ ଗେରୁପୁଟ ଗ୍ରାମର ୧୨ ଜଣ ଯୁବତୀ ପାତାଳୀ ନଦୀରୁ ବାଲି କାଢ଼ିବାକୁ ପାଡୁଆ ଅଞ୍ଚଳକୁ ଯାଇ ଏକ ଅଟୋ ଯୋଗେ ଘରକୁ ଫେରୁଥିଲେ। ଫେରିବା ବାଟର ସୀମାଦ୍ରୀ ମଣ୍ଡପ ନିକଟରେ ଅନ୍ଧାର ଓ ରାସ୍ତା ଉପରେ ଏକ ଜାମୁକୋଳି ଗଛ ପଡିଥିଲା। ସାମନା ପଟରୁ ଏକ ପିକଅପ୍ ଗାଡ଼ି ଆସୁଥିବା ବେଳେ ଦୁଇ ଗାଡ଼ି ଆଲୋକରେ ରାସ୍ତା ଉପରେ ପଡ଼ିଥିବା ଗଛକୁ କେହି ଦେଖି ନପାରି ମୁହାଁ ମୁହିଁ ଧକ୍କା ହୋଇଥିଲେ। ଘଟଣା ସ୍ଥଳ ଅଗ୍ନିଶମ ବାହିନୀ କାର୍ଯ୍ୟାଳୟ ସମୀପରେ ଥିବାରୁ କେନ୍ଦ୍ରଧିକାରି ହେମନ୍ତ କୁମାର ସାମଲଙ୍କ ନେତୃତ୍ଵାଧୀନ ଦଳ ଘଟଣା ସ୍ଥଳରେ ପହଞ୍ଚି ସମସ୍ତ ଆହତଙ୍କୁ ଉଦ୍ଧାର କରିଥିଲେ।
ଅଗ୍ନିଶମ ଗାଡି ଓ ସ୍ଥାନୀୟ ସମାଜସେବୀ ବିପିନି ମହାନ୍ତିଙ୍କ ଗାଡ଼ିରେ ନନ୍ଦପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ । ଅଟୋରେ ଥିବା ୧୨ ଜଣଙ୍କ ମଧ୍ୟରୁ ଲୀଳା ଗୋଲରି, ତୁଳସୀ ବୁରୁଡି, ଭାଗମତି ବୁରୁଡି, କୁସୁମା ବୁରୁଡି, ଯମୁନା ହିଙ୍ଗଇ, ଗାଦି ହିଙ୍ଗଇ, ବର୍ଷା ବୁରୁଡି, ମମତା ବୁରୁଡି ପ୍ରମୁଖ ଗୁରୁତର ଆହତ ହୋଇଛନ୍ତି। ଅଟୋ ଚାଳକ ପଦଲାମଙ୍କ ଓ ୭ ଜଣ ଯୁବତୀଙ୍କ ଅଧିକ ଚିକିତ୍ସା ଲାଗି କୋରାପୁଟ ସ୍ଥାନାନ୍ତର କରାଯାଇଛି । ନନ୍ଦପୁର ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ କରୁଛି ।
