ବ୍ରିସବେନ୍, ୭।୧୦: ଭ୍ରମଣକାରୀ ନ୍ୟୁଜିଲାଣ୍ଡ ମହିଳା ଦଳ ବିପକ୍ଷରେ ଏଠାରେ ଅନୁଷ୍ଠିତ ୩ୟ ଦିନିକିଆ ମ୍ୟାଚ୍ରେ ଅଷ୍ଟ୍ରେଲିଆ ବୃହତ୍ ବିଜୟ ହାସଲ କରିଛି। ସ୍ଥାନୀୟ ଆଲାନ୍ ବର୍ଡର ଫିଲ୍ଡରେ ବୁଧବାର ଖେଳାଯାଇଥିବା ଏହି ମୁକାବିଲାରେ ପ୍ରଥମେ ବ୍ୟାଟିଂ କରି ଅଷ୍ଟ୍ରେଲିଆ ମହିଳା କ୍ରିକେଟ୍ ଦଳ ୫୦ ଓଭରରେ ୫ ଉଇକେଟ୍ ହରାଇ ୩୨୫ ରନ୍ ସଂଗ୍ରହ କରିଥିଲା। ଦଳ ପକ୍ଷରୁ ଅଧିନାୟିକା ରଚେଲ ହାୟନେସ ସର୍ବାଧିକ ୯୬ ରନ କରିଥିବାବେଳେ ତାଙ୍କୁ ଉଇକେଟ୍କିପର ଏଲିଆ ହିଲି (୮୭ ରନ) ଉପଯୁକ୍ତ ସହାୟତା କରିଥିଲେ। ଜବାବରେ ନ୍ୟୁଜିଲାଣ୍ଡ ମହିଳା କ୍ରିକେଟ୍ ଦଳ ଘରୋଇ ଦଳର ବୋଲିଂକୁ ସାମ୍ନା କରି ନ ପାରି ମାତ୍ର ୯୩ ରନରେ ଅଲ୍ଆଉଟ୍ ହୋଇଥିଲା। ଫଳରେ ଅଷ୍ଟ୍ରେଲିଆ ମହିଳା ଦଳ ୨୩୨ ରନର ବୃହତ୍ ବ୍ୟବଧାନରେ ବିଜୟୀ ହୋଇଥିଲା। ଦିନିକିଆ କ୍ରିକେଟ୍ରେ ନ୍ୟୁଜିଲାଣ୍ଡ ବିପକ୍ଷରେ ଅଷ୍ଟ୍ରେଲିଆର ଏହା ସର୍ବବୃହତ୍ ବିଜୟ ଥିଲା। ଏଥିସହ ଦଳ ୩-୦ରେ ସିରିଜ କ୍ଲିନ ସୁଇପ କରିଛି। ସେହିଭଳି ଏହି ବିଜୟ ସହ ଅଷ୍ଟ୍ରେଲିଆ ମହିଳା କ୍ରିକେଟ୍ ଦଳ ପୁରୁଷ ଅଷ୍ଟ୍ରେଲିଆ କ୍ରିକେଟ୍ ଦଳ ନାମରେ ରହିଥିବା ବିଶ୍ୱରେକର୍ଡ ସହ ସମକକ୍ଷ ହୋଇପାରିଛି। ଦିନିକିଆରେ ଲଗାତର ଭାବେ ସର୍ବାଧିକ ମ୍ୟାଚ୍ ଜିତିବାର ରେକର୍ଡ ଅଷ୍ଟ୍ରେଲିଆ ପୁରୁଷ ଦଳ ନାମରେ ରହିଛି। ରିକି ପଣ୍ଟିଂଙ୍କ ନେତୃତ୍ୱରେ ଅଷ୍ଟ୍ରେଲିଆ ୨୦୦୩ରେ କ୍ରମାଗତ ଭାବେ ୨୧ ମ୍ୟାଚ୍ ଜିତି ଏହି ରେକର୍ଡ କରିଥିଲା। ଏବେ ଅଷ୍ଟ୍ରେଲିଆ ମହିଳା ଦଳ ଲଗାତର ୨୧ ଦିନିକିଆ ମ୍ୟାଚ୍ ଜିତି ଏହି ବିଶ୍ୱ ରେକର୍ଡ ସହ ସମକକ୍ଷ ହୋଇପାରିଛି।
