ଢେଙ୍କାନାଳ ଅଫିସ,୩୦ା୫: ଢେଙ୍କାନାଳସ୍ଥିତ ଭାରତୀୟ ଜନସଞ୍ଚାର ସଂସ୍ଥାନ (ଆଇଆଇଏମ୍ସି)ରେ ଛାତ୍ରୀଛାତ୍ରମାନଙ୍କ ଦ୍ୱାରା କରାଯାଇଥିବା ପ୍ରାଚୀର ଚିତ୍ର ଆକର୍ଷଣୀୟ ହୋଇଥିବା ବେଳେ ମଧୁବନୀ ଚିତ୍ରକଳା ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ଛାତ୍ରୀଛାତ୍ର, ଅଧ୍ୟାପକମାନେ ଚିତ୍ରକଳାକୁ ଉପଭୋଗ କରୁଛନ୍ତି। ହରିଣ, ହାତୀ, ଚଢେଇ, ଗଛଲତା ଆଦିର ସୁନ୍ଦର ରୂପରେଖ ତିଆରି ହେଉଛି। ବୈଷୟିକ ସଂଯୋଜକ ତଥା ଚିତ୍ରକର ବଦ୍ରିନାଥ ଜେନାଙ୍କ ନେତୃତ୍ୱରେ ଛାତ୍ରୀ ପ୍ରୀତିନନ୍ଦା ବେହେରା, କାବ୍ୟା ନାୟାର, ଶୁଭଲକ୍ଷ୍ମୀ ଓଝା, ରୂପାଲି ଚୌଧୁରୀ, ଛାତ୍ର ପ୍ରଶାନ୍ତ କୁମାର, ଇଜାଜ୍ ଖାନ୍, ରଜତ ଖର୍ଗୱାଲ ଏହି ଚିତ୍ରକଳା ଅଙ୍କନ କରିଛନ୍ତି। ଗତ ୨୪ ତାରିଖରେ ସଂସ୍ଥାନକୁ ଏକ କାର୍ଯ୍ୟକ୍ରମରେ ଅତିଥି ଭାବେ ଆସିଥିବା ଅନୁଗୋଳ ସ୍ବୟଂଶାସିତ ମହାବିଦ୍ୟାଳୟର ପୂର୍ବତନ ଅଧ୍ୟକ୍ଷ ଶାନ୍ତନୁ କୁମାର ସର ପ୍ରାରମ୍ଭିକ ରଙ୍ଗମାରି ଆଧୁନିକ ଚିତ୍ରକଳା ଅଙ୍କନର ଶୁଭାରମ୍ଭ କରିଥିଲେ। ସଂସ୍ଥାନର ଆଞ୍ଚଳିକ ନିର୍ଦ୍ଦେଶକ ପ୍ରଫେସର ମୃଣାଳ ଚାଟାର୍ଜୀଙ୍କ ପରିକଳ୍ପନାରେ ଏହାର ପ୍ରାକୃତିକ ପରିବେଶ ସବୁଜିମା ଓ ଆକର୍ଷଣୀୟ ହୋଇଉଠିଛି। ପୂର୍ବାଞ୍ଚଳର ଏହି କ୍ୟାମ୍ପସକୁ କଳା ଓ ସଂସ୍କୃତିର ଛାପ ଦିଆଯାଇଛି। ଆଦିବାସୀ ଚିତ୍ରକଳା, ମଧୁବନୀ ଓ ମଣ୍ଡଳ ଆର୍ଟ ପରେ ଏବେ ଆଧୁନିକ ଚିତ୍ରକଳାରେ ସଂସ୍ଥାନର କାନ୍ଥ ଝଲସି ଉଠୁଛି। ପାଠପଢ଼ା ସହ ଛାତ୍ରୀଛାତ୍ରଙ୍କୁ କଳା ସଂସ୍କୃତି ପ୍ରତି ଆକୃଷ୍ଟ କରିବାରେ ଏହା ସହାୟକ ହୋଇଛି। ବିଭିନ୍ନ ରାଜ୍ୟରୁ ଆସୁଥିବା ଛାତ୍ରୀଛାତ୍ର ଚିତ୍ରକଳା ସହ ନିଜକୁ ସମ୍ପୃକ୍ତ କରି ଆନନ୍ଦିତ ହେଉଛନ୍ତି।
