ଅନୁଗୋଳ ଅଫିସ, ୮।୨ କୋଭିଡ୍ ସଂକ୍ରମଣ କାରଣରୁ ଦୀର୍ଘଦିନ ବନ୍ଦ ରହିବା ପରେ ସୋମବାରଠାରୁ ଅନୁଗୋଳ ଜିଲାରେ ହାଇସ୍କୁଲଗୁଡ଼ିକ ଖୋଲିଛି। ଫଳରେ ଛାତ୍ରୀଛାତ୍ରଙ୍କ ମଧ୍ୟରେ ଉତ୍ସାହ ଦେଖାଦେଇଛି। ପ୍ରଥମ ଦିନରେ ଅଷ୍ଟମ, ନବମ ଓ ଦଶମ ଶ୍ରେଣୀରେ ୫୦ ପ୍ରତିଶତରୁ ଅଧିକ ଉପସ୍ଥାନ ଦେଖାଯାଇଥିବା ବେଳେ ଦଶମ ଶ୍ରେଣୀର ଅଧିକ ପିଲା ସ୍କୁଲ ଆସିଥିବା ଜଣାପଡ଼ିଛି। ଟିକା ନେଇ ନ ଥିଲେ ମଧ୍ୟ ପିଲାମାନଙ୍କୁ ସ୍କୁଲ ପଠାଇବାକୁ ଅଭିଭାବକଙ୍କ ମଧ୍ୟରେ ଆଗ୍ରହ ରହିଥିବା ଏଥିରୁ ସ୍ପଷ୍ଟ ହେଉଛି। ଜିଲା ଶିକ୍ଷା ଅଧିକାରୀ ନିରଞ୍ଜନ ସାହୁ କହିଛନ୍ତି, ପ୍ରଥମ ଦିନରେ ଜିଲାର ଅଷ୍ଟମ ଶ୍ରେଣୀରେ ଛାତ୍ରୀଛାତ୍ରଙ୍କ ଉପସ୍ଥାନ ୭୦ ପ୍ରତିଶତ ରହିଛି। ସେହିପରି ନବମ ଶ୍ରେଣୀରେ ୬୭ ପ୍ରତିଶତ ଓ ଦଶମ ଶ୍ରେଣୀର ୮୯ ପ୍ରତିଶତ ପିଲା ସ୍କୁଲ ଆସିଛନ୍ତି। ଏହାଛଡ଼ା ଏକାଦଶ ଶ୍ରେଣୀରେ ୫୭ ପ୍ରତିଶତ ଏବଂ ଦ୍ୱାଦଶ ଶ୍ରେଣୀରେ ୬୬ ପ୍ରତିଶତ ଉପସ୍ଥାନ ଲକ୍ଷ୍ୟ କରାଯାଇଛି। ଆସନ୍ତା ୧୪ ତାରିଖରେ ପ୍ରାଥମିକ ସ୍କୁଲଗୁଡ଼ିକ ଖୋଲାଯିବାକୁ ସରକାର ନିର୍ଦ୍ଦେଶ ଦେଇଥିବାରୁ ଧୀରେ ଧୀରେ ଶିକ୍ଷା ବ୍ୟବସ୍ଥା ପୁଣି ଟ୍ରାକ୍କୁ ଫେରିବ। କିଛି ଦିନ ମଧ୍ୟରେ ଶ୍ରେଣୀଗୃହରେ ଉପସ୍ଥାନ ବୃଦ୍ଧି ପାଇବ। ନେଟ୍ଓ୍ବର୍କ ନ ଥିବା କାରଣରୁ ଜିଲାର ଦୁର୍ଗମ ଅଞ୍ଚଳର ଛାତ୍ରୀଛାତ୍ରମାନେ ଠିକ୍ ଭାବେ ଅନ୍ଲାଇନରେ ପଢ଼ିପାରି ନ ଥିଲେ। ତେଣୁ ସ୍କୁଲ ଖୋଲିବା ପରେ ସେମାନଙ୍କ ଶିକ୍ଷା ଚିନ୍ତା ଦୂର ହୋଇଥିବା ଜିଲା ଶିକ୍ଷା ଅଧିକାରୀ ପ୍ରକାଶ କରିଛନ୍ତି।
