ଦାରିଙ୍ଗବାଡ଼ି,୮ା୯(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା କିରିକୁଟି ପଞ୍ଚାୟତର ପୂର୍ବତନ ସରପଞ୍ଚ ତ୍ରିଲୋଚନ ପ୍ରଧାନ ଓରଫ ଟିଟୁଙ୍କୁ ରବିବାର ବିଳମ୍ବିତ ରାତିରେ କେହି ଦୁର୍ବୃତ୍ତ ଜୀବନରୁ ମାରି ଦେବାକୁ ବସିଥିଲେ। ତେବେ ଏବେ ପର୍ଯ୍ୟନ୍ତ କେହି ଥାନାରେ ଲିଖିତ ଅଭିଯୋଗ କରି ନ ଥିବା ଜଣାପଡ଼ିଛି। ଟିଟୁଙ୍କ ପରିବାରରେ କେହି ନ ଥିବାରୁ ହୁଏତ ଗ୍ରାମବାସୀ ଅଭିଯୋଗ କରିପାରନ୍ତି ବୋଲି କୁହାଯାଉଛି। ଟିଟୁଙ୍କୁ ଆକ୍ରମଣ ପରେ ରକ୍ତ ଜୁଡୁବୁଡୁ ଅବସ୍ଥାରେ ଗ୍ରାମବାସୀ ତାଙ୍କୁ ପ୍ରଥମେ ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ ବ୍ରହ୍ମପୁର ନେଇ ସେଠାରେ ଏମ୍କେସିଜିରେ ଭର୍ତ୍ତି କରାଯାଇଥିବା ଜଣାପଡ଼ିଛି।
ଟିଟୁଙ୍କ ଆକ୍ରମଣ ଘଟଣାକୁ ନେଇ ଅନେକ କଥା ଏବେ ଚର୍ଚ୍ଚା ହେଉଛି। ପୂର୍ବରୁ ତାଙ୍କ ଜମିବାଡ଼ିକୁ ଅନ୍ୟ ସମ୍ପର୍କୀୟମାନେ ଜବରଦଖଲ କରିଥିବା ଓ ସେ ଘଟଣାକୁ ନେଇ ଟିଟୁ ସେମାନଙ୍କୁ ପଚାରିବାରୁ ସେମାନେ ଆକ୍ରମଣ କରୁଥିବା ଭିଡିଓ ଏବେ ଭାଇରାଲ ହେଉଛି। ଟିଟୁଙ୍କ ସ୍ତ୍ରୀ ପୂର୍ବରୁ ମୃତ୍ୟୁବରଣ କରିଥବା ବେଳେ ତାଙ୍କର କେହି ଛୁଆ ପିଲା ନାହାନ୍ତି। ଟିଟୁଙ୍କ ରାଜପଥ କଡ଼ରେ ଏକର ଏକର ଜମି ପଡ଼ିଛି। ଫଳରେ ତାଙ୍କ ଜମିକୁ ଦୂର ସମ୍ପର୍କୀୟମାନେ ହଡ଼ପ କରିବା ପାଇଁ ବାରମ୍ବାର ଉଦ୍ୟମ କରୁଥିବା ନେଇ ଥାନା ପର୍ଯ୍ୟନ୍ତ ପହଞ୍ଚିଥିଲା ଓ ଚଳିତ ବର୍ଷ ଅଗଷ୍ଟ ୫ରେ ଏହି ବିବାଦ ନେଇ ଥାନାରେ ଉଭୟ ପକ୍ଷ ରାଜିନାମା ହୋଇଥିବା ଓ ଥାନାରେ ଦିଆଯାଇଥିବା ମାମଲାକୁ ଉଠାଇବାକୁ ଉଭୟ ଟିଟୁ ଓ ତାଙ୍କ ସହ ଝଗଡ଼ା ହୋଇଥିବା ବ୍ୟକ୍ତି ଲିଖିତ ଦେଇଥିଲେ।
ତେବେ ଏହି ଜମିବାଡ଼ିକୁ ହଡ଼ପ କରିବା ଓ ଟିଟୁଙ୍କୁ ରାସ୍ତାରୁ ହଟେଇ ଦେଲେ ତାଙ୍କ ପରିବାରରେ ଆଉ କେହି ନ ଥିବାରୁ ତାଙ୍କ ଦୁରସମ୍ପର୍କୀୟ ଏହି ଜମିକୁ ପୁନର୍ବାର ହଡ଼ପ କରିବା ଉଦ୍ଦେଶ୍ୟରେ ତାଙ୍କୁ ଜୀବନରେ ମାରିବାକୁ ଉଦ୍ୟମ କରିଥାଇ ପାରନ୍ତି ବୋଲି ଆଲୋଚନା ହେଉଛି। ତେବେ ଦାରିଙ୍ଗବାଡ଼ି ପୋଲିସଗୁରୁତର ଟିଟୁଙ୍କଠାରୁ ବୟାନ ରେକର୍ଡ କରିଥିବା ଜଣାପଡ଼ିଛି। ଘଟଣାକୁ ପୋଲିସ ଗୁରୁତର ସହ ନେଇଥିବା ଜଣାପଡ଼ିଛି।
