ଲଣ୍ଡନ,୬।୩: ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ତାଙ୍କର ୬ ଦିନିଆ ୟୁକେ ଏବଂ ଆୟର୍ଲାଣ୍ଡ ଗସ୍ତରେ ଅଛନ୍ତି। ବୈଦେଶିକ ମନ୍ତ୍ରୀ ଚାଥାମ ହାଉସରେ ପହଞ୍ଚିବା ପୂର୍ବରୁ କିଛି ଖଲିସ୍ତାନୀ ସମର୍ଥକ ସେଠାରେ ଉପସ୍ଥିତ ଥିଲେ। ସେମାନେ ଭାରତ ବିରୋଧୀ ସ୍ଲୋଗାନ ଦେଉଥିଲେ। ଏହି ସମୟରେ ଯେତେବେଳେ ଜୟଶଙ୍କର ଚାଥାମ ହାଉସରୁ ବାହାରୁଥିଲେ, ସେତେବେଳେ ତାଙ୍କ ଉପରେ ଆକ୍ରମଣ କରିବାକୁ ଚେଷ୍ଟା କରାଯାଇଛି। ତେବେ ଚାଥାମ ହାଉସ ଦ୍ୱାରା ଆୟୋଜିତ ଏକ ଆଲୋଚନାରେ ଜୟଶଙ୍କର ଅଂଶଗ୍ରହଣ କରିଥିବା ସ୍ଥାନ ବାହାରେ ଖଲିସ୍ତାନ ସମର୍ଥକମାନେ ମଧ୍ୟ ପ୍ରଦର୍ଶନ କରିଥିଲେ। ବିକ୍ଷୋଭକାରୀମାନେ ପତାକା ଏବଂ ସ୍ପିକର ଧରି ସ୍ଲୋଗାନ ଦେଇ ଭବନ ବାହାରେ ଏକାଠି ହୋଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ଲଣ୍ଡନରେ ଭାରତୀୟ ହାଇକମିଶନ ବାହାରେ ପ୍ରତିବାଦ କରିବା ପାଇଁ ଖଲିସ୍ତାନ ସମର୍ଥକଙ୍କ ଏକ ଗୋଷ୍ଠୀ ଏକତ୍ରିତ ହୋଇଥିଲେ। ସେମାନେ ପୂର୍ବରୁ ଲଣ୍ଡନର ହାରୋରେ ଥିବା ଏକ ସିନେମା ହଲରେ ମଧ୍ୟ ହଙ୍ଗାମା କରିଥିଲେ ଏବଂ କଙ୍ଗନା ରାଣାୱତଙ୍କ ଅଭିନୀତ ଫିଲ୍ମ ଏମର୍ଜେନ୍ସିର ସ୍କ୍ରିନିଂକୁ ବନ୍ଦ କରିବାକୁ ଚେଷ୍ଟା କରିଥିଲେ। ୟୁକେର କିଛି ସିନେମା ହଲରେ ଫିଲ୍ମ ପ୍ରଦର୍ଶନ ସମୟରେ ଖଲିସ୍ତାନ ସମର୍ଥକଙ୍କ ଦ୍ୱାରା ହୋଇଥିବା ହିଂସା ବିଷୟରେ ପଚରାଯିବାରୁ, ବିଦେଶ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଥିଲେ, “ଭାରତ ବିରୋଧୀ ତତ୍ତ୍ୱଙ୍କ ଦ୍ୱାରା ହିଂସାତ୍ମକ ପ୍ରତିବାଦ ଏବଂ ଧମକ ଘଟଣା ବିଷୟରେ ଆମେ ୟୁକେ ସରକାରଙ୍କ ନିକଟରେ ନିରନ୍ତର ଆମର ଚିନ୍ତା ପ୍ରକାଶ କରିଆସୁଛୁ। ଆମେ ଆଶା କରୁଛୁ ଯେ ୟୁକେ ପକ୍ଷ ଅଭିଯୁକ୍ତଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଲଣ୍ଡନରେ ଥିବା ଆମର ହାଇ କମିଶନ ଆମ ସମ୍ପ୍ରଦାୟର ସଦସ୍ୟମାନଙ୍କ ସୁରକ୍ଷା ଏବଂ କଲ୍ୟାଣ ସୁନିଶ୍ଚିତ କରିବା ପାଇଁ ନିୟମିତ ଯୋଗାଯୋଗରେ ରହିଛି। ଆମେ ଆଶା କରୁଛୁ ଯେ ୟୁକେ ପକ୍ଷରୁ ଏହି ମାମଲାରେ ଉପଯୁକ୍ତ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଉଲ୍ଲେଖଯୋଗ୍ୟ, ୨୦୨୩ରେ ଲଣ୍ଡନରେ ଭାରତୀୟ ହାଇକମିଶନ ଉପରେ ଖାଲିସ୍ତାନ ସମର୍ଥକଙ୍କ ଦ୍ୱାରା ହିଂସାତ୍ମକ ଆକ୍ରମଣ ହୋଇଥିଲା। ଏନଆଇଏ ଅନୁଯାୟୀ, ୱାରିସ ପଞ୍ଜାବ ଦେଶ ମୁଖ୍ୟ ଅମୃତପାଲ ସିଂହଙ୍କ ବିରୁଦ୍ଧରେ ପଞ୍ଜାବ ପୋଲିସ ଦ୍ୱାରା ନିଆଯାଇଥିବା କାର୍ଯ୍ୟାନୁଷ୍ଠାନର ପ୍ରତିଶୋଧ ସ୍ବରୂପ ଲଣ୍ଡନରେ ଆକ୍ରମଣ କରାଯାଇଥିଲା, ଯାହାର ଉଦ୍ଦେଶ୍ୟ ସଂଗଠନ ଏବଂ ଏହାର ନେତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନକୁ ପ୍ରଭାବିତ କରିବା ଥିଲା।
