ଦଶମନ୍ତପୁର,୨୧ା୩(ଅରବିନ୍ଦ ନାୟକ): କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ପୋଡ଼ାଗଡ଼ ଉପସ୍ବାସ୍ଥ୍ୟକେନ୍ଦ୍ରରେ ଏକ ଅଭାବନୀୟ ଘଟଣା ଘଟିଛି। କୌଣସି କାରଣ ନ ଥାଇ ପୋଡ଼ାଗଡ଼ ଅଞ୍ଚଳର ୩ ଜଣ ଦୁର୍ବୃତ୍ତ ହସ୍ପିଟାଲ ଭିତରେ ପଶି ଜଣେ ସ୍ବାସ୍ଥ୍ୟକର୍ମୀ ଓ ସୁରକ୍ଷାକର୍ମୀଙ୍କୁ ମରଣାନ୍ତକ ଆକ୍ରମଣ କରିଛନ୍ତି। ଏନେଇ ଉଭୟେ ସଦର ଥାନାରେ ଏତଲା ଦେଇଛନ୍ତି।
ଆକ୍ରମଣର ଶିକାର ହୋଇଥିବା ସ୍ବାସ୍ଥ୍ୟକର୍ମୀ ଜଣକ ହେଲେ ପ୍ରତାଶ ଜାନି (୪୫) ଓ ସୁରକ୍ଷାକର୍ମୀ ଜଲମି ଡଙ୍ଗ୍ରି (୩୫) ବୋଲି ଜଣାପଡ଼ିଛି। ଖବରରୁ ଜଣାପଡିଛି, ୩ଜଣ ଦୁର୍ବୃତ୍ତ ହସ୍ପିଟାଲକୁ ଯାଇ ସ୍ବାସ୍ଥ୍ୟକର୍ମୀଙ୍କୁ ଏକ ଅଏଣ୍ଟମେଣ୍ଟ ଓ ଗଜ୍ କପଡ଼ା ମାଗିଥିଲେ। ସ୍ବାସ୍ଥ୍ୟ କର୍ମୀ ପ୍ରତାଶ ଅଇଣ୍ଟମେଣ୍ଟ ଦେଇଥିଲେ, ମାତ୍ର ଗଜ୍ କପଡ଼ା ପାଖରେ ନାହିଁ ,ଫାର୍ମାସିଷ୍ଟ ଘରକୁ ଚାଲିଗଲେଣି ଦେଇହେବ ନାହିଁ ବୋଲି କହିଥିଲେ।
ଏହା ଶୁଣି ସେହି ୩ ବ୍ୟକ୍ତି ତାଙ୍କୁ ଗାଳିଗୁଲଜ କରିଥିଲେ। ପରେ ସୁରକ୍ଷାକର୍ମୀ ଷ୍ଟୋର ରୁମ୍କୁ ଯାଇ ଗଜ୍ କପଡ଼ା ଆଣି ଦେଇଥିଲେ। ଏହା ସତ୍ତ୍ୱେ ସେମାନେ ସ୍ବାସ୍ଥ୍ୟକର୍ମୀ ପ୍ରତାଶଙ୍କୁ ଗାଳିଗୁଲଜ କରି ଆକ୍ରମଣ କରିଥିଲେ। ସୁରକ୍ଷା କର୍ମୀ ଡଙ୍ଗ୍ରି ଛଡ଼ାଇବାରୁ ତାଙ୍କୁ ମଧ୍ୟ ଧାରୁଆ ଅସ୍ତ୍ରରେ ମୁଣ୍ଡକୁ ଆକ୍ରମଣ କରିଥିଲେ। ଏଥିରେ ଡଙ୍ଗ୍ରି ଲହୁଲୁହାଣ ହୋଇ କିଛି ସମୟ ଚେତାଶୂନ୍ୟ ହୋଇ ପଡ଼ିଥିଲେ। ପରେ ଦୁର୍ବୃତ୍ତମାନେ ସେଠାରୁ ଫେରାର ହୋଇଯାଇଥିଲେ। ଏଥିରେ ସିସିଟିଭି ଫୁଟେଜ ଅନୁସାରେ ତଦନ୍ତକରି ଡାକ୍ତରଖାନା ପକ୍ଷରୁ ଥାନାରେ ଏତଲା ହୋଇଛି। ଏପରି ଘଟଣା ପରେ ଡାକ୍ତରଖାନାରେ ସେବା ଯୋଗାଇବାକୁ ସୁରକ୍ଷା କର୍ମୀ ଭୟଭୀତ ହେଉଛନ୍ତି। ସେମାନଙ୍କୁ ସୁରକ୍ଷା ଯୋଗାଇଦେବାକୁ ଦାବି ହେଉଛି।
