ଶ୍ରୀନଗର, ୨୨।୭: ଭାରତରେ ଆକ୍ରମଣ ପାଇଁ ଆତଙ୍କବାଦୀମାନେ କରିଥିବା ଷଡ଼ଯନ୍ତ୍ର ପଣ୍ଡ ହୋଇଯାଇଛି। ରାଜୌରୀର ଥାନାମଣ୍ଡି ଅଞ୍ଚଳରେ ସର୍ଚ୍ଚ ଅପରେଶନ୍ ସମୟରେ ଏକ ଆତଙ୍କବାଦୀ ଶିବିରର ପର୍ଦ୍ଦାଫାଶ୍ ହୋଇଛି। ଏଠାରୁ ବିପୁଳ ପରିମାଣର ଗୁଳିଗୋଳା ସହିତ ଏକେ-୪୭ ରାଇଫଲ, ପିସ୍ତଲ, ଗ୍ରେନେଡ୍ ଆଦି ଜବତ କରାଯାଇଛି। ସ୍ଥାନୀୟ ମନପାଳ ଅଞ୍ଚଳରେ ଆତଙ୍କବାଦୀ ଶିବିର ରହିଥିବା ଗୋଇନ୍ଦା ରିପୋର୍ଟ ମିଳିଥିଲା। ଏହାର ଆଧାରରେ ୩୮-ଆର୍ଆର୍, ଜମ୍ମୁ-କଶ୍ମୀର ପୋଲିସ ଏବଂ ଭାରତୀୟ ସେନା ପକ୍ଷରୁ ମିଳିତ ଅଭିଯାନ ଆରମ୍ଭ ହୋଇଥିବା କଶ୍ମୀର ଜୋନ୍ ପୋଲିସ ପକ୍ଷରୁ ଟୁଇଟ୍ କରି ସୂଚନା ଦିଆଯାଇଛି। ପାକିସ୍ତାନ ସହାୟତାରେ ଆତଙ୍କବାଦୀମାନେ ଏସବୁ ଗୁଳିଗୋଳା ଠୁଳ କରିଥିବା କୁହାଯାଉଛି।
