ଧର୍ମଶାଳା,୧ା୩(ଶିବ ପ୍ରସାଦ ମହାନ୍ତି): ଯାଜପୁର ଜିଲାରେ ପୂର୍ବ ସରକାର ସମୟରେ ଅନେକ ଦୁର୍ନୀତି ହୋଇଥିବା ବେଳେ ପୋଲିସ ପ୍ରଶାସନ, ଖଣି ଉପନିର୍ଦ୍ଦେଶକ ଏବଂ ତହସିଲ ପ୍ରଶାସନ ମିଳିତ ଭାବେ ନେତାଙ୍କ ଚାପରେ ତାଙ୍କ ଉପରେ କରିଥିବା ଅତ୍ୟାଚାର ଓ ବେଆଇନ କାର୍ଯ୍ୟ ବିରୋଧରେ ଧର୍ମଶାଳାର ବରିଷ୍ଠ ଭାଜପା ନେତା ତଥା ସୂଚନା ଅଧିକାର କର୍ମୀ ସର୍ବେଶ୍ୱର ବେହୁରା ଏକ ଖବରଦାତା ସମ୍ମିଳନୀ କରି ବର୍ଷିଛନ୍ତି। ଧର୍ମଶାଳା ପୂର୍ବତନ ବିଧାୟକ ପ୍ରଣବ ବଳବନ୍ତରାୟ ପନ୍ତୁରି ଠାରେ ବେଆଇନ ଭାବରେ ୧.୧୦ ଏକର ସରକାରୀ ଜମିକୁ ଜବରଦଖଲ କରିଥିଲେ। ଯାହାକୁ ପ୍ରଶାସନ ପକ୍ଷରୁ କିଛି ଦିନ ପୂର୍ବରୁ ଉଚ୍ଛେଦ କରାଯାଇଛି। ତେଣୁ ରକ୍ଷକ ହୋଇ ଭକ୍ଷକ ସାଜିଥିବା ପୂର୍ବତନ ବିଧାୟକ ପ୍ରଣବ ବଳବନ୍ତରାୟ ଧର୍ମଶାଳା ବାସୀଙ୍କୁ କ୍ଷମା ମାଗନ୍ତୁ ବୋଲି ସର୍ବେଶ୍ୱର କହିଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ତଥା ବର୍ତ୍ତମାନର ବିରୋଧୀ ଦଳର ନେତା ନବୀନ ପଟ୍ଟନାୟକ, ଜନ ବିରୋଧୀ କାର୍ଯ୍ୟ କରୁଥିବା ନେତାଙ୍କୁ ଦଳରୁ ବିଦା କରୁଥିବା ବେଳେ ପୂର୍ବତନ ବିଧାୟକ ପ୍ରଣବ କରିଥିବା ଜନ ବିରୋଧୀ କାର୍ଯ୍ୟ ଉପରେ କଣ କାର୍ଯ୍ୟାନୁଷ୍ଠାନ ନେଉଛନ୍ତି ଏହା ପ୍ରଶ୍ନ ଉଠାଇଛନ୍ତି। ଏହି ଜମି ଜବରଦଖଲ ଘଟଣା ଯଦି ବିଧାନସଭାରେ କେହି ଉଠାନ୍ତି ତେବେ ପ୍ରଣବଙ୍କ ଅବସ୍ଥା କ’ଣ ହେବ ବୋଲି ମଧ୍ୟ ପ୍ରଶ୍ନ କରିଛନ୍ତି। ସେହିପରି ଦର୍ପଣ ତହସିଲ ଅନ୍ତର୍ଗତ ମାଣ୍ଡୁକା ପାହାଡ଼ରେ ତାଙ୍କ ଉପରେ ହୋଇଥିବା ୨୨୮ କୋଟି ଟଙ୍କା ଜରିମାନା ପ୍ରସଙ୍ଗ ଉପରେ ପ୍ରଣବ, ଖଣି ବିଭାଗ ଓ ପ୍ରଶାସନକୁ ସମାଲୋଚନା କରିଛନ୍ତି। ବିଜେଡି ସରକାର ସମୟରେ ତାଙ୍କୁ ଟାର୍ଗେଟ କରାଯାଉଥିଲା ଓ ପୂର୍ବତନ ବିଧାୟକଙ୍କୁ ଖୁସି କରିବାକୁ ଯାଇ ଉପ ଖଣି ନିର୍ଦ୍ଦେଶକ ଜୟପ୍ରକାଶ ନାୟକ
ତାଙ୍କ ଉପରେ ୨୨୮ କୋଟି ଟଙ୍କା ଜରିମାନା କରିଥିବା କହି ଦର୍ପଣ ତହସିଲଦାର ମାନସ ତ୍ରିପାଠୀଙ୍କୁ ମଧ୍ୟ ଭର୍ତ୍ସନା କରିଛନ୍ତି।
