ନୂଆଦିଲ୍ଲୀ,୧୯।୩: ମାର୍ଚ୍ଚ ମାସର ଅଧାରୁ ଅଧିକ ସମୟ ବିତିଗଲାଣି, ଏବଂ ଆଉ କିଛି ଦିନ ପରେ ଏପ୍ରିଲ ମାସ ଆରମ୍ଭ ହେବାକୁ ଯାଉଛି। ୧ ଏପ୍ରିଲରୁ, ଦେଶର ଅନେକ ବ୍ୟାଙ୍କ ସେମାନଙ୍କର ATM କାରବାର ନିୟମରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କାର୍ଯ୍ୟକାରୀ କରୁଛନ୍ତି। ଏହା ଆପଣଙ୍କର ମାଗଣା କାରବାର ସୀମା ଏବଂ ନଗଦ ଉଠାଣ ପାଇଁ ଲାଗୁ ହେଉଥିବା ଶୁଳ୍କ ଉପରେ ସିଧାସଳଖ ପ୍ରଭାବ ପକାଇବ।
ବିଶେଷକରି, ୧ ଏପ୍ରିଲରୁ, ATM ରେ UPI ମାଧ୍ୟମରେ କରାଯାଇଥିବା ନଗଦ ଉଠାଣକୁ ମଧ୍ୟ ଆପଣଙ୍କର ମାଗଣା କାରବାର ସୀମାରେ ଗଣନା କରାଯିବ। ଯଦି ଆପଣ ପୂର୍ୱ-ର୍ନିଦ୍ଧାରିତ ସୀମା ଅତିକ୍ରମ କରନ୍ତି, ତେବେ ଆପଣଙ୍କୁ ଅତିରିକ୍ତ ଶୁଳ୍କ ଲାଗିପାରେ।
ପୂର୍ୱରୁ, ଅନେକ ବ୍ୟାଙ୍କ ATM ରେ UPI ବ୍ୟବହାର କରି କରାଯାଇଥିବା ନଗଦ ଉଠାଣକୁ ଏକ ପୃଥକ କାରବାର ବର୍ଗ ଭାବରେ ବ୍ୟବହାର କରୁଥିଲେ; କିନ୍ତୁ, ନୂତନ ନିୟମ ଅନୁଯାୟୀ, ଏଗୁଡ଼ିକୁ ଏବେ ଆପଣଙ୍କର ମାସିକ ମାଗଣା କାରବାର ସୀମା ମଧ୍ୟରେ ଅନ୍ତର୍ଭୁକ୍ତ କରାଯିବ। HDFC ବ୍ୟାଙ୍କ ଏବଂ ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ଭଳି ବ୍ୟାଙ୍କଗୁଡ଼ିକ ପୂର୍ୱରୁ ଏହି ନୂତନ ନିୟମାବଳୀ ଘୋଷଣା କରିସାରିଛନ୍ତି।
ଫଳସୱରୂପ, ଯଦି ଆପଣ ଆପଣଙ୍କ ବ୍ୟାଙ୍କ ଦ୍ୱାରା ପ୍ରଦାନ କରାଯାଇଥିବା ମାଗଣା କାରବାର ସୀମା ଅପେକ୍ଷା ଅଧିକ ଥର ATM ରୁ ନଗଦ ଉଠାଣ କରନ୍ତି, ତେବେ ବ୍ୟାଙ୍କ ପ୍ରତ୍ୟେକ ଅତିରିକ୍ତ କାରବାର ପାଇଁ ୨୩ ପର୍ଯ୍ୟନ୍ତ ଶୁଳ୍କ ଆଦାୟ କରିବ। ବର୍ତ୍ତମାନ, ଏହି ବ୍ୟାଙ୍କଗୁଡ଼ିକ ନିଜସ୍ୱ ATM ରେ ପ୍ରତି ମାସରେ ପାଞ୍ଚ ଥର ମାଗଣା ନଗଦ ଉଠାଣର ସୁବିଧା ପ୍ରଦାନ କରନ୍ତି। ଅନ୍ୟ ବ୍ୟାଙ୍କଗୁଡ଼ିକର ATM ପାଇଁ, ଏହି ସୁବିଧା ମେଟ୍ରୋ ସହରଗୁଡ଼ିକରେ ତିନି ଥର ମାଗଣା ନଗଦ ଉଠାଣ ଏବଂ ଅଣ-ମେଟ୍ରୋ ସହରଗୁଡ଼ିକରେ ପାଞ୍ଚ ଥର ମାଗଣା ଉଠାଣର ସୁବିଧା ପ୍ରଦାନ କରେ।
UPI ବ୍ୟବହାର କରି ATM ରୁ ଟଙ୍କା ଉଠାଣ ପ୍ରକ୍ରିୟା ମଧ୍ୟ ବହୁତ ସରଳ। ଡେବିଟ କାର୍ଡ ବିନା ନଗଦ ଉଠାଣ ପାଇଁ, ଗ୍ରାହକମାନଙ୍କୁ କେବଳ ATM ସ୍କ୍ରିନରେ ପ୍ରଦର୍ଶିତ QR କୋଡ ସ୍କାନ କରିବାକୁ ପଡିବ ଏବଂ ସେମାନଙ୍କର UPI ଆପ ମାଧ୍ୟମରେ କାରବାରକୁ ଅନୁମୋଦନ କରିବାକୁ ପଡିବ। ଡିଜିଟାଲ ପେମେଣ୍ଟକୁ ପ୍ରୋତ୍ସାହିତ କରିବା ପାଇଁ ଅନେକ ବ୍ୟାଙ୍କ ଏହି ବୈଶିଷ୍ଟ୍ୟ ପ୍ରଚଳନ କରୁଛନ୍ତି।
ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ମଧ୍ୟ ଏହାର ଡେବିଟ କାର୍ଡର କିଛି ବର୍ଗ ପାଇଁ ଦୈନିକ ନଗଦ ଉଠାଣ ସୀମା ହ୍ରାସ କରିବାକୁ ନିଷ୍ପତ୍ତି ନେଇଛି। ବ୍ୟାଙ୍କ ଏପର୍ଯ୍ୟନ୍ତ ଏହି ପରିବର୍ତ୍ତନ ସମ୍ପର୍କରେ ସମ୍ପୂର୍ଣ୍ଣ ବିବରଣୀ ପ୍ରକାଶ କରିନାହିଁ। ତଥାପି, ରିପୋର୍ଟ ଅନୁଯାୟୀ ବ୍ୟାଙ୍କ ଦୈନିକ ନଗଦ ଉଠାଣ ସୀମା 50 ପ୍ରତିଶତ ପର୍ଯ୍ୟନ୍ତ ହ୍ରାସ କରିପାରେ। ବ୍ୟାଙ୍କଗୁଡ଼ିକ ଗ୍ରାହକମାନଙ୍କୁ ସେମାନଙ୍କର କାର୍ଡ ନିୟମାବଳୀ ଯାଞ୍ଚ କରିବାକୁ ଏବଂ ବଡ଼ କାରବାର ପାଇଁ UPI କିମ୍ୱା ନେଟ ବ୍ୟାଙ୍କିଂ ଭଳି ଡିଜିଟାଲ ବିକଳ୍ପ ବ୍ୟବହାର କରିବାକୁ ପରାମର୍ଶ ଦେଉଛନ୍ତି।
