ନୂଆଗାଁ,୧୪।୧୧ (ଧନେଶ୍ୱର ସାହୁ): କୃଷକ ଦେଶର ମେରୁଦଣ୍ଡ। କୃଷକର ଉନ୍ନତିରେ ଦେଶର ପ୍ରଗତି। ତେଣୁ କୃଷକମାନଙ୍କ ଉନ୍ନତି ତଥା ଉନ୍ନତଧରଣର ଚାଷ ପ୍ରଣାଳୀ ପାଇଁ ସରକାର ଅନେକ ଯୋଜନା ପ୍ରସ୍ତୁତ କରୁଛନ୍ତି। ଚାଷ ଜମିଗୁଡିକ ଜଳ ସେଚିତ ହୋଇ ପାରିଲେ ସୁବିଧାରେ ଅଧିକ ପରିମାଣର ଫସଲ ଅମଳ ହେବା ସହ ଚାଷୀଙ୍କର ଉନ୍ନତି ହୋଇପାରିବ। ତେଣୁ ଜମିଗୁଡିକୁ ଜଳସେଚନର ସୁବିଧା କରିବାକୁ କ୍ଷୁଦ୍ର ଜଳସେଚନ, ଉଠା ଜଳସେଚନ, ଚେକ୍ ଡ୍ୟାମ୍ ଆଦି ପ୍ରକଳ୍ପ ନିର୍ମାଣ କରିବାକୁ ସରକାର ଲକ୍ଷାଧିକ ଟଙ୍କା ଅନୁଦାନ ଦେଉଛନ୍ତି। କିନ୍ତୁ କେତେଜଣ ବିଭାଗୀୟ କର୍ମଚାରୀଙ୍କ ଅପାରଗତା ଯୋଗୁ ସେସବୁ ଯୋଜନାର ସୁଫଳ ଚାଷୀଙ୍କୁ ମିଳିପାରୁ ନ ଥିବା ଅଭିଯୋଗ ହେଉଛି। ଯାହାର ଜ୍ୱଳନ୍ତ ଉଦାହରଣ ନୟାଗଡ଼ ଜିଲା ନୂଆଗାଁ ବ୍ଲକରେ ଦେଖିବାକୁ ମିଳିଛି। ମାଇଛେଳି ପଞ୍ଚାୟତ କୃଷ୍ଣଚନ୍ଦ୍ରପୁର ଗ୍ରାମର କେତେଜଣ ଚାଷୀଙ୍କ ଜମିରେ ପାଣି ମାଡିବା ପାଇଁ ଉଠା ଜଳସେଚନ ବିଭାଗ ପକ୍ଷରୁ ପ୍ରକଳ୍ପ ନିର୍ମାଣ କରାଯାଇଥିଲେ ମଧ୍ୟ ଚାଷ ଜମିରେ ପାଣି ମାଡ଼ି ପାରୁନାହିଁ। ଫଳରେ ପ୍ରତିବର୍ଷ ଧାନ ଫସଲ ଉଜୁଡୁଥିବା ଚାଷୀମାନେ ଅଭିଯୋଗ କରିଛନ୍ତି।
ମାଇଛେଳି ପଞ୍ଚାୟତ କୃଷ୍ଣଚନ୍ଦ୍ରପୁର ଅଞ୍ଚଳର ଚାଷ ଜମିରେ ଜଳସେଚନ ପାଇଁ ଉଠାଜଳସେଚନ ବିଭାଗ ଦ୍ୱାରା କୃଷ୍ଣଚନ୍ଦ୍ରପୁର-ନଂ.୧ ଓ କୃଷ୍ଣଚନ୍ଦ୍ରପୁର ନଂ. ୨ ଉଠା ଜଳସେଚନ ପ୍ରକଳ୍ପ ନିର୍ମାଣ କରାଯାଇଛି। କୃଷ୍ଣଚନ୍ଦ୍ରପୁର ନଂ.୧ ଉଠା ଜଳସେଚନ ପ୍ରକଳ୍ପରେ ମା’ ହରଚଣ୍ଡୀ ପାଣି ପଞ୍ଚାୟତର ୩୫ ଜଣ ଚାଷୀଙ୍କ ୨୦ ହେକ୍ଟର ଜମିକୁ ଜଳସେଚିତ କରିବା ପାଇଁ ୨୦୨୧-୨୨ ଆର୍ଥତ୍କ ବର୍ଷରେ ୧୨ ଲକ୍ଷ ଟଙ୍କା ବ୍ୟୟରେ ପ୍ରକଳ୍ପ ନିର୍ମାଣ କରାଯାଇଛି। ସେହିପରି ସମାନ ସ୍ଥାନରେ କୃଷ୍ଣଚନ୍ଦ୍ରପୁର ନଂ. ୨ ଉଠା ଜଳସେଚନ ପ୍ରକଳ୍ପରେ ମା’ ଗ୍ରାମଦେବତୀ ପାଣିପଞ୍ଚାୟତର ୩୫ ଜଣ ଚାଷୀଙ୍କ ୨୦ ହେକ୍ଟର ଜମିକୁ ଜଳ ସେଚନ ପାଇଁ ୨୦୨୧-୨୨ ଆର୍ଥତ୍କ ବର୍ଷରେ ୧୮ଲକ୍ଷ ଟଙ୍କା ବ୍ୟୟ କରାଯାଇଥିଲା। ପ୍ରକଳ୍ପ ନିକଟରେ ଥିବା ସୂଚନା ଫଳକ ଅନୁସାରେ ଉକ୍ତ ଦୁଇଟି ପ୍ରକଳ୍ପର ନିର୍ମାଣ କାର୍ଯ୍ୟ ୨୦୨୨ ମାର୍ଚ୍ଚ ୨୧ରେ ଆରମ୍ଭ ହୋଇ ସେପ୍ଟେମ୍ବର ୧୭ରେ ଶେଷ ହୋଇଥିଲା। ତେବେ କାର୍ଯ୍ୟ ଶେଷ ହେବାର ବର୍ଷେ ବିତି ଯାଇଥିଲେ ମଧ୍ୟ ଅଦ୍ୟାବଧି ତାହା ଚାଲୁ କରାଯାଇନାହିଁ। ଚାଷୀ ଗଙ୍ଗାଧର ସାହୁ, ଚନ୍ଦ୍ରମଣୀ ବେହେରା, କାଳିଆ ବେହେରା, ବିଦ୍ୟାଧର ସାହୁଙ୍କ ସମେତ ଅନେକ ଚାଷୀ କହିଛନ୍ତି, ଜଳ ସେଚନ ପାଇଁ ପ୍ରାୟ ୩୦ ଲକ୍ଷ ଟଙ୍କା ବ୍ୟୟ କରାଯାଇ ଜଳ ଉତ୍ସରେ ପାଣି ପୂରି ରହିଥିଲେ ମଧ୍ୟ ପାଣି ଅଭାବରୁ ଫସଲ ଉଜୁଡି ଯାଉଛି। ସରକାରୀ ବ୍ୟବସ୍ଥା ଥାଇ ମଧ୍ୟ ଉଠା ଜଳସେଚନ କର୍ମଚାରୀଙ୍କ ଓ ଅଧିକାରୀଙ୍କ ଖାମଖିଆଲ ନୀତି ଯୋଗୁ ଚାଷୀମାନେ ଅନେକ କ୍ଷତି ସହୁଛନ୍ତି। ଅଭିଯୋଗ ପାଇଁ ଅଧିକାରୀ କିମ୍ବା କର୍ମଚାରୀଙ୍କ ଦେଖା ମିଳୁ ନ ଥିବା ଚାଷୀମାନେ କହିଛନ୍ତି। ଜଳସେଚନ ପ୍ରକଳ୍ପ ଥାଇ ମଧ୍ୟ କାର୍ଯ୍ୟକ୍ଷମ ନ ହେବା ଓ ଚାଷୀଙ୍କ ଧାନ ଫସଲ ଉଜୁଡିବା ବାବଦରେ ଉଠା ଜଳସେଚନ ନିର୍ବାହୀ ଯନ୍ତ୍ରୀ ଦୁଃଶାସନ ଜେନାଙ୍କୁ ପଚାରିବାରେ ନିଜେ ଯାଇ ପାଣି ଚଲେଇ କି ଆସିଛି। କେଶବ ସାହୁଙ୍କୁ ମୋଟର ଚଲାଇବା ଦାୟିତ୍ୱ ଦିଆଯାଇଛି ବୋଲି ସେ କହିଛନ୍ତି। ଏ ସମ୍ପର୍କରେ କେଶବ ସାହୁଙ୍କୁ ପଚାରିବାରେ କୂଅରେ ପ୍ରଚୁର ପରିମାଣର ପାଣି ନାହିଁ। ୧୦ ମିନିଟରେ ପାଣି ଶୁଖି ଯାଉଛି। ଅନ୍ୟପକ୍ଷେ ଚାଷ କରିବା ସମୟରେ ପାଇପ୍ ଭାଙ୍ଗି ଯାଇଥିବା ସେ କହିଛନ୍ତି।
