ଧାନବାଦ,୨୯।୭: : ଝାଡ଼ଖଣ୍ଡରେ ଅଟୋ ଧକ୍କା କରି ଅତିରିକ୍ତ ଜିଲା ବିଚାରପତି ଉତ୍ତମ ଆନନ୍ଦଙ୍କ ହତ୍ୟା ଘଟଣାରେ ସୁପ୍ରିମ୍କୋର୍ଟରେ ଉଦ୍ବେଗ ପ୍ରକାଶ ପାଇଛି। ସୁପ୍ରିମ୍କୋର୍ଟ ପ୍ରଧାନ ବିଚାରପତି(ସିଜେଆଇ) ଏନ.ଭି. ରାମନା କହିଛନ୍ତି ଯେ ସେ ଏ ସମ୍ପର୍କରେ ଝାଡ଼ଖଣ୍ଡ ହାଇକୋର୍ଟଙ୍କ ସହ କଥା ହୋଇଛନ୍ତି । ଏହି ମାମଲାରେ ଦୃଢ଼ ପଦକ୍ଷେପ ଗ୍ରହଣ କରାଯିବ ବୋଲି ଆଶ୍ୱାସନା ଦେଇଛନ୍ତି। ଉତ୍ତମ ଆନନ୍ଦ ମର୍ନିଂ ଓ୍ବାର୍କ କରିବା ସମୟରେ ପଛପଟୁ ଏକ ଅଟୋ ତାଙ୍କୁ ଧକ୍କା ଦେଇଥିବା ସିସିଟିଭିରୁ ମିଳିଥିବା ଭିଡ଼ିଓରେ ଦେଖିବାକୁ ମିଳୁଛି। ତଦନ୍ତ ପରେ ଜଣାପଡ଼ିଛି ଯେ ହତ୍ୟାରେ ବ୍ୟବହୃତ ହୋଇଥିବା ଅଟୋ ଚୋରି ହୋଇଯାଇଛି। ପୂର୍ବରୁ ଏନେଇ ପୋଲିସ ଷ୍ଟେସନରେ ମଧ୍ୟ ଅଭିଯୋଗ କରାଯାଇଥିଲା। ଏହି ମାମଲାରେ ଉତ୍ତମ ଆନନ୍ଦଙ୍କ ପତ୍ନୀ କ୍ରିତି ସିହ୍ନା ଧାନବାଦ ପୋଲିସ ଷ୍ଟେସନରେ ଅଜ୍ଞାତ ବ୍ୟକ୍ତିଙ୍କ ବିରୋଧରେ ଏଫ୍ଆଇଆର ଦାଖଲ କରିଛନ୍ତି। ସିସିଟିଭି ଫୁଟେଜରେ ଏହା ସ୍ପଷ୍ଟ ଭାବେ ଦୃଶ୍ୟମାନ ହେଉଛି ଯେ ଉତ୍ତମଙ୍କୁ ଜାଣିଶୁଣି ଧକ୍କା ଦିଆଯାଇଛି। ଏହି ପ୍ରସଙ୍ଗରେ ଝାଡଖଣ୍ଡ ହାଇକୋର୍ଟ ପୋଲିସ ବିଭାଗଠାରୁ ରିପୋର୍ଟ ଲୋଡିଛନ୍ତିି। ହତ୍ୟା ଘଟଣାର ତଦନ୍ତ ପାଇଁ ଏସ୍ପି ସଞ୍ଜିବ କୁମାର ସିଟି ଏସ୍ପି ରାମ କୁମାରଙ୍କ ନେତୃତ୍ୱରେ ଏକ ଏସ୍ଆଇଟି ଗଠନ କରିଛନ୍ତି। ଏହି ପରିପ୍ରେକ୍ଷୀରେ ଫୋରେନସିକ ଟିମ ମଧ୍ୟ ଅଟୋ ପରୀକ୍ଷା କରିବା ପରେ ନମୁନା ସଂଗ୍ରହ କରିଛନ୍ତି। ଅଟୋରେ ଫିଙ୍ଗର ପ୍ରିଣ୍ଟ ସହିତ ଅନ୍ୟାନ୍ୟ ପ୍ରମାଣର ଯାଞ୍ଚ କରାଯାଇଛି। ଜବତ ହୋଇଥିବା ଅଟୋ ନମ୍ବର ପ୍ଲେଟରୁ ନମ୍ବର ଲିଭାଇ ଦିଆଯାଇଛି। ଅପରାଧୀ ଜାଣିଶୁଣି ଏଭଳି କରିଥିବା ପୋଲିସ ଟିମ୍ ସନ୍ଦେହ କରୁଛନ୍ତି।
