ଭୁବନେଶ୍ୱର, ୨୧।୩(ବ୍ୟୁରୋ):ଗତବର୍ଷ ବୌଦ୍ଧ ବନଖଣ୍ଡର ବୌଦ୍ଧ ରେଞ୍ଜ ଅନ୍ତର୍ଗତ ବଘିଆପଡ଼ା ସେକ୍ସନରେ ଦୁଇଟି ଦନ୍ତା ହାତୀର କଙ୍କାଳ ଗଳିତ ଅବସ୍ଥାରେ ମିଳିଥିଲା। ପ୍ରଥମେ ଜୁନ ୨୩ରେ ଜାମୁଖୋଲ ସଂରକ୍ଷିତ ଜଙ୍ଗଲରେ ଗୋଟିଏ ଓ ଜୁନ୍ ୨୫ରେ ବାଙ୍କୀମୁଣ୍ଡି ସଂରକ୍ଷିତ ଜଙ୍ଗଲରେ ଅନ୍ୟଏକ ପ୍ରାପ୍ତବୟସ୍କ ଦନ୍ତାହାତୀର କଙ୍କାଳ ଉଦ୍ଧାର କରାଯାଇଥିଲା। ଉଭୟ ହାତୀଙ୍କର ଶୁଣ୍ଢ ସହିତ ଦାନ୍ତ ମଧ୍ୟ କଟାଯାଇଥିଲା। ଶିକାରୀମାନେ ହାତୀକୁ ମାରିବା ପରେ ତା’ ଦାନ୍ତ କାଟିବା ପାଇଁ ନିଷ୍ଠୁର ଭାବରେ ତା’ର ଶୁଣ୍ଢକୁ କାଟିଦେଇଥିଲେ। ସେହିପରି ଗତବର୍ଷ ଜୁଲାଇ ୭ରେ ସମ୍ବଲପୁର ଅଇଁଠାପାଲି ନିକଟରେ ଦୁଇଟି ହାତୀଦାନ୍ତ ଜବତ ହୋଇଥିଲା। ତେବେ ସେହିଦିନ ସମ୍ବଲପୁର ଡିଏଫ୍ଓଙ୍କ ସହିତ ମିଳିତ ଖବରଦାତା ସମ୍ମିଳନୀରେ ବୌଦ୍ଧ ଡିଏଫ୍ଓ କହିଥିଲେ, ଜବତ ହାତୀ ଦାନ୍ତ ଦୁଇଟି ବାଙ୍କୀମୁଣ୍ଡି ସଂରକ୍ଷିତ ଜଙ୍ଗଲରେ ମିଳିଥିବା ମୃତହାତୀର ବୋଲି ଅନୁମାନ କରାଯାଉଛି। ସମ୍ବଲପୁରରୁ ଜବତ ହାତୀଦାନ୍ତ ବୌଦ୍ଧରୁ ଶିକାର ହୋଇଥିବା ହାତୀର ବୋଲି ନିଶ୍ଚିତ କରିବା ପାଇଁ ଜବତ ହାତୀଦାନ୍ତ ଏବଂ ବାଙ୍କୀମୁଣ୍ଡି ସଂରକ୍ଷିତ ଜଙ୍ଗଲରେ ମିଳିଥିବା ହାତୀ ଶରୀରର ନମୁନାକୁ ଡିଏନ୍ଏ ମ୍ୟାଚିଂ ପାଇଁ ପଠାଯାଇଥିବା ସେମାନେ ସୂଚନା ଦେଇଥିଲେ। ହେଲେ ୭ମାସ ବିତିଯାଇଥିଲେ ସୁଦ୍ଧା ଏ ପର୍ଯ୍ୟନ୍ତ କୌଣସି ଡିଏନ୍ଏ ରିପୋର୍ଟ ଆସିଲା ନାହିଁ। ଏପରିକି ସେହି ଡିଏନ୍ଏ ମ୍ୟାଚିଂ ତଥ୍ୟକୁ ସୂଚନା ଅଧିକାର ଆଇନରେ ମାଗିଲେ ମଧ୍ୟ ବୌଦ୍ଧ ଡିଏଫ୍ଓ ଦେଉ ନ ଥିବା ଅଭିଯୋଗ ଉଠୁଛି। ଅନେକ କ୍ଷେତ୍ରରେ ଡିଏନ୍ଏ ଟେଷ୍ଟ ରିପୋର୍ଟ ୫ଦିନ ମଧ୍ୟରେ ଆସୁଥିବାବେଳେ ଏ କ୍ଷେତ୍ରରେ କାହିଁକି ମାସ ମାସ ବିତୁଛି ବୋଲି ସୂଚନା ଅଧିକାର କର୍ମୀମାନେ ପ୍ରଶ୍ନ କରିଛନ୍ତି। ରଞ୍ଜନ ଦାସ ନାମକ ଜଣେ ବ୍ୟକ୍ତି ଗତବର୍ଷ ଡିସେମ୍ବର ୧୬ରେ ଏହି ଡିଏନ୍ଏ ମ୍ୟାଚିଂ ରିପୋର୍ଟ ଆଦି ସମ୍ପର୍କରେ ଜାଣିବା ପାଇଁ ସୂଚନା ଅଧିକାର ଆଇନ ୨୦୦୫ ବଳରେ ତଥ୍ୟ ମାଗିଥିଲେ। ହେଲେ ତଦନ୍ତ ଚାଲିଛି ବୋଲି କହି ବୌଦ୍ଧ ଡିଏଫ୍ଓ ତଥ୍ୟ ଦେବାକୁ ମନା କରି ଦେଇଛନ୍ତି। ଏହି ଘଟଣା ବଲାଙ୍ଗୀରରେ ମୃତ କେନ୍ଦୁପତ୍ର ତୋଳାଳିଙ୍କ କ୍ଷତିପୂରଣ ଟଙ୍କା ଆତ୍ମସାତ୍ କରିଥିବା ବୌଦ୍ଧ ଡିଏଫ୍ଓଙ୍କୁ ଆହୁରି ସନ୍ଦେହ ଘେରକୁ ଟାଣି ନେଇଛି।
ସମ୍ପର୍କରେ ଖୋର୍ଦ୍ଧା ଜିଲାର ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ କହିଛନ୍ତି, ଯଦି ସମ୍ବଲପୁରରୁ ଜବତ ହାତୀଦାନ୍ତ ଏବଂ ବାଙ୍କୀମୁଣ୍ଡି ସଂରକ୍ଷିତ ଜଙ୍ଗଲରେ ମିଳିଥିବା ମୃତ ହାତୀର ନମୁନା ଡିଏନ୍ଏ ମ୍ୟାଚିଂ ନ କରେ, ତେବେ ଡିଏଫ୍ଓଙ୍କୁ ଅବିଳମ୍ବେ ଗିରଫ କରାଯିବା ସହିତ କ୍ରାଇମବ୍ରାଞ୍ଚକୁ ମାମଲା ଦେବା ଉଚିତ।
