ଭଞ୍ଜନଗର,୩।୧୨(ଡି.ଏନ.ଏ): ସ୍ବଚ୍ଛ ଭାରତ ଅଭିଯାନ ଯୋଜନାରେ ବିଭିନ୍ନ ବ୍ୟକ୍ତିବିଶେଷ, ଅନୁଷ୍ଠାନ ଆଦିଙ୍କୁ ପୁରସ୍କୃତ କରାଯାଉଛି । ଏଥିସହ ସହରଗୁଡ଼ିକରେ ୧୭ଟି ବିଭାଗରେ ପ୍ରଥମ, ଦ୍ୱିତୀୟ ଏବଂ ତୃତୀୟ ପୁରସ୍କାର ମିଳୁଛି । ଯୋଜନା ଆରମ୍ଭ ହେବାର ୮ବର୍ଷ ପରେ ଭଞ୍ଜନଗର ଏନ୍ଏସି ସବୁ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ୨୦୨୨ରେ ପୂର୍ବାଞ୍ଚଳ ଜୋନରେ ୧୦୧ଟି ସହର ମଧ୍ୟରେ ଦ୍ୱିତୀୟ ଶ୍ରେଷ୍ଠ ଏନଏସି ପୁରସ୍କାର ପାଇବାକୁ ଯୋଗ୍ୟ ବିବେଚିତ ହୋଇଛି। ଏନ୍ଏସିକୁ ଏହି ପୁରସ୍କାର କେନ୍ଦ୍ର ସରକାରଙ୍କ ସ୍ବଚ୍ଛ ଭାରତ ଅଭିଯାନ ପକ୍ଷରୁ ରାଜ୍ୟସ୍ତରରେ ହେବାକୁ ଥିବା ସ୍ବତନ୍ତ୍ର କାର୍ଯ୍ୟକ୍ରମରେ ମିଳିବ। ଗତ ୨୧ ତାରିଖରେ ଏ ସମ୍ପର୍କିତ ଏକ ଚିଠି ଏନ୍ଏସିକୁ ଆସିଛି। ଅନ୍ୟପକ୍ଷରେ ପ୍ରତିବର୍ଷ ଜଣେ କଳାକାରଙ୍କୁ ସହରରେ ସ୍ବଚ୍ଛ ଆମ୍ବାସାଡ଼ାର ଭାବେ ନିଯୁକ୍ତି ଦେବା ଲାଗି ସ୍ବଚ୍ଛ ଭାରତ ଯୋଜନାରେ ବ୍ୟବସ୍ଥା ରହିଛି ।ଗୁରୁବାର ଓଡ଼ିଆ ଚଳଚ୍ଚିତ୍ର ଅଭିନେତା ଆଶିଷ କୁମାରଙ୍କୁ ୨୦୨୩ ପାଇଁ ଭଞ୍ଜନଗର ଏନଏସିର ସ୍ବଚ୍ଛ ଆମ୍ବାସାଡ଼ାର ଭାବେ ନିଯୁକ୍ତି ଦିଆଯାଇଛି । ସୂଚନାଯୋଗ୍ୟ, ଦେଶରେ ୪ଟି ଜୋନରେ ୪,୩୫୪ଟି ସହର ଥିବା ବେଳେ ପୂର୍ବାଞ୍ଚଳ ଜୋନ୍ରେ ୧୫ ହଜାରରୁ ୨୫ ହଜାର ମଧ୍ୟରେ ଳୋକ ବସବାସ କରୁଥିବା ୧୦୧ଟି ସହର ଅଛି। ଉକ୍ତ ୧୦୧ଟି ସହର ମଧ୍ୟରେ ଉଲ୍ଲେଖନୀୟ ଅବଦାନ ପାଇଁ ଭଞ୍ଜନଗର ଏନଏସି ଦ୍ୱିତୀୟ ହୋଇଛି । ପୂର୍ବରୁ ବେଲଗୁଣ୍ଠା ଏନ୍ଏସି ୨୦୨୨ ପାଇଁ ପୂର୍ବାଞ୍ଚଳ ଜୋନରେ ୧୫ ହଜାରରୁ କମ୍ ଜନସାଧାରଣ ବିଶିଷ୍ଠ ସହରରେ ଶ୍ରେଷ୍ଠ ସିଟିଜେନ୍ ଫିଡ଼୍ବ୍ୟାକ ପୁରସ୍କାର ପାଇଥିଲା ା ବର୍ତ୍ତମାନ ଭଞ୍ଜନଗର ଏନ୍ଏସିକୁ ସଫଳତା ମିଳିଥିବାରୁ ୨୦୨୩ରେ ଯେଭଳି ଆହୁରି ଅଧିକ ପୁରସ୍କାର ମିଳିବ ସେଥିପାଇଁ ପ୍ରସ୍ତୁତି ଆରମ୍ଭ ହେଲାଣି। ସ୍ଥାନୀୟ ବିଧାୟକ ତଥା ବାଚସ୍ପତି ବିକ୍ରମ କେଶରୀ ଆରୁଖଙ୍କ ଉଦ୍ୟମକ୍ରମେ ଏନ୍ଏସି ଅଧ୍ୟକ୍ଷ ଗୋପବନ୍ଧୁ ମହାପାତ୍ରଙ୍କ ସମେତ ସମସ୍ତ କାଉନସିଲର ଏଥିଲାଗି ପ୍ରଚେଷ୍ଠା ଚଳାଇଛନ୍ତି। କାଉନସିଲରମାନେ ଦୈନନ୍ଦିନ ନିର୍ବାହୀ ଅଧିକାରୀ ଏବଂ ଅନ୍ୟାନ୍ୟ ଅଧିକାରୀଙ୍କୁ ନେଇ ବିଭିନ୍ନ ୱାର୍ଡ଼ ବୁଲି ଲୋକଙ୍କ ସହ ସମସ୍ୟା ନେଇ ଆଲୋଚନା କରୁଛନ୍ତି । ଏହାପରେ ତାର ସମାଧାନ ପାଇଁ ଉଦ୍ୟମ ହେଉଛି। ସହର କିଭଳି ଅଧିକ ସୁନ୍ଦର ହୋଇପାରିବ ସେଥିପାଇଁ ପଦକ୍ଷେପ ନିଆଯାଉଛି। ଭଞ୍ଜନଗର ଏନ୍ଏସିକୁ ୧୯୯୨ରେ ରାଜ୍ୟ ସରକାରଙ୍କ ପକ୍ଷରୁ ଶ୍ରେଷ୍ଠ ଏନଏସି ପୁରସ୍କାର ମିଳିଥିଲା। ଏନ୍ଏସି ନିର୍ବାହୀ ଅଧିକାରୀ ଆଶୁତୋଷ ଗୌରବକର କହିଛନ୍ତି, ପୁରସ୍କାର ପାଇବା ପାଇଁ ଭଞ୍ଜନଗର ସହର ଚୟନ ହେବା ଅଞ୍ଚଳବାସୀଙ୍କ ପାଇଁ ଗର୍ବର ବିଷୟ। ଆଗାମୀ ଦିନରେ ସହରବାସୀଙ୍କୁ ଆହୁରି ଅଧିକ ଉନ୍ନତ ସେବା କିଭଳି ପ୍ରଦାନ କରାଯିବ ସେଥିପାଇଁ ପଦକ୍ଷେପ ନିଆଯାଉଛି । ଅନ୍ୟପକ୍ଷରେ ଭାଜପା ଘୁମୁସର ସାଙ୍ଗଠନିକ ଜିଲା ଉପ ସଭାପତି ସନ୍ତୋଷ ତିଆଡ଼ି କହିଛନ୍ତି, ପୁରସ୍କାର ମିଳିବା ଭଲକଥା । ଆଗକୁ ସହରବାସୀ କିଭଳି ଉନ୍ନତ ସେବା ପାଇବେ ସେଥିପ୍ରତି ଦୃଷ୍ଟି ଦେବା ଆବଶ୍ୟକ। ପିସିସି ସଭ୍ୟ ଦେବୀ ବିଷୋୟୀ କଟାକ୍ଷ କରିଛନ୍ତି ଯେ ଗତ ପୌର ନିର୍ବାଚନରେ ଭାଜପା-ବିଜେଡ଼ି ଭାଇ ଭାଇ ଭଳି ଲଢ଼େଇ କଲେ। ପୁରସ୍କାର ମିଳିବା ବଡ଼କଥା ନହେଁ ।
