ଅନୁଗୋଳ,୧୫।୫(ଅମିତ କୁମାର ସାମଲ):ଅନୁଗୋଳ ଗସ୍ତରେ ଆସିଥିବା ୫-ଟି ଅଧ୍ୟକ୍ଷ ତଥା ବିଜେଡିର ବରିଷ୍ଠ ନେତା କାର୍ତ୍ତିକ ପାଣ୍ଡିଆନ ମଙ୍ଗଳବାର ଶୈଳଶ୍ରୀକ୍ଷେତ୍ରରେ ଜଗନ୍ନାଥ ଓ ଏହାପରେ ମା’ ବୁଢ଼ୀ ଠାକୁରାଣୀଙ୍କୁ ଦର୍ଶନ କରିଥିଲେ। ପରେ ସ୍ଥାନୀୟ ସଭାଘର ଠାରେ ଆୟୋଜିତ ଅଭିଯୋଗ ଗ୍ରହଣ ଓ କର୍ମୀ ସମ୍ମିଳନୀରେ ଯୋଗଦେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ କଡ଼ା ସମାଲୋଚନା କରିଥିଲେ। ଭାଜପା ରଖିଥିବା ନିର୍ବାଚନୀ ଇସ୍ତାହାର ଓଡ଼ିଶାକୁ ୨୫ ବର୍ଷ ପଛକୁ ନେଇଯିବ। ଭାଜପାର ନେତାମାନେ ଆସି ମହିଳାଙ୍କୁ ୫୦ ହଜାର ଟଙ୍କାର ଭାଉଚର ଦେବାକୁ କହୁଛନ୍ତି। ପୂର୍ବରୁ ପ୍ରତି ଲୋକଙ୍କ ନିକଟକୁ ୧୫ ଲକ୍ଷ ଟଙ୍କା ଯେଉଁଭଳି ଆସିଥିଲା, ସେହିଭଳି ୫୦ ହଜାର ପଠାଇବେ ବୋଲି ପାଣ୍ଡିଆନ କଟାକ୍ଷ କରିଥିଲେ। ତେଣୁ ଆସନ୍ତା ନିର୍ବାଚନରେ ବିଜୁ ଜନତା ଦଳର ଢେଙ୍କାନାଳ ଲୋକ ସଭା ପ୍ରାର୍ଥୀ ଡା. ଅବିନାଶ ସାମଲ ଓ ଅନୁଗୋଳ ବିଧାୟକ ପ୍ରାର୍ଥତ୍ନୀ ସଂଯୁକ୍ତା ସିଂହଙ୍କୁ ଭୋଟ ଦେବାକୁ ନିବେଦନ କରିଥିଲେ।
ସଭାଘରଠାରେ ଆୟୋଜିତ ଅଭିଯୋଗ ଗ୍ରହଣ ଓ କର୍ମୀ ସମ୍ମିଳନୀରେ ପାଣ୍ଡିଆନ ଲୋକମାନଙ୍କଠାରୁ ଅଭିଯୋଗ ପତ୍ର ଗ୍ରହଣ କରିଥିଲେ। ନିର୍ବାଚନ ଆଚରଣବିଧି ଲାଗୁ ରହିଥିବାରୁ ଏବେ କିଛି କହିହେଉନି। ତଥାପି ଲୋକମାନଙ୍କ ସମସ୍ୟା ଦୂର କରିବାକୁ କାର୍ଯ୍ୟ କରାଯାଉଛି ବୋଲି ସେ କହିଥିଲେ। ଭାଜପାର ନେତାମାନେ ଆସି ବଡ଼ ବଡ଼ ଭାଷଣ ଦେଉଛନ୍ତି। ତାଙ୍କୁ ପଚାରନ୍ତୁ, କେଉଁ ରାଜ୍ୟରେ ଜାଗା ମିଶନ କେଉଁଠାରେ କାର୍ଯ୍ୟକାରୀ ହୋଇଛି। ସହରାଞ୍ଚଳରେ ଥିବା ଜମିକୁ ଗରିବ ଜନସାଧାରଣଙ୍କୁ ସେମାନେ ପଟ୍ଟା ଦେଇଛନ୍ତି ବୋଲି ପ୍ରଶ୍ନ କରିଥିଲେ। ଏହି କାର୍ଯ୍ୟକ୍ରମ କେବଳ ନବୀନ ବାବୁ ହିଁ କରିପାରିବେ। ମହାପ୍ରଭୁଙ୍କ ଆଶୀର୍ବାଦ ଓ ଆପଣମାନଙ୍କ ଆଶୀର୍ବାଦ ପାଇ ମୁଖ୍ୟମନ୍ତ୍ରୀ ଜୁନ ୯ରେ ଦାୟିତ୍ୱ ଗ୍ରହଣ କରିବେ। ଏହାପରେ ପ୍ରଥମ ଦସ୍ତଖତ ବିଜୁଳି ବିଲ୍ ଛାଡ଼ ପାଇଁ କରାଯିବ। ଶିକ୍ଷା ପାଇଁ ଛାତ୍ରୀଛାତ୍ରଙ୍କୁ ବୃତ୍ତି ପ୍ରଦାନ କରାଯାଉଛି। ଏହି ବୃତ୍ତି ନବୀନବାବୁଙ୍କ ସରକାର ପ୍ରଦାନ କରୁଛି। ଏହି ଅଞ୍ଚଳର ଜଣେ ନେତା କେନ୍ଦ୍ରରେ ଶିକ୍ଷାମନ୍ତ୍ରୀ ରହିଛନ୍ତି। ତାଙ୍କୁ ପଚାରନ୍ତୁ, କେତେ ପ୍ରତିଶତ ଛାତ୍ରୀଛାତ୍ରଙ୍କୁ ସେମାନେ ଛାତ୍ର ବୃତ୍ତି ଦେଉଛନ୍ତି। ଯଦି ନୂଆ ଓଡ଼ିଶା ଓ ସଶକ୍ତ ଓଡ଼ିଶା ଗଠନ କରିବାର ଅଛି, ତେବେ ଛାତ୍ରୀଛାତ୍ରଙ୍କ ସ୍ବପ୍ନ ପୂରଣ କରିବାକୁ ପଡ଼ିବ। ଏଥିପାଇଁ ସମସ୍ତଙ୍କୁ କାମ କରିବାକୁ ପଡ଼ିବ ବୋଲି ପାଣ୍ଡିଆନ କହିଥିଲେ। ଏହି କାର୍ଯ୍ୟକ୍ରମରେ ତାଳଚେର ବିଧାୟକ ପ୍ରାର୍ଥୀ ବ୍ରଜ କିଶୋର ପ୍ରଧାନ, ଛେଣ୍ଡିପଦା ବିଧାୟକ ପ୍ରାର୍ଥୀ ସୁଶାନ୍ତ କୁମାର ବେହେରା, ବିଜେଡି ଜିଲା ସଭାପତି ମହେନ୍ଦ୍ର ବସ୍ତିଆ ପ୍ରମୁଖ ଉପସ୍ଥିତ ଥିଲେ।
