ମୁମ୍ବାଇ,୭।୧୧: ବଲିଉଡ୍ ସୁପରଷ୍ଟାର ଶାହରୁଖ ଖାନଙ୍କ ପୁଅ ଆର୍ଯ୍ୟନଙ୍କୁ ଟଙ୍କା ପାଇଁ ଅପହରଣ କରାଯାଇଥିଲା। କିନ୍ତୁ ଏହି ଯୋଜନାରେ ସବୁ କିଛି ଭଣ୍ଡୁର କରି ଦେଇଥିଲା ସେଲ୍ଫି। ଭାଜପା ନେତା ମୋହିତ କାମ୍ବୋଜ ରଚିଥିବା ଅପହରଣ ଯୋଜନାର ଅଂଶ ଥିଲେ ନାର୍କୋଟିକ କଣ୍ଟ୍ରୋଲ ବ୍ୟୁରୋ (ଏନ୍ସିବି)ର ଜୋନାଲ ମୁଖ୍ୟ ସମୀର ଓ୍ବାଙ୍ଖଡେ। ଏଭଳି ଗୁରୁତର ଅଭିଯୋଗ ଆଣିଛନ୍ତି ମହାରାଷ୍ଟ୍ର ମନ୍ତ୍ରୀ ନଓ୍ବାବ ମଲିକ।
ମୁମ୍ବାଇ ଉପକୂଳରେ ଏକ କ୍ରୁଜ ଉପରେ ଓ୍ବାଙ୍ଖଡେଙ୍କ ଦଳର ଚଢ଼ାଉ ପରେ ୨୩ ବର୍ଷୀୟ ଆର୍ଯ୍ୟନଙ୍କୁ ଗିରଫ କରାଯାଇଥିଲା, ଯେଉଁଥିରେ ଡ୍ରଗ୍ସ ଜବତ ହୋଇଥିବା ଅଭିଯୋଗ ହୋଇଛି। ପରେ ତାଙ୍କୁ ବମ୍ବେ ହାଇକୋର୍ଟ ଜାମିନ ପ୍ରଦାନ କରିଥିଲେ।
”କୋର୍ଟରେ କୁହାଯାଇଥିଲା ଯେ, ଆର୍ଯ୍ୟନ କ୍ରୁଜରେ ଚଢ଼ିବା ପାଇଁ ଟିକେଟ୍ କିଣି ନ ଥିଲେ। ପ୍ରତିକ ଗାବା ଓ ଅମିର ଫର୍ନିଚରଓ୍ବାଲାଙ୍କ କାରଣରୁ ସେ କ୍ରୁଜକୁ ଯାଇଥିଲେ। ମୁଁ କହିବାକୁ ଚାହୁଁଛି ଯେ, ଏହା ଏକ ସିଧାସଳଖ ଟଙ୍କା ପାଇଁ ଅପହରଣ ଘଟଣା। ଆର୍ଯ୍ୟନଙ୍କୁ କ୍ରୁଜକୁ ନିଆଯିବା ପରେ ଟଙ୍କା ପାଇଁ ଅପହରଣ ଖେଳ ଆରମ୍ଭ ହୋଇଥିଲା। କିନ୍ତୁ ସବୁ କିଛି ବିଗାଡ଼ି ଦେଇଥିଲେ ସେଲ୍ଫି। ଏହା ହେଉଛି ଘଟଣା ପଛର ସତ୍ୟତା“ ବୋଲି ଏକ ଖବରଦାତା ସମ୍ମିଳନୀରେ ନଓ୍ବାବ କହିଛନ୍ତି। ଉଲ୍ଲେଖଯୋଗ୍ୟ, ଚଢ଼ାଉ ଦିନ ଅର୍ଥାତ ଅକ୍ଟୋବର ୨ ତାରିଖରେ ଆର୍ଯ୍ୟନଙ୍କ ସହ ଏନ୍ସିବିର ସ୍ବାଧୀନ ସାକ୍ଷୀ ଗୋସାବିଙ୍କ ସେଲ୍ଫି ଭାଇରାଲ ହୋଇଥିଲା।
ମହାରାଷ୍ଟ୍ର ସରକାରଙ୍କୁ ବଦନାମ କରିବା ପାଇଁ ଭାଜପା ନେତା ମୋହିତ କାମ୍ବୋଜ କ୍ରୁଜ ପାର୍ଟି ଆୟୋଜକ କଶିଫ ଖାନଙ୍କ ସହ ମିଶି ଏକ ଯୋଜନା ପ୍ରସ୍ତୁତ କରିଥିଲେ। ରାଜ୍ୟ ମନ୍ତ୍ରୀ ଅସଲମ ଶେଖ ଓ କିଛି ମନ୍ତ୍ରୀଙ୍କ ଛୁଆଙ୍କୁ କ୍ରୁଜକୁ ଆଣି ଡ୍ରଗ୍ସ ମାମଲାରେ ଫସାଇବା ଥିଲା ଯୋଜନାର ଉଦ୍ଦେଶ୍ୟ। କିନ୍ତୁ ଏହା ସଫଳ ହୋଇ ନ ଥିଲା ବୋଲି ନଓ୍ବାବ କହିଛନ୍ତି।
