ନୂଆଦିଲ୍ଲୀ,୧୦ ।୯: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ପଞ୍ଜାବର ଆମ ଆଦମୀ ପାର୍ଟି(ଏଏପି) ସରକାରଙ୍କ ପ୍ରଶଂସା କରି କହିଛନ୍ତି, ଯେଉଁଠି ଗୋଟିଏ ପଟେ ସାରା ଦେଶରେ ଅନ୍ୟ ସରକାର ସରକାରୀ ଚାକିରି ଦେଇ ପାରୁ ନାହାନ୍ତି ଫଳରେ ଠିକା କର୍ମଚାରୀଙ୍କୁ ଭର୍ତ୍ତି କରୁଛନ୍ତି ସେଠି ପଞ୍ଜାବର ଏଏପି ସରକାର ଠିକା କର୍ମଚାରୀଙ୍କ ଚାକିରିକୁ ସ୍ଥାୟୀ କରିବା ଆରମ୍ଭ କରିଛି । ଏଏପିର ସଂଯୋଜକ କହିଛନ୍ତି ପଞ୍ଜାବ ମୁଖ୍ୟମନ୍ତ୍ରୀ ଭଗୱତ ମାନ ସେପ୍ଟେମ୍ବର ୫ ଅର୍ଥାତ ଗୁରୁ ଦିବସରେ ଏକ ମହତ୍ୱପୂର୍ଣ୍ଣ ଘୋଷଣା କରିଥିଲେ । ଏହି ଘୋଷଣା କେବଳ ପଞ୍ଜାବ ପାଇଁ ନୁହେଁ ବରଂ ସାରା ଦେଶ ପାଇଁ ଲାଗୁ ହୋଇପାରିବ । ଏହା ସାରା ଦେଶ ଓ ଅର୍ଥବ୍ୟବସ୍ଥା ପାଇଁ ମହତ୍ୱପୂର୍ଣ୍ଣ ବୋଲି ସେ କହିଛନ୍ତି । ମାନ ୮୭୩୬ ଠିକା ଶିକ୍ଷକଙ୍କୁ ସ୍ଥାୟୀ ନିଯୁକ୍ତି ଦେବାକୁ ଘୋଷଣା କରିଥିଲେ ।
ଦେଶରେ ସବୁବେଳେ ସରକାରୀ ଚାକିରି ଶେଷ କରିବାକୁ କୁହାଯାଉଥିବା ବେଳେ ଭଗୱତ ମାନ ୮୭୩୬ ଠିକା ଶିକ୍ଷକଙ୍କୁ ସ୍ଥାୟୀ କରିବା ଏକ ଉଦାହରଣ । ଏଥିପାଇଁ ଅବଶ୍ୟ ସାମାନ୍ୟ ସମୟ ଲାଗିବ । କାରଣ ତରବରିଆ ଭାବେ କଲେ ମାମଲା କୋର୍ଟକୁ ଚାଲିଯିବ । ଫଳରେ କର୍ମଚାରୀଙ୍କ ସହ ଅନ୍ୟାୟ ହେବ । ତେଣୁ ସମୟ ନେଇ ଏସବୁ କରିବାକୁ ପଡିବ ବୋଲି ମୁଖ୍ୟମନ୍ତ୍ରୀ କେଜରିୱାଲ କହିଛନ୍ତି ।
