ନୂଆଦିଲ୍ଲୀ,୧୫।୩: ଅଭିଜ୍ଞ ୱିକେଟକିପର ବ୍ୟାଟ୍ସମ୍ୟାନ୍ ଏବଂ ପାକିସ୍ତାନ କ୍ରିକେଟର ପୂର୍ବତନ ଅଧିନାୟକ ସରଫରାଜ ଅହମ୍ମଦ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି । ପ୍ରାୟ ଦୁଇ ଦଶନ୍ଧି ଧରି ପାକିସ୍ତାନ କ୍ରିକେଟର ସେବା କରିଥିବା ସରଫରାଜଙ୍କ ଏହି ନିଷ୍ପତ୍ତି ସହିତ ଏକ ଚମତ୍କାର କ୍ୟାରିୟରର ଅନ୍ତ ଘଟିଛି । କରାଚୀରେ ଜନ୍ମଗ୍ରହଣ କରିଥିବା ସରଫରାଜ ଅହମ୍ମଦ ଖେଳର ତିନୋଟି ଫର୍ମାଟରେ ପାକିସ୍ତାନର ପ୍ରତିନିଧିତ୍ୱ କରିଥିଲେ । ସେ ୫୪ ଟେଷ୍ଟ, ୧୧୭ ଦିନିକିଆ ଏବଂ ୬୧ଟି-20 ଅନ୍ତର୍ଜାତୀୟ ଖେଳିଥିଲେ । ଏହି ସମୟ ମଧ୍ୟରେ ସେ ୬ ଶତକ ଏବଂ ୩୫ ଅର୍ଦ୍ଧଶତକ ସହିତ ମୋଟ ୬,୧୬୪ରନ ସଂଗ୍ରହ କରିଥିଲେ। ଷ୍ଟମ୍ପ ପଛରେ ତାଙ୍କର ପ୍ରଦର୍ଶନ ସମାନ ପ୍ରଭାବଶାଳୀ ଥିଲା; ସେ ୩୧୫ କ୍ୟାଚ୍ ନେଇଥିଲେ ଏବଂ ୫୬ ଷ୍ଟମ୍ପିଂ କରିଥିଲେ ।
ପାକିସ୍ତାନର ଅଧିନାୟକତ୍ୱ ସମୟରେ, ସରଫରାଜ ଅହମ୍ମଦ ତିନୋଟି ଫର୍ମାଟରେ ମୋଟ ୧୦୦ଟି ଅନ୍ତର୍ଜାତୀୟ ମ୍ୟାଚ୍ ଖେଳି ଦଳର ନେତୃତ୍ୱ ନେଇଥିଲେ । ତାଙ୍କ ଅଧିନାୟକତ୍ୱରେ ପାକିସ୍ତାନ ଟି-୨୦ ରାଙ୍କିଙ୍ଗରେ ଏକ ନମ୍ବର ସ୍ଥାନକୁ ଉଠିଥିଲା। ତାଙ୍କ ନେତୃତ୍ୱରେ ପାକିସ୍ତାନ ଲଗାତାର ୧୧ଟି ଟି-୨୦ ସିରିଜ ଜିତି ବିଶ୍ୱ ରେକର୍ଡ ସ୍ଥାପନ କରିଥିଲା ଏବଂ ଛଅ ଥର ପ୍ରତିପକ୍ଷ ଦଳ ବିପକ୍ଷରେ କ୍ଲିନ୍ ସୁଇପ୍ ହାସଲ କରିଥିଲା।
ସରଫରାଜ ଅହମ୍ମଦଙ୍କ ଅଧିନାୟକତ୍ୱରେ ପାକିସ୍ତାନ ୨୦୧୭ ଆଇସିସି ଚାମ୍ପିଅନ୍ସ ଟ୍ରଫି ଟାଇଟଲ ଜିତି ଇତିହାସ ସୃଷ୍ଟି କରିଥିଲା। ଇଂଲଣ୍ଡର ଓଭାଲରେ ଖେଳାଯାଇଥିବା ଫାଇନାଲରେ ପାକିସ୍ତାନ ଟିମ୍ ଇଣ୍ଡିଆକୁ ୧୮୦ ରନରେ ପରାସ୍ତ କରିଥିଲା। ଏହି ବିଜୟ ସହିତ ସରଫରାଜ ଚାମ୍ପିଅନ୍ସ ଟ୍ରଫି ଜିତିବାର ଉଲ୍ଲେଖନୀୟ ସଫଳତା ହାସଲ କରିଥିବା ପ୍ରଥମ ପାକିସ୍ତାନୀ ଅଧିନାୟକ ହୋଇଥିଲେ। ଏହା ବ୍ୟତୀତ, ସେ ଏପର୍ଯ୍ୟନ୍ତ ଏକମାତ୍ର ପାକିସ୍ତାନୀ ଅଧିନାୟକ ଯିଏ ଜୁନିଅର ଏବଂ ସିନିୟର ସ୍ତରରେ ଆଇସିସି ଟାଇଟଲ ଜିତିଛନ୍ତି। ଏହା ପୂର୍ବରୁ, ସେ ୨୦୦୬ରେ ଆଇସିସି ୟୁ୧୯ ବିଶ୍ୱକପରେ ମଧ୍ୟ ପାକିସ୍ତାନକୁ ବିଜୟୀ କରାଇଥିଲେ। ସରଫରାଜଙ୍କ ଅଧିନାୟକତ୍ୱରେ ପାକିସ୍ତାନ ଦଳ ଫାଇନାଲରେ ଟିମ୍ ଇଣ୍ଡିଆକୁ ୩୮ ରନରେ ପରାସ୍ତ କରି ଚାମ୍ପିଅନ ହୋଇଥିଲା।
