ମୁମ୍ବାଇ,୨୪।୧: ଦେଶର ପ୍ରମୁଖ ଫୁଡ୍ସ ବ୍ରାଣ୍ଡ୍ ସିଲ୍ (ଏସ୍ଆଇଏଲ୍)କୁ ଆନୁଷ୍ଠାନିକ ଭାବେ ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟସ ଲିମିଟେଡ୍ (ଆର୍ସିପିଏଲ) ନିକଟରେ ଅଧିଗ୍ରହଣ କରିଥିବା ରିଲାଏନ୍ସ ଗ୍ରୁପ ପକ୍ଷରୁ ବିସ୍ତୃତ ଭାବେ ଘୋଷଣା କରାଯାଇଛି। ଏପରିକି ଗୁଣାତ୍ମକ ଖାଦ୍ୟ ସାମଗ୍ରୀ ପାଇଁ ସିଲ୍ ବର୍ତ୍ତମାନ ଆରସିପିଏଲ୍ର ବିସ୍ତୃତ ସମ୍ଭାରର ଏକ ଅଂଶବିଶେଷ ହେବ। ସେହିଭଳି କମ୍ପାନୀ ଉପଭୋକ୍ତା ଉତ୍ପାଦ କ୍ଷେତ୍ରରେ ନିଜର ସ୍ଥିତିକୁ ମଜଭୁତ କରିବା ଏବଂ ଭାରତୀୟ ଐତିହ୍ୟ ବ୍ରାଣ୍ଡ୍ଗୁଡିକୁ ପୁନର୍ଜୀବିତ କରିବା ଦିଗରେ ରିଲାଏନ୍ସ ରଣନୀତିର ଏହି ପଦକ୍ଷେପ ଏକ ଅଂଶବିଶେଷ ବୋଲି କୁହାଯାଉଛି।
ଏ ସମ୍ପର୍କରେ ଆରସିପିଏଲର ସିଇଓ କେତନ ମୋଦି କହିଛନ୍ତି, ଆମେ ଭବିଷ୍ୟତର ବ୍ୟବସାୟ ନିର୍ମାଣ କରିବାବେଳେ ଭାରତର ସଂସ୍କୃତି ଏବଂ ଐତିହ୍ୟକୁ ସଂରକ୍ଷିତ ରଖିବା ପାଇଁ ପ୍ରତିବଦ୍ଧ ରହିଛୁ। ସିଲ୍ ଫୁଡ୍ସର ଅଧିଗ୍ରହଣ ଆମକୁ ଭାରତୀୟ ଖାଦ୍ୟ ଓ ଖାଦ୍ୟସାମଗ୍ରୀଗୁଡିକୁ ଉପଭୋକ୍ତାଙ୍କ ପାଖରେ ନୂତନ ତଥା ଅଭିନବ ଫର୍ମାଟରେ ପହଞ୍ଚାଇବାରେ ସହାୟକ ହେବ। ସେହିପରି ଆରସିପିଏଲ ସିଲ୍ ବ୍ରାଣ୍ଡ୍ର ଗୁଣବତ୍ତା ଏବଂ ବିତରଣ ନେଟୱର୍କରେ ଉନ୍ନତି ଆଣିବ।
ଅପରପକ୍ଷରେ ସିଲ୍ ଫୁଡ୍ସର ଏମ୍ଡି ଅଜୟ ମାରିୱାଲା କହିଛନ୍ତି, ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟ ସହିତ ଯୋଡ଼ି ହୋଇ ସିଲ୍ ବ୍ରାଣ୍ଡ୍କୁ ଏକ ନୂତନ ପରିଚୟ ଦେବାକୁ ଆମେ ଉତ୍ସାହିତ ଅଛୁ। ଏହି ସହଭାଗିତା ସିଲ୍କୁ ଏକ ବ୍ୟାପକ ତଥା ଆଧୁନିକ ଗ୍ରାହକଙ୍କ ନିକଟରେ ପହଞ୍ଚାଇବାରେ ସହାୟକ ହେବ।
