ଏଓଆର୍‌ ନିଯୁକ୍ତ, ଦିଲ୍ଲୀ ଗଲା ରାଜସ୍ବ ଟିମ୍‌
10:15 amFebruary 10, 2021February 10, 2021 / 43

ଭୁବନେଶ୍ୱର, ୧୦ା୨(ବ୍ୟୁରୋ): ଆନ୍ଧ୍ରପ୍ରଦେଶ ସରକାର କୋଟିଆରେ ପଞ୍ଚାୟତ ନିର୍ବାଚନ କରାଇବା ପ୍ରସଙ୍ଗରେ ଓଡ଼ିଶା ସରକାର ସୁପ୍ରିମକୋର୍ଟରେ ରିଟ୍‌ ପିଟିଶନ କରିବାକୁ ପ୍ରସ୍ତୁତି ଚଳାଇଛନ୍ତି। ରାଜ୍ୟ ଆଇନ ବିଭାଗ ପକ୍ଷରୁ ଶିବଶଙ୍କର ମିଶ୍ରଙ୍କୁ ଆଡଭୋକେଟ୍‌ ଅନ୍‌ ରେକର୍ଡ (ଏଓଆର୍‌) ନିଯୁକ୍ତ କରାଯାଇଛି। ଇତିମଧ୍ୟରେ ତାଙ୍କୁ ଚିଠି ହୋଇଛି। ସେହିପରି କୋରାପୁଟ ଏଡିଏମ୍‌ଙ୍କ ନେତୃତ୍ୱରେ ରାଜସ୍ବ ବିଭାଗର ଏକ ଟିମ୍‌ ଦିଲ୍ଲୀ ଗସ୍ତ କରଛି। ସୁପ୍ରିମକୋର୍ଟରେ କିଭଳି ମାମଲା ଲଢ଼ାଯିବ ସେନେଇ ଏମାନେ ଆଲୋଚନା କରିବେ ବୋଲି ଜଣାପଡିଛି।
ଏହି ଘଟଣାକୁ ନେଇ ରାଜ୍ୟ ରାଜନୀତି ମଧ୍ୟ ଜୋର ଧରିଛି। ଭାଜପା ରାଜ୍ୟ ସଭାପତି ସମୀର ମହାନ୍ତି କହିଛନ୍ତି, ୧୯୩୬ ମସିହାରୁ କୋରାପୁଟ ଜିଲା ପଟ୍ଟାଙ୍ଗୀ ଅଞ୍ଚଳରେ କୋଟିଆ ପଞ୍ଚାୟତ ଓଡ଼ିଶା ଭୂଖଣ୍ଡରେ ରହିଛି। ହେଲେ ବର୍ତ୍ତମାନ ଆନ୍ଧ୍ର ସରକାର ସେଠାରେ ପଞ୍ଚାୟତ ନିର୍ବାଚନ କରିବାକୁ ମସୁଧା ଚଳାଇଛନ୍ତି। ଦୀର୍ଘଦିନ ଧରି ଦୁଇ ରାଜ୍ୟ ଭିତରେ ଏହି ବିବାଦ ଲାଗି ରହିଥିବା ବେଳେ ରାଜ୍ୟ ସରକାର କୋଟିଆରେ ସରକାରୀ ସୁବିଧା ପହଞ୍ଚାଇବାରେ ବିଫଳ ହୋଇଛନ୍ତି। ତେଣୁ ଏଭଳି ସମୟରେ ଓଡ଼ିଶା ସହ କୋଟିଆବାସୀଙ୍କ ଭାବାବେଗକୁ ସୁଦୃଢ଼ କରିବାକୁ ଏକ ପ୍ରତିନିଧିମଣ୍ଡଳୀ ବୁଧବାର କୋଟିଆ ଗସ୍ତ କରିବ ବୋଲି ସେ କହିଛନ୍ତି। ସେହିଭଳି ବିରୋଧୀ ଦଳ ନେତା ପ୍ରଦୀପ୍ତ ନାଏକ ଟୁଇଟ୍‌ ଯୋଗେ କହିଛନ୍ତି, ବୁଧବାର ସାରା ଦିନ କୋଟିଆ ଅଞ୍ଚଳବାସୀଙ୍କ ସହ କଟାଇବେ। ଲୋକଙ୍କ ସମସ୍ୟା କଥା ବୁଝିବେ ବୋଲି ସେ କହିଛନ୍ତି। ଏହାପରେ ସେଠାରେ ଭାଜପା ଟିମ୍‌ ଖବରଦାତା ସମ୍ମିଳନୀ କରିବେ ବୋଲି ସୂଚନା ଦେଇଛନ୍ତି।
କୋଟିଆରେ ଆନ୍ଧ୍ର ସରକାର ପଞ୍ଚାୟତ ନିର୍ବାଚନ ପ୍ରସ୍ତୁତି କରିବା ପରେ ରାଜ୍ୟ ପ୍ରଶାସନ ତତ୍ପରତା ଦେଖାଇଛି। ଗତ ସୋମବାର ଓଡ଼ିଶା ଗସ୍ତରେ ଆସିଥିବା ଆନ୍ଧ୍ର ବିଧାନସଭା କମିଟି ଏହି ଘଟଣାରେ ଉଭୟ ରାଜ୍ୟ ଆପୋସ ଆଲୋଚନା କରିବାର ଆବଶ୍ୟକତା ଥିବା କହିଯାଇଛନ୍ତି। ତେବେ ଏସବୁ ଭିତରେ କୋଟିଆ ପ୍ରସଙ୍ଗ କେଉଁଠି ପହଞ୍ଚୁଛି ତାକୁ ନେଇ ସାଧାରଣରେ ନାନା ପ୍ରକାର କଳ୍ପନାଜଳ୍ପନା ଆରମ୍ଭ ହୋଇଗଲାଣି।
କୋଟିଆ ପ୍ରସଙ୍ଗରେ ଗତ ସୋମବାର କଟକରେ ଆଡଭୋକେଟ ଜେନେରାଲଙ୍କ ସହ କୋରାପୁଟ ଏଡିଏମ୍‌ ଏବଂ ସରକାରୀ ଓକିଲ ମଧ୍ୟ ଆଲୋଚନା କରିଥିଲେ। ଏନେଇ ସରକାର ସୁପ୍ରିମକୋର୍ଟ ଯାଇପାରନ୍ତି ବୋଲି ଯାହା ଅନୁମାନ କରାଯାଉଥିଲା ତାହା ସତ ହୋଇଛି। ସୂଚନାଯୋଗ୍ୟ ଯେ, ଓଡ଼ିଶାର ୩ଟି ଗାଁରେ ଆନ୍ଧ୍ରପ୍ରଦେଶ ପଞ୍ଚାୟତ ନିର୍ବାଚନ ପାଇଁ ୩ ଗାଁରୁ ୧୫ଜଣ ପ୍ରାର୍ଥତ୍ପତ୍ର ଦାଖଲ କରିଥିଲେ।