ଭୁବନେଶ୍ୱର, ୯ା୯(ବ୍ୟୁରୋ): ରାଜ୍ୟର ସମସ୍ତ ଯୁକ୍ତ୩ ଡିଗ୍ରୀ କଲେଜ, ସେଲ୍ଫ ଫାଇନାସିଂ କଲେଜ ଓ ସଂସ୍କୃତ କଲେଜଗୁଡ଼ିକରେ ନାମଲେଖା ପାଇଁ ମଙ୍ଗଳବାରଠାରୁ ଆବେଦନ ଆରମ୍ଭ ହୋଇଛି। ଚଳିତବର୍ଷ କେବଳ ଅନ୍ଲାଇନରେ ଆବେଦନ ପ୍ରକ୍ରିୟା ଅନୁଷ୍ଠିତ ହେଉଛି। ପ୍ରଥମ ଦିନରେ ୧୩, ୦୬୨ ଜଣ ଛାତ୍ରୀଛାତ୍ର ନାମ ପଞ୍ଜୀକରଣ କରିଥିବାବେଳେ ୮,୫୦୦ରୁ ଅଧିକ ଆବେଦନ କରିଛନ୍ତି। ଛାତ୍ରୀଛାତ୍ରମାନେ www.dheodisha.gov.in/ www.samsodisha.gov.in ୱେବ୍ସାଇଟ୍ରେ କମନ ଆପ୍ଲିକେଶନ ଫର୍ମ(ସିଏଏଫ) ପୂରଣ କରି ଆବେଦନ କରିପାରିବେ। ଆବେଦନ ପାଇଁ ଆସନ୍ତା ୨୨ ରାତି ୧୧ଟା ୪୫ ପର୍ଯ୍ୟନ୍ତ ୱେବ୍ସାଇଟ୍ ଖୋଲା ରହିବ ବୋଲି ଉଚ୍ଚଶିକ୍ଷା ବିଭାଗ ସୂଚନା ଦେଇଛି।
ଅନ୍ୟପକ୍ଷରେ ୨୮ ତାରିଖ ପୂର୍ବାହ୍ଣ ୧୧ଟାରେ ପ୍ରଥମ ମେରିଟ ଲିଷ୍ଟ ପ୍ରକାଶ ପାଇବ। ଉକ୍ତଦିନଠାରୁ ଅକ୍ଟୋବର ୧ ରାତି ୧୧ଟା ୪୫ ପର୍ଯ୍ୟନ୍ତ ଛାତ୍ରୀଛାତ୍ର ସାମ୍ସ ଆକାଉଣ୍ଟରେ ଅନ୍ଲାଇନରେ ନାମଲେଖା ଫି’ ଦାଖଲ କରିବେ। ୨୯ ତାରିଖରୁ ଅକ୍ଟୋବର ୨ ମଧ୍ୟରେ ପ୍ରଥମ ପର୍ଯ୍ୟାୟ ନାମଲେଖା ହେବ। ୩ ତାରିଖ ସନ୍ଧ୍ୟାରେ ନାମଲେଖା ସମ୍ପର୍କିତ ତଥ୍ୟ ୱେବ୍ସାଇଟରେ ଉପଲବ୍ଧ ହେବ। ଅକ୍ଟୋବର ୮ରେ ଦ୍ୱିତୀୟ ପର୍ଯ୍ୟାୟ ମେରିଟ ଲିଷ୍ଟ ପ୍ରକାଶ ପାଇବ ଓ ଅକ୍ଟୋବର ୧୦ ତାରିଖ ମଧ୍ୟରେ ଛାତ୍ରୀଛାତ୍ର ଅନ୍ଲାଇନରେ ନାମଲେଖା ଫି’ ଦାଖଲ କରି ନାମ ଲେଖାଇବେ। ଏହି ପର୍ଯ୍ୟାୟ ନାମଲେଖା ସମ୍ପର୍କରେ ତଥ୍ୟ ଅକ୍ଟୋବର ୧୩ ସନ୍ଧ୍ୟାରେ ପ୍ରକାଶ ପାଇବ। ସେହିଭଳି ସ୍ପଟ୍ ଆଡ୍ମିଶନ ସମ୍ପର୍କରେ ଉଚ୍ଚଶିକ୍ଷା ବିଭାଗ ପକ୍ଷରୁ କଲେଜଗୁଡିକୁ ସ୍ବତନ୍ତ୍ର ଗାଇଡ୍ଲାଇନ ପଠାଯିବ। ଏଥର ନାମଲେଖା ପ୍ରକ୍ରିୟା ସମ୍ପୂର୍ଣ୍ଣ ଭାବେ ସାମ୍ସ ଇ-ଆଡ଼ମିଶନ ମାଧ୍ୟମରେ କରାଯାଉଥିବାରୁ ଛାତ୍ରୀଛାତ୍ରମାନେ ଅନ୍ୟ କୌଣସି କଲେଜ କିମ୍ବା ୱେବ୍ସାଇଟ ସୂଚନା ଉପରେ ବିଶ୍ୱାସ ନ କରିବାକୁ ବିଭାଗ ପରାମର୍ଶ ଦେଇଛି।
