ପୁରୀ ଅଫିସ,୨୧।୫: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିରୋଧରେ ହାଇକୋର୍ଟରେ ହୋଇଥିବା ଜନସ୍ବାର୍ଥ ମାମଲାର ଶୁଣାଣି ଚାଲିଛି। ମାମଲାର ଶୁଣାଣି ନ ସରିବା ପର୍ଯ୍ୟନ୍ତ ପ୍ରକଳ୍ପ କାର୍ଯ୍ୟ ଉପରେ ରହିତାଦେଶ ଜାରି ପାଇଁ ଆବେଦନକାରୀ ଦିଲୀପ ବରାଳ କୋର୍ଟଙ୍କୁ ନିବେଦନ କରିଛନ୍ତି। କୋର୍ଟରେ ମାମଲା ବିଚାରାଧୀନ ଥିବାବେଳେ ପ୍ରଶାସନ ଓ ଠିକା ସଂସ୍ଥା ଦିନରାତି ନିର୍ମାଣ କାର୍ଯ୍ୟ ଚଳାଇଛନ୍ତି। ଆମ୍ସାର୍ ଆକ୍ଟ-୧୯୫୮ ଉଲ୍ଲଂଘନ କରାଯାଇ ବେଆଇନ କାର୍ଯ୍ୟ ହେଉଛି। ଗତ ୧୭ ତାରିଖରେ ଏଏସ୍ଆଇ କର୍ତ୍ତୃପକ୍ଷ ଖନନସ୍ଥଳୀକୁ ଯାଇ ପରିତ୍ୟକ୍ତ ସିଂହମୂର୍ତ୍ତିର ସ୍ଥିତି ଯାଞ୍ଚ କରି ତାହା ଗଙ୍ଗବଂଶ ରାଜତ୍ୱ ସମୟର କାରୁକାର୍ଯ୍ୟ ବୋଲି ଉଲ୍ଲେଖ କରିଥିଲେ। ଏଣୁ ଖନନସ୍ଥଳୀରେ ଆହୁରି ଅଧିକ କୀର୍ତ୍ତିରାଜି ମିଳିବାର ସମ୍ଭାବନା ରହିଛି। ଖନନରୁ ମିଳିଥିବା ସିଂହମୂର୍ତ୍ତି ସମ୍ପର୍କରେ ଏଏସ୍ଆଇ ସତ୍ୟପାଠରେ ଗତ ୯ ତାରିଖରେ କୋର୍ଟଙ୍କୁ ଅବଗତ କରାଇଥିଲେ ମଧ୍ୟ ଏହି ଦିଗରେ ଧ୍ୟାନ ଦିଆଯାଇନାହିଁ। ସେହିଭଳି ମେଶିନ୍ ମାଡ଼ରେ ସିଂହମୂର୍ତ୍ତି ଦୁଇଖଣ୍ଡ ହୋଇଯାଇଛି। ଖନନ କାମ ଚାଲୁ ରହିଲେ, ଅନେକ କୀର୍ତ୍ତିରାଜି ଉଦ୍ଧାର ହେବା ପୂର୍ବରୁ ଭାଙ୍ଗିଯିବ। ଏଣୁ ବଳକା କୀର୍ତ୍ତିରାଜିର ସଂରକ୍ଷଣ ପାଇଁ ପ୍ରକଳ୍ପ କାର୍ଯ୍ୟ ବନ୍ଦ କରିବାକୁ ନିର୍ଦ୍ଦେଶ ଦିଆଯାଉ ବୋଲି ଅପିଲ୍ କରାଯାଇଛି। ଜିପିଆରଏସ୍ ହୋଇ ନ ଥିବାରୁ କୀର୍ତ୍ତିରାଜି ସଂରକ୍ଷଣ କରିବା ଉପରେ ପ୍ରାଥମିକତା ଦେବା ପାଇଁ ନିବେଦନ କରାଯାଇଛି। ଅନ୍ୟପକ୍ଷରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ବିରୋଧରେ ହୋଇଥିବା ଜନସ୍ବାର୍ଥ ମାମଲାର ପରବର୍ତ୍ତୀ ଶୁଣାଣି ଜୁନ ୨୨ ତାରିଖରେ ହେବ। ମାମଲାର ଶୀଘ୍ର ଶୁଣାଣି କରିବା ନେଇ ବରାଳ ଅନ୍ତରୀଣ ଆବେଦନ କରିଥିଲେ।
