ନୂଆଦିଲ୍ଲୀ,୧୭।୪ : ପ୍ରଥମ ଥର ପାଇଁ କରୋନା ସମ୍ବନ୍ଧରେ ଶିଶୁ ଏବଂ ବୟସ୍କଙ୍କ ମଧ୍ୟରେ ଏକ ତୁଳନାତ୍ମକ ଅଧ୍ୟୟନ ରିପୋର୍ଟ ସାମ୍ନାକୁ ଆସିଛି। ଏହା ଅନୁଯାୟୀ, କରୋନା ପରେ ପିଲାମାନଙ୍କ ମଧ୍ୟରେ ବୟସ୍କଙ୍କ ତୁଳନାରେ ଦୁଇଗୁଣା ଅଧିକ ଆଣ୍ଟିବଡି ସୃଷ୍ଟି ହୋଇଛି। ଭୂତାଣୁରେ ବିଭିନ୍ନ ପରିବର୍ତ୍ତନ ବିଷୟରେ ସୂଚନା ମିଳୁଥିଲେ ମଧ୍ୟ ଗତ ଦୁଇ ବର୍ଷ ମଧ୍ୟରେ ଗବେଷକମାନେ ପିଲାମାନଙ୍କର ରୋଗ ପ୍ରତିରୋଧକ ଶକ୍ତି ଉପରେ କୌଣସି ଗୁରୁତ୍ୱପୂର୍ଣ୍ଣ ପ୍ରଭାବ ରେକର୍ଡ କରି ନ ଥିଲେ।
ଏହି ଅଧ୍ୟୟନରେ ଭାରତୀୟ ମେଡିକାଲ ଆସୋସିଏଶନର ପୂର୍ବତନ ସଭାପତି ଡ.ରାଜୀବ ଜୟଦେବନ କହିଛନ୍ତି, କରୋନା ମହାମାରୀ ଆରମ୍ଭରୁ ଏହାର ପ୍ରଭାବ ପିଲାମାନଙ୍କଠାରେ ଅତ୍ୟନ୍ତ ଦୁର୍ବଳ ଥିବା ଦେଖାଯାଇଥିଲା। କିନ୍ତୁ କେତେକ କ୍ଷେତ୍ରରେ ଏହାର ବ୍ୟତିକ୍ରମ ରହିଛି। ପିଲାମାନେ କରୋନା ସଂକ୍ରମଣ ନେଇ ଏକ ନିରାପଦ ଅବସ୍ଥାରେ ଅଛନ୍ତି, କିନ୍ତୁ ଯଦି କାହାର ଲକ୍ଷଣ ଥାଏ, ତେବେ ସେମାନଙ୍କୁ ଠିକ ସମୟରେ କ୍ୱାରାଣ୍ଟାଇନ କରି ବିଶେଷ ସତର୍କତା ଅବଲମ୍ବନ କରିବା ଆବଶ୍ୟକ ।
ମେଡିକାଲ ଜର୍ନାଲ ମେଡରେକ୍ସିଭରେ ପ୍ରକାଶିତ ଜର୍ଜିଆର ଇମୋରୀ ବିଶ୍ୱବିଦ୍ୟାଳୟର ଗବେଷକମାନେ ସଂକ୍ରମଣ ପୂର୍ବରୁ ଏବଂ ପରେ ୨୩ରୁ ଅଧିକ ପିଲାଙ୍କ ଅବସ୍ଥା ବିଶ୍ଳେଷଣ କରିଥିଲେ। ଏହା ଦେଖାଯାଇଥିଲା ଯେ, ପିଲାମାନେ କରୋନାରୁ ସୁସ୍ଥ ହେବାର ୫୦୦ ଦିନ ପରେ ଆଣ୍ଟିବଡି ପର୍ଯ୍ୟାପ୍ତ ପରିମାଣରେ ସୃଷ୍ଟି ହୋଇଥିବା ରେକର୍ଡ କରାଯାଇଥିଲା। ସେହି ସମୟରେ, ବୟସ୍କମାନଙ୍କଠାରେ ଆଣ୍ଟିବଡି ସ୍ତର ତିନିରୁ ଛଅ ମାସ ମଧ୍ୟରେ ହ୍ରାସ ହେଉଥିବା ଦେଖାଯାଇଥିଲା। ଆହୁରି ମଧ୍ୟ, ଭିନ୍ନ ଭିନ୍ନ ପରିବର୍ତ୍ତନ ସେମାନଙ୍କୁ ବିଭିନ୍ନ ସମୟରେ ପ୍ରଭାବିତ କରିଥିଲା।
ଏହି ଅନୁସନ୍ଧାନଗୁଡ଼ିକ ଛୋଟ ପିଲା ଏବଂ ବୟସ୍କଙ୍କ ମଧ୍ୟରେ ପ୍ରତିରକ୍ଷା ପାର୍ଥକ୍ୟ ବିଷୟରେ ଗୁରୁତ୍ୱପୂର୍ଣ୍ଣ ପ୍ରଶ୍ନ ସୃଷ୍ଟି କରିଛି। ଏହା ବୟସ ବର୍ଗରେ ଟିକାକରଣ ଏବଂ ବୁଷ୍ଟର୍ ରଣନୀତି ଉପରେ ବ୍ୟାପକ ପ୍ରଭାବ ପକାଇପାରେ।
