ଢେଙ୍କାନାଳ,୧୭ା୯(ରତନ ନାୟାର)ଢେଙ୍କାନାଳ ଜିଲା ସଦର ଥାନା ପୋଲିସ ଶୁକ୍ରବାର ରାତିରେ ଆନ୍ତଃଜିଲା ଗଞ୍ଜେଇ ଚୋରାଚାଲାଣ ର଼୍ୟାକେଟର ପର୍ଦ୍ଧାଫାଶ କରିଛି। କନ୍ଧମାଳ ଜିଲା ଅଞ୍ଚଳରୁ ଢେଙ୍କାନାଳ ଏବଂ କଟକ ଜିଲାର ଟାଙ୍ଗି ଅଞ୍ଚଳକୁ ଗଞ୍ଜେଇ ଚୋରାଚାଲାଣ ହେଉଥିବା ବେଳେ ଢେଙ୍କାନାଳ ଜିଲା ସଦର ଥାନା କାଇମାଟି-ବେଲଟିକିିରି ରାସ୍ତାରୁ ପୋଲିସ ୨ଟି କାର ସହ ୪୫ କେଜି ଗଞ୍ଜେଇ ଜବତ କରିଛି। ଏଥିସହ ଘଟଣାସ୍ଥଳରୁ ୫ଜଣଙ୍କୁ ଗିରଫ କରିବାରେ ସଫଳ ହୋଇଛି। ଗିରଫ ଅଭିଯୁକ୍ତଙ୍କ ମଧ୍ୟରୁ ୪ଜଣ କନ୍ଧମାଳ ଜିଲା ଫିରିଙ୍ଗିଆ ଥାନା ଓ ନୟାଗଡ ଜିଲା ଗଣିଆ ଥାନା ଅଞ୍ଚଳର ବୋଲି ଜଣାପଡିଛି। ତେବେ ଫୁଲବାଣୀ ଜେଲରେ ଏକ ଆପରାଧିକ ମାମଲାରେ ସଜା କାଟୁଥିବା ଜଣେ କଏଦୀ ପାରୋଲରେ ଘରକୁ ଆସି ଗଞ୍ଜେଇ ଚୋରାଚାଲାଣରେ ସାମିଲ ହୋଇଥିବା ଶନିବାର ଜିଲା ପୋଲିସ କାର୍ଯ୍ୟାଳୟ ସମ୍ମିଳନୀ କକ୍ଷରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ଜ୍ଞାନରଞ୍ଜନ ମହାପାତ୍ର ସୂଚନା ଦେଇଛନ୍ତି।
ସୂଚନା ଅନୁଯାୟୀ, କନ୍ଧମାଳ ଜିଲାର ବିଭିନ୍ନ ଅଞ୍ଚଳରୁ ଏକ କାର୍ରେ ୩ଟି ବସ୍ତାରେ ୪୫କେଜି ଗଞ୍ଜେଇ ଚୋରାଚାଲାଣ କରାଯାଉଥିଲା। ଅନ୍ୟ ଏକ କାର୍ ତାହାକୁ ସୁରକ୍ଷା ଯୋଗାଇ ଦେଉଥିଲା। ଏ ନେଇ ଖବର ମିଳିବା ପରେ ଏସ୍ପିଙ୍କ ନିର୍ଦ୍ଦେଶରେ ସଦର ଏସ୍ଡିପିଓ ବିଭୂତି ଭୂଷଣ ମହାପାତ୍ରଙ୍କ ନେତୃତ୍ୱରେ ଥାନା ଅଧିକାରୀ ପ୍ରଦୀପ କୁମାର ପ୍ରଧାନ, ଭାପୁର ଫାଣ୍ଡି ଅଧିକାରୀ ଚନ୍ଦ୍ରକାନ୍ତ ସେଠୀ ଓ ସଦର ଥାନା ଏସ୍ଆଇ ଅରୁଣ ଦେହୁରୀଙ୍କ ସମେତ ପୋଲିସ ଅଧିକାରୀ ଓ କର୍ମଚାରୀମାନେ କାଇମାଟି-ବେଲଟିକିରି ରାସ୍ତାରେ ୨ଟି କାର୍ (ନଂ. ଓଆର.୦୨-ବିଟି-୩୩୮୮, ଓଡି.୦୨-ବିବି-୮୭୫୧) କୁ ଅଟକାଇ ଯାଞ୍ଚ କରିବା ସହ ତାହାକୁ ଜବତ କରିଥିଲେ। ଏଥିସହ କନ୍ଧମାଳ ଜିଲା ଫିରିଙ୍ଗିଆ ଥାନା କାମ୍ବପଡା ଗ୍ରାମର ଅଜୟ ମାଝି(୨୮) ଓ ହାତୀଲାମ୍ବା ଗ୍ରାମର ଅଶୋକ ମଲ୍ଲିକ(୨୪), ନୟାଗଡ ଜିଲା ଗଣିଆ ଥାନା ଆତାପତା ଗ୍ରାମର ଦୁର୍ଗାଚରଣ ଦାସ(୪୨) ଓ ଡୁମାଡା ଗ୍ରାମର ଅନୁଜ ମହାରଣା(୨୪), ଢେଙ୍କାନାଳ ଜିଲା ସଦର ଥାନା ଦୁର୍ଗାପ୍ରସାଦ ଗ୍ରାମର ପି ସୁବାସଚନ୍ଦ୍ର ଦୋରା(୪୦)ଙ୍କୁ ଗିରଫ କରିଥିଲେ। ଫିରିଙ୍ଗିଆ ଥାନା ଆମ୍ବପଡା ଗ୍ରାମର ଅଜୟ ମାଝିଙ୍କ ନାମରେ ବହୁ ଏନ୍ଡିପିଏସ୍ ମାମଲା ଫିରିଙ୍ଗିଆ ଥାନାରେ ରହିଛି ା ସେ ଜଣେ ପେଷାଦାର ଚୋରା ଗଞ୍ଜେଇ ବ୍ୟବସାୟୀ ବୋଲି ଏସ୍ପି କହିଥିଲେ। ସେହିପରି ନୟାଗଡ ଜିଲା ଗଣିଆ ତାନା ଆତାପତା ଗ୍ରାମର ଦୁର୍ଗାଚରଣ ଦାସ ଏକ ଆପରାଧିକ ମାମଲାରେ ଫୁଲବାଣୀ ଜେଲରୁ ପାରୋଲରେ ଆସି ଗଞ୍ଜେଇ ଚୋରାଚାଲାଣରେ ସାମିଲ ହୋଇଥିଲେ। ଏ ସଂକ୍ରାନ୍ତରେ ସଦର ଥାନାରେ ନଂ. ୭୮୪ା୨୩ରେ ମାମଲା ରୁଜୁ କରାଯାଇଛି। ଘଟଣାରେ ଅଧିକ ତଦନ୍ତ ଜାରି ରହିଛି। ଏହି ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ସୂର୍ଯ୍ୟମଣି ପ୍ରଧାନ ଓ ଭବାନୀ ଶଙ୍କର ଉଦଗାତା, ସଦର ଏସ୍ଡିପିଓ ବିଭୂତି ଭୂଷଣ ମହାପାତ୍ର, ସଦର ଥାନା ଅଧିକାରୀ ପ୍ରଦୀପ ପ୍ରଧାନପ୍ରମୁଖ ଉପସ୍ଥିତ ଥିଲେ।
