ଜେରୁଜେଲମ,୪।୪: ଗୁରୁବାର ଇସ୍ରାଏଲୀ ଯୁଦ୍ଧ ବିମାନ ଗାଜା ଷ୍ଟ୍ରିପରେ ପ୍ରବଳ ବୋମାମାଡ଼ କରିଥିଲା, ଯେଉଁଥିରେ ଅତି କମରେ ୧୦୦ ଜଣଙ୍କର ମୃତ୍ୟୁ ହୋଇଥିଲା। ଏହି ଆକ୍ରମଣରେ ଉତ୍ତର ଗାଜାର ଏକ ସ୍କୁଲକୁ ମଧ୍ୟ ଟାର୍ଗେଟ କରାଯାଇଥିଲା, ଯେଉଁଥିରେ ସେଠାରେ ଆଶ୍ରୟ ନେଇଥିବା ୩୩ ଜଣଙ୍କର ମୃତ୍ୟୁ ହୋଇଥିଲା ଏବଂ ୭୦ରୁ ଅଧିକ ଆହତ ହୋଇଥିଲେ। ପାଲେଷ୍ଟାଇନ ସ୍ବାସ୍ଥ୍ୟ ଅଧିକାରୀମାନେ ଏହି ସୂଚନା ଦେଇଛନ୍ତି।
ସାମ୍ପ୍ରତିକ ସମୟରେ, ଇସ୍ରାଏଲ ଏହାର ଆକ୍ରମଣର ପରିସର ବୃଦ୍ଧି କରିଛି। ଇସ୍ରାଏଲୀ ସେନା କହିଛି ଯେ ହମାସ ଉପରେ ଚାପ ବୃଦ୍ଧି କରିବା ଏବଂ ଏହାକୁ ସମ୍ପୂର୍ଣ୍ଣ ବିତାଡ଼ିତ କରିବା ପାଇଁ ସେମାନେ ଆକ୍ରମଣକୁ ତୀବ୍ର କରିଛନ୍ତି।
ପାଲେଷ୍ଟାଇନ ସ୍ବାସ୍ଥ୍ୟ ମନ୍ତ୍ରଣାଳୟର ମୁଖପାତ୍ର ଜାହେର ଅଲ-ୱାହିଦି କହିଛନ୍ତି ଯେ ଗାଜା ସହରର ତୁଫାହ ଅଞ୍ଚଳର ଏକ ସ୍କୁଲରେ ୧୪ ଜଣ ଶିଶୁ ଏବଂ ପାଞ୍ଚ ଜଣ ମହିଳାଙ୍କ ମୃତଦେହ ମିଳିଛି। ସେ କହିଛନ୍ତି ଯେ ୭୦ ଜଣ ଆହତଙ୍କ ମଧ୍ୟରୁ କେତେଜଣଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ। ଆହଲି ହସ୍ପିଟାଲ ରେକର୍ଡକୁ ଉଦ୍ଧୃତ କରି ସେ କହିଛନ୍ତି ଯେ ନିକଟସ୍ଥ ହିଜାଇୟା ଅଞ୍ଚଳରେ ଘର ଉପରେ ଆକ୍ରମଣରେ ୩୦ରୁ ଅଧିକ ଲୋକଙ୍କ ମୃତ୍ୟୁ ଘଟିଛି।
ଇସ୍ରାଏଲୀ ସେନା କହିଛି ଯେ ଏହା ଗାଜା ସହରରେ ଥିବା ‘ହମାସ କମାଣ୍ଡ ଆଣ୍ଡ କଣ୍ଟ୍ରୋଲ ସେଣ୍ଟର’ ଉପରେ ଆକ୍ରମଣ କରିଛି। ସେନା ଅନୁଯାୟୀ, ସେମାନେ ସାଧାରଣ ନାଗରିକଙ୍କୁ କ୍ଷତିରୁ ରକ୍ଷା କରିବା ପାଇଁ ଆବଶ୍ୟକୀୟ ପଦକ୍ଷେପ ନେଇଛନ୍ତି। ଗୁରୁବାର ଇସ୍ରାଏଲୀ ସେନା ଉତ୍ତର ଗାଜାର କିଛି ଅଂଶରେ ରହୁଥିବା ଲୋକମାନଙ୍କୁ ଗାଜା ସହରର ପଶ୍ଚିମ ଭାଗରେ ଆଶ୍ରୟ ନେବାକୁ ନିର୍ଦ୍ଦେଶ ଦେଇଥିଲା।
ଇସ୍ରାଏଲୀ ସେନା ଚେତାବନୀ ଦେଇଛି ଯେ ସେମାନେ ଏହି ଅଞ୍ଚଳରେ ପୂର୍ଣ୍ଣ ବଳରେ କାର୍ଯ୍ୟାନୁଷ୍ଠାନ ନେବାକୁ ଯୋଜନା କରୁଛନ୍ତି। ଏହି ଭୟ ଯୋଗୁଁ, ଅନେକ ପାଲେଷ୍ଟାଇନ ନାଗରିକ ସେ ସ୍ଥାନ ଛାଡି ଚାଲିଯିବା ଆରମ୍ଭ କରିଛନ୍ତି। କେତେକ ଲୋକ ପିଠିରେ ସେମାନଙ୍କର ଜିନିଷପତ୍ର ବୋହି ନେଉଥିଲେ, ଆଉ କେତେକ ଲୋକ ଖଚର ଗାଡ଼ି ବ୍ୟବହାର କରୁଥିଲେ। ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ବୁଧବାର କହିଛନ୍ତି ଯେ ଇସ୍ରାଏଲ ଗାଜାକୁ ଏକ ନୂତନ ସୁରକ୍ଷା ପଥ ନିର୍ମାଣ କରୁଛି।
