ନୂଆଦିଲ୍ଲୀ,୧୪ା୧୧: ବିହାର ବିଧାନସଭା ନିର୍ବାଚନରେ NDA ମେଣ୍ଟ ଏକ ନିର୍ଣ୍ଣାୟକ ବିଜୟ ଆଡ଼କୁ ଅଗ୍ରସର ହେଉଥିବା ବେଳେ ଭାଜପା କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ତୀବ୍ର ସମାଲୋଚନା କରିଛି। ଭାଜପାର ଆଇଟି ସେଲ୍ ମୁଖ୍ୟ ଅମିତ ମାଲବ୍ୟ ଏକ ଗ୍ରାଫିକ୍ସ ସହିତ ଟାର୍ଗେଟ କରିଛନ୍ତି, ଯେଉଁଥିରେ ଗତ ଦୁଇ ଦଶନ୍ଧି ମଧ୍ୟରେ ରାହୁଲ ଗାନ୍ଧୀଙ୍କ ନେତୃତ୍ୱରେ କଂଗ୍ରେସର ‘୯୫ଟି ନିର୍ବାଚନୀ ପରାଜୟ’ ଥିବା ଦର୍ଶାଯାଇଛି।
ମାଲବ୍ୟ ଲେଖିଛନ୍ତି, “ରାହୁଲ ଗାନ୍ଧୀ! ଆଉ ଗୋଟିଏ ନିର୍ବାଚନ, ଆଉ ଗୋଟିଏ ପରାଜୟ! ଯଦି ନିର୍ବାଚନୀ ସ୍ଥିରତା ପାଇଁ ପୁରସ୍କାର ଥାଆନ୍ତା, ତେବେ ସେ ସେସବୁ ହାତେଇ ନେଇଥାନ୍ତେ।”
ସେ ୨୦୦୪ ରୁ ୨୦୨୫ ମଧ୍ୟରେ ହିମାଚଳ ପ୍ରଦେଶ, ପଞ୍ଜାବ, ଗୁଜରାଟ, ମହାରାଷ୍ଟ୍ର, ଦିଲ୍ଲୀ, ହରିୟାଣା, ଉତ୍ତର ପ୍ରଦେଶ, ବିହାର, ଓଡ଼ିଶା ଏବଂ ଆନ୍ଧ୍ର ପ୍ରଦେଶ ସମେତ ଅନେକ ବଡ଼ ରାଜ୍ୟରେ କଂଗ୍ରେସ କ୍ଷମତା ହରାଇଥିବା ବା ନିର୍ବାଚନରେ ବିଶେଷ ସଫଳତା ପାଇ ନଥିବା ୯୫ଟି ନିର୍ବାଚନର ତାଲିକା ଦର୍ଶାଇଛନ୍ତି।
ଭୋଟ୍ ଗଣତି ଜାରି ରହିଥିବା ବେଳେ ନୀତୀଶ କୁମାରଙ୍କ ଜେଡି(ୟୁ) ସହ ମିଶିଥିବା ଭାଜପା-ନେତୃତ୍ୱାଧୀନ NDA ମେଣ୍ଟ ୨୪୩ ଆସନ ବିଶିଷ୍ଟ ବିହାର ବିଧାନସଭାରେ ୧୯୦ରୁ ଅଧିକ ଆସନରେ ଆଗୁଆ ରହି ବହୁମତ ସଂଖ୍ୟା (୧୨୨) ଠାରୁ ବହୁତ ଆଗରେ ଅଛି।
ଦଳୀୟ ସ୍ଥିତି:
BJP: ୮୪ ଆସନରେ ଆଗୁଆ
JD(U): ୭୬ ଆସନରେ ଆଗୁଆ
LJP (ରାମ ବିଳାସ) ଓ HAM: ୨୭ ଆସନରେ ଆଗୁଆ
RJD, କଂଗ୍ରେସ ଏବଂ ବାମଦଳକୁ ନେଇ ଗଠିତ ବିରୋଧୀ ମହାଗଠବନ୍ଧନ ମାତ୍ର ୪୯ଟି ଆସନରେ ଆଗୁଆ ରହିଛି। ଏଥିରୁ RJD ୩୪ ଓ କଂଗ୍ରେସ ୬ଟି ଆସନରେ ଆଗରେ ଅଛି। ପ୍ରାରମ୍ଭିକ ଧାରା ଏଗଜିଟ୍ ପୋଲ୍ର ଆକଳନକୁ ସତ ପ୍ରମାଣିତ କରୁଛି।
