ଦାରିଙ୍ଗବାଡ଼ି,୩ା୧୧(ଅରୁଣ ସାହୁ): ଆମ୍ବଟାକୁଆ ଖାଇ ମାଣ୍ଡିପଙ୍କାରେ ୨ ଜଣଙ୍କ ମୃତ୍ୟୁ ଘଟିଥିବା ବେଳେ ୬ ଜଣ ଏବେ ବି ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ଗାଁରେ ଏପରି ଅଘଟଣ ଘଟିବା ପରେ ପ୍ରଶାସନ ତତ୍ପର ହୋଇଉଠିଛି। ତେବେ ଆମ୍ବଟାକୁଆକୁ ଖାଦ୍ୟ ଭାବେ ନ ଖାଇବା ପାଇଁ ଜିଲା ପ୍ରଶାସନ ପକ୍ଷରୁ ବ୍ୟାପକ ସଚେତନ କରାଯାଉଛି। ଶନିବାର ଠାରୁ ଜିଲାପାଳ ଅମ୍ରିତ ଋତୁରାଜଙ୍କ ନିର୍ଦ୍ଦେଶ କ୍ରମେ ଦାରିଙ୍ଗବାଡ଼ି ବ୍ଲକ ପ୍ରଶାସନ ପକ୍ଷରୁ ବ୍ୟାପକ ସଚେତନ କାର୍ଯ୍ୟ ଆରମ୍ଭ କରାଯାଇଛି। ଦାରିଙ୍ଗବାଡ଼ି ସମନ୍ବିତ ମହିଳା ଓ ଶିଶୁ ବିକାଶ ଯୋଜନା ଅଧିକାରିଣୀ ସନ୍ଧ୍ୟାରାଣୀ ପଣ୍ଡାଙ୍କ ନେତୃତ୍ୱରେ ଗାଁକୁ ଗାଁ ବୁଲି ଅଙ୍ଗନଓ୍ବାଡ଼ି ଓ ଆଶା କର୍ମୀମାନେ ଲୋକଙ୍କୁ ସଚେତନ କରାଇବା ସହ ଆମ୍ବଟାକୁଆ ନ ଖାଇବାକୁ ପରାମର୍ଶ ଦେଇଛନ୍ତି।
ସେପଟେ ମାଣ୍ଡିପଙ୍କାରେ ଘଟିଥିବା ଘଟଣା ଉପରେ ଜିଲା ପ୍ରଶାସନ ଓ ଜିଲା ଜନ ସ୍ବାସ୍ଥ୍ୟ ବିଭାଗ ପକ୍ଷରୁ ସ୍ଥିତି ଅନୁଧ୍ୟାନ ସହ ଘଟଣାର ତଦନ୍ତ କରାଯାଇ ରିପୋର୍ଟ ଦିଆଯାଇଛି।
ଜିଲାପାଳ ଅମ୍ରିତ ଋତୁରାଜ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ଆମ୍ବଟାକୁଆ ନୁହଁ, ଖାଦ୍ୟ ବିଷାକ୍ତ ଯୋଗୁ ଦୁଇଜଣଙ୍କ ମୃତ୍ୟୁ ହେବା ସହ ୬ ଜଣଙ୍କ ସ୍ବାସ୍ଥ୍ୟ ବିଗିଡ଼ି ସେମାନଙ୍କ ଉତ୍ତମ ଚିକିତ୍ସା ପାଇଁ ଜିଲା ପ୍ରଶାସନ ପଦକ୍ଷେପ ନେଉଛନ୍ତି। ଅନ୍ୟପକ୍ଷରେ ଏତେବଡ଼ ଘଟଣା ଘଟିବା ପରେ ପ୍ରଶାସନ ପିଡିଏସ୍ ଚାଉଳ ବଣ୍ଟନ କରିବା ପରେ ମଧ୍ୟ ମାଣ୍ଡିପଙ୍କା ଗ୍ରାମରେ ଶନିବାର ମଧ୍ୟ ଆମ୍ବଟାକୁଆ ପ୍ରସ୍ତୁତ କରି ଖାଇଥିବା ଜଣାପଡ଼ିଛି। କିଭଳି ପ୍ରସ୍ତୁତ କରାଯାଉଛି ଓ ତା’ର ବ୍ୟବହାର ସମ୍ପର୍କରେ ମାଣ୍ଡିପଙ୍କା ଗ୍ରାମବାସୀ କଂଗ୍ରେସର ବରିଷ୍ଠ ନେତା ଶ୍ରୀକାନ୍ତ ଜେନାଙ୍କ ଗସ୍ତ ସମୟରେ ମହିଳାମାନେ ବଖାଣିଛନ୍ତି। ଗ୍ରାମରେ ଏବେ ସ୍ଥିତି ଧୀରେ ଧୀରେ ସୁଧୁରି ଆସୁଥିବା ବେଳେ ଶୋକାକୁଳ ପରିସ୍ଥିତି ରହିଛି।
ସେହିପରି ଗ୍ରାମର ମହିଳାମାନେ କହିଛନ୍ତି ଯେ, ପରିବାରରେ ୭ ଜଣ ରହିଥିବା ବେଳେ ମାତ୍ର ୧୫ରୁ ୨୦ କିଲୋ ଚାଉଳ ମିଳୁଛି। ତେଣୁ ସରକାର ୫ ବଦଳରେ ୧୦ କିଲୋ ଚାଉଳ ଦେବା ସହ ସଠିକ୍ ସମୟରେ ଚାଉଳ ଦେବାକୁ ନିବେଦନ କରିଛନ୍ତି। ସେହିପରି ସୁଭଦ୍ରା ଯୋଜନାରେ ଆବେଦନ କରିଥିଲେ ସୁଦ୍ଧା ସେମାନଙ୍କୁ ପ୍ରାପ୍ୟ ଏଯାବତ୍ ମିଳି ନ ଥିବା ଗ୍ରାମର ମହିଳାମାନେ କହିଛନ୍ତି। ସରକାର ତାଙ୍କ ସମସ୍ତ ସମସ୍ୟାର ସମାଧାନ କରିବାକୁ ନିବେଦନ କରିଛନ୍ତି।
