ବୁଗୁଡ଼ା,୨୪ା୭(କାଳିଚରଣ ଦାଶ)-ବୁଗୁଡ଼ା ଏନଏସି ଅନ୍ତର୍ଗତ ୫ନଂ ୱାର୍ଡରେ ଜନସଂଖ୍ୟା ଅନୁସାରେ ଅଙ୍ଗନୱାଡି କେନ୍ଦ୍ର ନାହିଁ। ଏଠାରେ ମାତ୍ର ଗୋଟିଏ ରହିଛି। ଏହି କେନ୍ଦ୍ରଟି ଅସଂପୂର୍ଣ୍ଣ ଥିବାରୁ କେନ୍ଦ୍ର ୬ନଂ ୱାର୍ଡରେ ଚାଲୁଛି। ୫ ନଂ. ୱାର୍ଡରେ ଅଙ୍ଗନୱାଡି କେନ୍ଦ୍ର ପାଇଁ ଲକ୍ଷାଧିକ ଟଙ୍କା ବ୍ୟୟରେ ନୂତନ କୋଠା ନିର୍ମାଣ ହୋଇଥିଲେ ମଧ୍ୟ ମଧ୍ୟ ସେଠାରେ ପାଣି, ଶୌଚାଳୟ ବ୍ୟବସ୍ଥା ନାହିଁ। କେବଳ ବାହାର କବାଟ ବ୍ୟତୀତ ଭିତରେ କୌଣସି କବାଟ ଝରକା ଲାଗିନି। ଏତେ କାର୍ଯ୍ୟ ବାକି ଥିଲେ ସୁଦ୍ଧା ନିର୍ମାଣ ଦାୟିତ୍ୱ ନେଇଥିବା ବ୍ୟକ୍ତି ବିଲ୍ କରି ସବୁ ଟଙ୍କା ଉଠାଇ ନେଇଛନ୍ତି। ୬ନଂ. ୱାର୍ଡର ପ୍ରାଥମିକ ବିଦ୍ୟାଳୟର ଉପର ମହଲାରେ ଚାଲୁଥିବା ଏହି ଅଙ୍ଗନଓ୍ବାଡି କେନ୍ଦ୍ରକୁ ଛୋଟ ଶିଶୁମାନେ ଉପର ମହଲାକୁ ଯିବାରେ ସମସ୍ୟା ଉପୁଜୁଛି। ଶିଢିରୁ କେହି କେବେ ପଡିଯିବାର ଆଶଙ୍କା ରହିଛି। ୫ ନଂ ୱାର୍ଡରୁ ୬ନଂ ୱାର୍ଡକୁ ଆସିବାକୁ ହେଲେ ମୁଖ୍ୟ ସଡ଼କ ପାରି ହୋଇ ଆସିବାକୁ ହେଉଥିବାରୁ ଅଧିକାଂଶ ଅଭିଭାବକ ସେମାନଙ୍କ ଶିଶୁଙ୍କୁ ଅଙ୍ଗନଓ୍ବାଡି କେନ୍ଦ୍ରକୁ ଛାଡିବାକୁ ରାଜି ହେଉନାହାନ୍ତି। ବର୍ତ୍ତମାନ ପୁରୁଣା ବାଲିପିଣ୍ଡି ସାହି କେନ୍ଦ୍ର ଅଧୀନରେ ଆସୁଥିବା ଏହି ୱାର୍ଡରେ ଅଙ୍ଗନୱାଡି କର୍ମୀ ସେବା ଯୋଗାଇବା କଷ୍ଟକର ହେଉଛି। ଗର୍ଭବତୀଙ୍କ ଟିକାକରଣ, ଶିଶୁ ଖାଦ୍ୟ ବଣ୍ଟନ, କିଶୋରୀ ବାଳିକାଙ୍କ ଯତ୍ନ, ଶିଶୁଙ୍କ ପାଠ ପଢା ଆଦରେ ବାଧା ଉପୁଜୁଛି। ତୁରନ୍ତ ନୂତନ ଭାବେ ନିର୍ମିତ କୋଠାରେ ବଳକା ଥିବା କାର୍ଯ୍ୟ ଶେଷ କରି ସେଠାରେ ଉକ୍ତ ଅଙ୍ଗନଓ୍ବାଡି କେନ୍ଦ୍ର କାର୍ଯ୍ୟକ୍ଷମ କରିବା ଏବଂ ଜନସଂଖ୍ୟା ଭିତ୍ତିରେ ଆଉ ଦୁଇଟି ଅଙ୍ଗନବାଡି କେନ୍ଦ୍ର ନିର୍ମାଣ କରିବାକୁ ଦାବି ହେଉଛି। ଏ ସମ୍ପର୍କରେ ସିଡିପିଓ ବବିତା ପଣ୍ଡାଙ୍କୁ ପଚାରିବାରୁ ସେ କହିଲେ, ସେ ଏ ସମ୍ପର୍କରେ ବୁଗୁଡ଼ା ଏନ୍ଏସି କାର୍ଯ୍ୟ ନିର୍ବହୀ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ନିର୍ବାହୀ ଅଧିକାରୀ ଯାହା ପଦକ୍ଷେପ ନେବେ।
