ପଟ୍ଟାଙ୍ଗୀ,୩ା୨: କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ଅନ୍ତର୍ଗତ ତଥା ଆନ୍ଧ୍ର ସୀମାନ୍ତ କୋଟିଆ ପଞ୍ଚାୟତକୁ ନେଇ ଦୁଇ ରାଜ୍ୟ ମଧ୍ୟରେ ଲାଗିଥିବା ବିବାଦ ଏଯାଏ ତୁଟିନାହିଁ। ଏପରି ସ୍ଥଳେ ଓଡ଼ିଶା ସରକାର ପଞ୍ଚାୟତରେ କିପରି ବିକାଶମୂଳକ କାର୍ଯ୍ୟ ହୋଇପାରିବେ ସେନେଇ ଯୋଜନା ପ୍ରସ୍ତୁତ କରିଛନ୍ତି। ୧୫୦ କୋଟି ଟଙ୍କାର ପ୍ୟାକେଜରେ କୋଟିଆ ପଞ୍ଚାୟତରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ ଆଗେଇ ଚାଲିଛି। ତେବେ ଆନ୍ଧ୍ର ସରକାର ମଧ୍ୟ ପଛରେ ପଡିନି। କୋଟିଆ ପଞ୍ଚାୟତର ୩ଟି ଗ୍ରାମକୁ ଆନ୍ଧ୍ର ପଞ୍ଚାୟତ ରୂପେ ଘୋଷଣା କରି ଏଠାରେ ପ୍ରଥମ ଥର ପାଇଁ ପଞ୍ଚାୟତ ନିର୍ବାଚନ କରିବାକୁ ନାମାଙ୍କନପତ୍ର ଦାଖଲ କାର୍ଯ୍ୟ ଆଗେଇ ନେଇଛି ।
ସୂଚନା ଯୋଗ୍ୟ, ଓଡ଼ିଶା ସରକାରଙ୍କ ପକ୍ଷରୁ କୋଟିଆ ପଞ୍ଚାୟତରେ ୧୦ ଶଯ୍ୟା ବିଶିଷ୍ଟ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଗୃହ, କ୍ଲଷ୍ଟର ଗୃହ, ଗଞ୍ଜେଇପଦର ଗ୍ରାମ ନିକଟରେ ଛାତ୍ରାବାସ ଗୃହ ଏବଂ ଆର୍ଆଣ୍ଡ ବି ପକ୍ଷରୁ ଥୁରିଆ ଗ୍ରାମଠାରୁ କୋଟିଆ ପଞ୍ଚାୟତଯାଏ ପିଚୁ ରାସ୍ତା ନିର୍ମାଣ, ଆର୍ଡି ବିଭାଗ ପକ୍ଷରୁ କୋଟିଆଠାରୁ ମାଡକାର ଯାଏ ରାସ୍ତା ଓ ଅଫିସ କମ୍ପ୍ଲେକ୍ସ ଶେଷ ହୋଇଛି। ଏହାକୁ ଆସନ୍ତା ୫ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଭଡିଓ କନ୍ଫରେନ୍ସ ମାଧ୍ୟମରେ ଉଦ୍ଘାଟନ କରାଇବାକୁ ଜିଲା ପ୍ରଶାସନ,ଦଳୀୟ ବିଧାୟକ ଓ ରାଜନେତାମାନେ ଯୋଜନା କରିଛନ୍ତି। ଅନ୍ୟପକ୍ଷରେ ଆନ୍ଧ୍ରର ବିଜୟନଗରମ ଜିଲା ପ୍ରଶାସନ ସାଲୁର ବ୍ଲକର କୁରୁକୁଟି ଓ ତନମ ଦୁଇ ପଞ୍ଚାୟତ କାର୍ଯ୍ୟାଳୟରେ ନାମାଙ୍କନ ପତ୍ର ଦାଖଲ କାର୍ଯ୍ୟ ଫେବୃୟାରୀ ୨ରୁ ୪ ପର୍ଯ୍ୟନ୍ତ ବୃଦ୍ଧି କରିଛନ୍ତି। ୫, ୬ ଏବଂ ୭ରେ ନାମାଙ୍କନ ପତ୍ର ଯାଞ୍ଚ ପାଇଁ ତାରିଖ ଧାର୍ଯ୍ୟ ହୋଇଛି। ସେହିପରି ୧୩ରେ ଦ୍ୱିତୀୟ ପର୍ଯ୍ୟାୟ ପଞ୍ଚାୟତ ନିର୍ବାଚନ ହେଉଥିବା କୁରୁକୁଟି ପଞ୍ଚାୟତର ରିଟର୍ନିଂ ଅଧିକାରୀ ଏମ. ନାଗେଶ୍ୱର ରାଓ କହିଛନ୍ତି। ଓଡ଼ିଶାର କୋଟିଆ ପଞ୍ଚାୟତର ଫଗୁଣ ସିନେରିକୁ ପଟୁଗୁ ଚେନୁରୁ, ଫାଟୁସିନେରିକୁ ପଟୁ ଚେନୁରୁ ଓ ଗଞ୍ଜେଇପଦରକୁ ଗଞ୍ଜେଇ ଭଦ୍ରା ନାମରେ ନାମିତ କରି ଉକ୍ତ ୩ ଗ୍ରାମକୁ ଆନ୍ଧ୍ର ପଞ୍ଚାୟତ ଭାବେ ଚିହ୍ନଟ କରି ତ୍ରିସ୍ତରୀୟ ପଞ୍ଚାୟତ ନିର୍ବାଚନ କରୁଥିବା ମାଞ୍ଜୁ ଗେମେଲ କହିଛନ୍ତି। ଆନ୍ଧ୍ର ସରକାରଙ୍କ ପକ୍ଷରୁ ଗଞ୍ଜେଇପଦର ଗ୍ରାମର ବିଶୁ ଗେମେଲ ପୂର୍ବରୁ ସରପଞ୍ଚ ଥିଲେ। ବର୍ତ୍ତମାନ ବିଶୁଙ୍କ ମା’ସନାଇ ଗେମେଲ ସରପଞ୍ଚ ଅଛନ୍ତି। ଏହି ଦୁଇ ସରପଞ୍ଚ ଆନ୍ଧ୍ର ସରକାରଙ୍କ କୌଣସି ଉନ୍ନୟନମୂଳକ କାର୍ଯ୍ୟ ଗ୍ରାମରେ କରିନାହାନ୍ତି। ଆନ୍ଧ୍ର ସରକାରଙ୍କ ପକ୍ଷରୁ ପ୍ରଥମ ଥର ପାଇଁ ଏଠାରେ ପଞ୍ଚାୟତ ନିର୍ବାଚନ ହେଉଥିବାରୁ ଆମେ ଭୋଟ ଦେଇ ଦିବାକର ଗେମେଲଙ୍କୁ ନିର୍ବାଚିତ କରିବାକୁ ସ୍ଥିର କରିଛୁ ବୋଲି ଗ୍ରାମବାସୀ କହିଛନ୍ତି।
ସୂଚନାଯୋଗ୍ୟ, ଫଗୁଣସିନେରି ତଥା ପଟୁଗୁ ଚେନୁରୁ ପଞ୍ଚାୟତର ସରପଞ୍ଚ ପାଇଁ ବେତୁରୁ ହାରକା ଓ ଫାଟୁସିନେରି ତଥା ପଟୁ ଚେନୁରୁ ପଞ୍ଚାୟତ ପାଇଁ ସରପଞ୍ଚ ଲାଗି ସୀମା ଚଲମ ଓ ମାଲତି ହେରକା ତନମ ନାମାଙ୍କନପତ୍ର ଦାଖଲ କରିଛନ୍ତି । ସେହିପରି ଗଞ୍ଜେଇ ପଦର ତଥା ଗଞ୍ଜେଇ ଭଦ୍ରା ପଞ୍ଚାୟତ ପାଇଁ ସରପଞ୍ଚ ପାଇଁ ଦିବାକର ଗେମେଲ, ବିଶୁ ଗେମେଲ ଓ ଡମ୍ବୁ ଗେମେଲ ନାମାଙ୍କନପତ୍ର ଦାଖଲ କରିଛନ୍ତି । ଏହି ସମ୍ପର୍କରେ କୋରାପୁଟ ଉପଜିଲାପାଳ ତଥା କୋଟିଆ ପଞ୍ଚାୟତ ନୋଡାଲ ଅଧିକାରୀ ଲଳିତ କଅଁରଙ୍କୁ ପଚାରିବା ଲାଗି ତାଙ୍କ ମୋବାଇଲ ନମ୍ବରକୁ ଯୋଗାଯୋଗ କରାଯାଇଥିଲା। ହେଲେ ସେ ଫୋନ ଉଠାଇ ନ ଥିଲେ।
