ପଟ୍ଟାଙ୍ଗୀ,୮ା୯(ଡି.ଏନ୍.ଏ.):ଓଡ଼ିଶା ଏବଂ ଆନ୍ଧ୍ର ମଧ୍ୟରେ କୋଟିଆ ପଞ୍ଚାୟତକୁ ନେଇ ଲାଗି ରହିଥିବା ବିବାଦ ରାଜନୈତିକ ସ୍ତରରେ ଆଲୋଚନାକରି ୬ ସପ୍ତାହ ମଧ୍ୟରେ ନିଷ୍ପତ୍ତି ନେବାକୁ ସୁପ୍ରିମକୋର୍ଟ ଉଭୟ ରାଜ୍ୟ ସରକାରଙ୍କୁ ନିକଟରେ ନିର୍ଦ୍ଦେଶ ଦେଇଥିଲେ। ଏହା ପରେ କୋର୍ଟ ମାମଲାର ଶୁଣାଣି କରିବେ ବୋଲି କହିଥିଲେ। ତେବେ ସୁପ୍ରିମକୋର୍ଟଙ୍କ ଏହି ରାୟର କୌଣସି ପ୍ରଭାବ ଆନ୍ଧ୍ର ଉପରେ ପଡ଼ି ନ ଥିବା ଦେଖିବାକୁ ମିଳିଛି।
ସୁପ୍ରିମକୋର୍ଟଙ୍କ ଶୁଣାଣି ପରେ ମଧ୍ୟ ଆନ୍ଧ୍ର ପୁଣି ସୋମବାର କୋଟିଆର ନେରେଡିବାଲସା ଗ୍ରାମରେ ଅଭିଯୋଗ ଶୁଣାଣି ଦିବସ ସ୍ପନ୍ଦନା କାର୍ଯ୍ୟକ୍ରମ କରିଛି। ଗ୍ରାମବାସୀଙ୍କଠାରୁ ବିଭିନ୍ନ ସମସ୍ୟା ସମ୍ପର୍କରେ ଲିଖିତ ଅଭିଯୋଗପତ୍ର ଗ୍ରହଣ କରିଛି। ନେରେଡିବାଲସା ଗ୍ରାମ ଆନ୍ଧ୍ର ପୋଲିସ ଅଧୀନରେ ଥିବା ଦର୍ଶାଇ କୋଟିଆ ପଞ୍ଚାୟତ ପାଇଁ ଥିବା ଏସ୍ଆଇ ରୋହିନି ପାତିଙ୍କ ନେତୃତ୍ୱରେ ଏହି କାର୍ଯ୍ୟକ୍ରମ ହୋଇଛି। ଏହି ସମୟରେ ନେରେଡିବାଲସା ସମେତ ଧୂଳିପଦର, ଉପରସେମ୍ବି, ତଳସେମ୍ବି ଗ୍ରାମର ଲୋକେ ସାଲୁରୁକୁ ପ୍ରତ୍ୟହ ଯାତାୟାତ ଲାଗି ଏକ ବସ୍ ଚଳାଚଳ ପାଇଁ ଦାବି ଜଣାଇଥିଲେ। ସପ୍ତାହକୁ ୨/୩ ଦିନ ସ୍ବାସ୍ଥ୍ୟସେବା ଶିବିର କରିବା, ଜାତିଗତ ପ୍ରମାଣପତ୍ର ଓ ପାନୀୟ ଜଳ ଯୋଗାଣ ସୁବିଧା କରିବା ଲାଗି ଗ୍ରାମବାସୀ ଆନ୍ଧ୍ର ସରକାରଙ୍କ ଉଦ୍ଦେଶ୍ୟରେ ଏକ ଦାବିପତ୍ର ଦେଇଥିଲେ। ନେରେଡିବାଲସା ଗ୍ରାମର ଦୁଇଭଉଣୀ ରହୁଥିବା ଘର ଉପରେ ତେନ୍ତୁଳି ଗଛ ପଡି ଘରଟି ସମ୍ପୂର୍ଣ୍ଣ ନଷ୍ଟ ହୋଇ ଯାଇଥିବା ଜାଣିବା ପରେ ଏସ୍ଆଇ ପାତି ଦୁଇ ଭଉଣୀଙ୍କ ନିକଟରେ ପହଞ୍ଚତ୍ ଆଲୋଚନା କରିଥିଲେ। ଏନେଇ ଏକ ରିପୋର୍ଟ ବିଜୟନଗରମ ଜିଲା ପୋଲିସ ପ୍ରଶାସନକୁ ଦେଇଥିଲେ। ତେବେ ଏହି ସମୟରେ ଦୁଇ ଭଉଣୀ ପଟ୍ଟାଙ୍ଗୀ ବ୍ଲକ ପ୍ରଶାସନ ପକ୍ଷରୁ ସେମାନେ ୧୦ ହଜାର ଟଙ୍କା ଆର୍ଥତ୍କ ସହାୟତା ପାଇଥିବା କହିବାରୁ ଏସ୍ଆଇ ପାତି ଉଭୟଙ୍କୁ କିଛି ଅର୍ଥ ସହାୟତା ଦେଇଥିଲେ।
