ପଟ୍ଟାଙ୍ଗି, ୩।୬ (ଶରତ କୁମାର ଧଳ): କୋରାପୁଟ ଜିଲ୍ଲା ପଟ୍ଟାଙ୍ଗି ବ୍ଲକ୍ ଅଧୀନରେ ଥିବା କୋଟିଆ ପଞ୍ଚାୟତର ସୀମାନ୍ତ ଗ୍ରାମଗୁଡିକରେ ପୁଣିଥରେ ପଡୋଶୀ ଆନ୍ଧ୍ର ପ୍ରଦେଶର ପଦାଧିକାରୀମାନେ ଅନୁପ୍ରବେଶ କରି ସର୍ଭେ କାର୍ଯ୍ୟର ସ୍ଥିତି ଅନୁଧ୍ୟାନ କରି ଫେରିଯାଇଥିବା ଘଟଣା ପୁଣିଥରେ ଚର୍ଚ୍ଚାକୁ ଆଣିଛି। ଏହା ସତ୍ତ୍ୱେ ଓଡ଼ିଶାର ବ୍ଲକ୍ ପ୍ରଶାସନ ପକ୍ଷରୁ କୌଣସି ପ୍ରଭାବଶୀଳ ପଦକ୍ଷେପ ଦେଖିବାକୁ ମିଳୁନାହିଁ।
ସୂଚନା ଅନୁଯାୟୀ, ବର୍ତ୍ତମାନ ରାଜ୍ୟରେ ଜନଗଣନା ସହ SIR ସର୍ଭେ କାର୍ଯ୍ୟକ୍ରମ ଚାଲିଥିବା ବେଳେ କୋଟିଆ ପଞ୍ଚାୟତରେ ଓଡ଼ିଶା ପକ୍ଷରୁ ଜନଗଣନା କାର୍ଯ୍ୟ ସମାପ୍ତ ହୋଇଛି ଏବଂ ବର୍ତ୍ତମାନ SIR ସର୍ଭେ ଆରମ୍ଭ ହୋଇଛି। କିନ୍ତୁ ଏହି ସମୟରେ ମଧ୍ୟ ଆନ୍ଧ୍ର ପ୍ରଶାସନ ପଛଘୁଞ୍ଚା ନଦେଇ କୋଟିଆ ଅଞ୍ଚଳକୁ ପ୍ରବେଶ କରି ନିଜ ଉପସ୍ଥିତି ଜାହିର କରିଛି।
ଏହି ଅନୁପ୍ରବେଶ ସମୟରେ ଆନ୍ଧ୍ର ପ୍ରଦେଶର ପାର୍ବତୀପୁରମ୍ ମାନ୍ୟମ୍ ଜିଲାର ଅଧିକାରୀ କେଶବ ରାଓ ଓ ସାଲୁର୍ ବ୍ଲକ୍ ତହସିଲଦାର ଏମ୍. ସୁରେଶ କୁମାର ସହ ଅନ୍ୟାନ୍ୟ ଅଧିକାରୀମାନେ କୋଟିଆ ପଞ୍ଚାୟତର ଫାଟୁସିନେରୀ ଓ ଫଗୁଣସିନେରୀ ଗ୍ରାମରେ ପହଞ୍ଚିଥିଲେ। ସେଠାରେ ସେମାନେ SIR ସର୍ଭେ କାର୍ଯ୍ୟର ସ୍ଥିତି ଅନୁଧ୍ୟାନ କରିବା ସହ ଗ୍ରାମବାସୀଙ୍କ ସହ ବିଭିନ୍ନ ସରକାରୀ କାର୍ଯ୍ୟକ୍ରମ ନେଇ ଆଲୋଚନା କରିଥିଲେ।
ଏହା ସତ୍ତ୍ୱେ ଓଡ଼ିଶାର ସ୍ଥାନୀୟ ବ୍ଲକ୍ ପ୍ରଶାସନ ପକ୍ଷରୁ କୌଣସି ସ୍ପଷ୍ଟ ପ୍ରତିକ୍ରିୟା ବା କଠୋର ପଦକ୍ଷେପ ଦେଖାଯାଇନାହିଁ। ଅନ୍ୟପଟେ, କୋଟିଆ ଅଞ୍ଚଳରେ ଆନ୍ଧ୍ର ପ୍ରଶାସନର ଏପରି ନିୟମିତ ଅନୁପ୍ରବେଶ ଜାରି ରହିଥିବା ବେଳେ, ଓଡ଼ିଶା ପ୍ରଶାସନ କେବଳ ତଦନ୍ତ କରି ଜିଲା ପ୍ରଶାସନକୁ ରିପୋର୍ଟ ପ୍ରଦାନ କରିବାରେ ସୀମିତ ରହୁଥିବା ଦେଖିବାକୁ ମିଳିଛି।
ଏହି ପରିସ୍ଥିତି ରାଜ୍ୟ ଓ ଜିଲା ପ୍ରଶାସନ ପାଇଁ ଚିନ୍ତା ବଢ଼ାଇଥିବା ସହ, ଆଗାମୀ ଦିନରେ କେମିତି ପଦକ୍ଷେପ ଗ୍ରହଣ କରାଯିବ ସେଥିପାଇଁ ପ୍ରଶ୍ନ ଉଠାଇଛି।
