ପଟ୍ଟାଙ୍ଗି,୨୮ା୩(ଶରତ ଧଳ)ଆନ୍ଧ୍ର ସୀମାକୁ ଲାଗିଥିବା କୋରାପୁଟ ଜିଲା ପଟ୍ଟାଙ୍ଗି ବ୍ଲକ କୋଟିଆ ପଞ୍ଚାୟତରେ ଆନ୍ଧ୍ର- ଓଡ଼ିଶା ମଧ୍ୟରେ କିପରି ଶାନ୍ତି ଶୃଙ୍ଖଳାର ସହ ମତଦାନ ହେବ ସେ ନେଇ ଉଭୟ ପ୍ରଶାସନ ମଧ୍ୟରେ ଆଲୋଚନାର ଏକ ଭିଡିଓ ଗଣମାଧ୍ୟମରେ ଭାଇରାଲ ହୋଇଛି। ଏ ନେଇ ଆନ୍ଧ୍ର ପାର୍ବତୀପୁରମ୍ ମାନ୍ୟମ୍ ଜିଲାପାଳ ଏକ ଖବରଦାତା ସମ୍ମିଳନୀ କରି ସୂଚନା ଦେଉଥିବା ଦେଖିବାକୁ ମିଳିଛି।
ସୂଚନାଅନୁଯାୟୀ, ପଟ୍ଟାଙ୍ଗି ବ୍ଲକ ପ୍ରଶାସନ ପକ୍ଷରୁ ଉକ୍ତ ପଞ୍ଚାୟତରେ ଥିବା ୯ଟି ବୁଥ୍ରେ କିପରି ଶାନ୍ତିଶୃଙ୍ଖଳାର ସହ ମତଦାନ ହୋଇପାରିବ ସେନେଇ ଆନ୍ଧ୍ର ସରକାର କୋରାପୁଟ ଜିଲା ପ୍ରଶାସନ ସହଯୋଗ କରିବ ବୋଲି ନିଜ ଅଞ୍ଚଳର ଗଣମାଧ୍ୟମ ପ୍ରତିନିଧିମାନଙ୍କୁ ଖବରଦାତା ସମ୍ମିଳନୀ କରି ପାର୍ବତୀପୁରମ୍ ଜିଲାପାଳ ସୂଚନା ଦେଉଛନ୍ତି। ଅନୁରୂପ ଆନ୍ଧ୍ର ରାଜ୍ୟ ପକ୍ଷରୁ ଉକ୍ତ ପଞ୍ଚାୟତରେ ଥିବା ୩ ବୁଥ୍ରେ ଯେପରି ଶାନ୍ତିଶୃଙ୍ଖଳାର ସହ ମତଦାନ ହୋଇପାରିବ ସେ ନେଇ କୋରାପୁଟ ଜିଲା ପ୍ରଶାସନ ସହମତି ପ୍ରକାଶ କରିଥିବା ନେଇ ଉକ୍ତ ଭିଡିଓରେ ଆନ୍ଧ୍ର ଜିଲାପାଳ କହୁଥିବା ଦେଖିବାକୁ ମିଳିଛି। ଉଭୟ ରାଜ୍ୟର ଜିଲା ପ୍ରଶାସନ କୋଟିଆ ପଞ୍ଚାୟତ ଭୋଟର୍ମାନେ ଯେପରି ନିଜ ନିଜର ମତଦାନ ସାବ୍ୟସ୍ତ କରିବାରେ ପ୍ରଭାବିତ ହେବେ ନାହିଁ ଓ ଉଭୟ ଜିଲା ପ୍ରଶାସନ ମଧ୍ୟରେ ବୁଝାମଣା ହୋଇ ଏଥିପ୍ରତି ଦୃଷ୍ଟି ଦେବାକୁ ଆଲୋଚନା ହୋଇଥିବା ଆନ୍ଧ୍ର ଜିଲାପାଳ ଭିଡିଓରେ କହୁଥିବା ଦେଖିବାକୁ ମିଳିଛି ।
ଏ ସମ୍ପର୍କରେ କୋରାପୁଟ ଜିଲାପାଳ ଭି.କୀର୍ତ୍ତି ଭାସନଙ୍କୁ ପଚାରିବାରୁ ପୂର୍ବରୁ ସୀମାନ୍ତ ପଞ୍ଚାୟତରେ ଯେପରି ନିବର୍ର୍ାଚନ ହୋଇଥିଲା ଚଳିତ ନିର୍ବାଚନ ମଧ୍ୟ ସେହିପରି ପରିଚାଳିତ ହେବ। କିନ୍ତୁ ଆନ୍ଧ୍ରର କୌଣସି ବୁଥ୍ ଓଡ଼ଶା ସୀମାନ୍ତ ଭିତରେ ନାହିଁ। କେବଳ ନେରେଡିବାଲ୍ସା ବୁଥ୍ ଆନ୍ଧ୍ରରେ ରହିଛି। କୋଟିଆ ପଞ୍ଚାୟତର ସମସ୍ତ ଗଁା ଓଡ଼ିଶା ଭିତରେ ଅଛି। ନିକଟରେ ଆନ୍ଧ୍ର -ଓଡ଼ିଶା ମଧ୍ୟରେ ଏକ କୋର୍ଡିନେଶନ ବୈଠକ ହୋଇଥିଲା। ଯେଉଁଥିରେ କି ଉକ୍ତ ଭିଡିଓ ଯାହା ଭାଇରାଲ ହେଉଛି ତାହା ଆଲୋଚନା ହୋଇଥିବା ଜିଲାପାଳ କହିଥିଲେ।
