ନୂଆଦିଲ୍ଲୀ,୧୩।୭: ଚାଲିଥିବା ଓ୍ଵେଷ୍ଟଇଣ୍ଡିଜ ଗସ୍ତରେ ଅଷ୍ଟ୍ରେଲିଆର ବ୍ୟାଟିଂ କଠିନ ପରୀକ୍ଷା ଦେଇ ଗତି କରୁଛି। ଦକ୍ଷିଣ ଆଫ୍ରିକା ବିପକ୍ଷରେ ବିଶ୍ୱ ଟେଷ୍ଟ ଚାମ୍ପିୟନଶିପ ଫାଇନାଲରେ ହାରିବା ପରେ କାରିବିଅନ ସିରିଜରେ ଜିତିବା ଅଷ୍ଟ୍ରେଲିଆ ପାଇଁ ମନୋବଳ ବୃଦ୍ଧିକାରୀ ହୋଇପାରିଥାନ୍ତା। କିନ୍ତୁ ତୃତୀୟ ଓ ଶେଷ ଟେଷ୍ଟରେ ମଧ୍ୟ ଅଷ୍ଟ୍ରେଲିଆର ବ୍ୟାଟିଂ ଦୁର୍ବଳତା ପୁଣି ଦେଖିବାକୁ ମିଳିଛି। ପ୍ରଥମ ଇନିଂସରେ ଅଷ୍ଟ୍ରେଲିଆ ୨୨୫ ରନରେ ଅଲଆଉଟ ହୋଇଥିବା ବେଳେ ଓ୍ଵେଷ୍ଟଇଣ୍ଡିଜର ଆଣ୍ଡରସନ ଫିଲିପ ଟ୍ରାଭିସ ହେଡ଼ଙ୍କୁ ଏକ ଅବିଶ୍ୱାସନୀୟ କ୍ୟାଚ ନେଇ ସ୍ତବ୍ଧ କରିଦେଇଛନ୍ତି।
File That Under Screamers 🗳️
Anderson Phillip pulled off a diving, full-length grab to send Travis Head packing 👋#WIvsAUS pic.twitter.com/Azjm8H8V1i
— FanCode (@FanCode) July 13, 2025
ଘଟଣାଟି ସାବିନା ପାର୍କରେ ଚାଲିଥିବା ଡେ-ନାଇଟ ଟେଷ୍ଟର ପ୍ରଥମ ଦିନର ୬୫ତମ ଓଭରରେ ଘଟିଥିଲା। ଜଷ୍ଟିନ ଗ୍ରୀଭସଙ୍କ ଫୁଲର ଡେଲିଭରିରେ ହେଡ଼ ଅତି ଶୀଘ୍ର ସଟ୍ ଖେଳିଥିଲେ। ବଲଟି ବ୍ୟାଟରୁ ଉପରକୁ ଉଠି ମିଡ଼-ଅଫ ଆଡ଼କୁ ଯାଇଥିଲା। ଆଣ୍ଡରସନ ଫିଲିପ ଦ୍ରୁତଗତିରେ ଡାହାଣ ପଟକୁ ଦୌଡ଼ି ପୂରା ଲମ୍ବରେ ଡାଇଭ୍ ଦେଇ ଦୁଇ ହାତରେ ବଲକୁ ଧରିଥିଲେ। ଏହାସହ ସେ ନିରାପଦେ ଘାସରେ ଅବତରଣ କରିଥିଲେ, ଯେତେବେଳେ ତାଙ୍କ କହୁଣୀ ଘାସକୁ ଛୁଇଁଥିଲା।
ଏହି ଗସ୍ତରେ ଅଷ୍ଟ୍ରେଲିଆର ବ୍ୟାଟିଂ ଲାଇନଅପ୍ ସଂଘର୍ଷ କରୁଛି। ୫ଟି ଇନିଂସରେ ମାତ୍ର ଗୋଟିଏ ଥର (ପ୍ରଥମ ଟେଷ୍ଟର ଦ୍ୱିତୀୟ ଇନିଂସରେ ୩୧୦) ସେମାନେ ୩୦୦ ରନ ଅତିକ୍ରମ କରିଛନ୍ତି। ଓ୍ଵେଷ୍ଟଇଣ୍ଡିଜର ବୋଲିଂ ଆକ୍ରମଣ, ବିଶେଷକରି ପେସର ଶାମାର ଜୋସେଫଙ୍କ ୫ ଇନିଂସରେ ୧୮ ଓ୍ୱିକେଟ ଓ ଜୟଦେନ ସିଲସଙ୍କ ୧୩ ଓ୍ୱିକେଟ ଅଷ୍ଟ୍ରେଲିଆକୁ ଚାପରେ ରଖିଛି।
ପ୍ରଥମ ଦିନରେ ମିଚେଲ ଷ୍ଟାର୍କ ନିଜର ୧୦୦ତମ ଟେଷ୍ଟକୁ ସ୍ମରଣୀୟ କରିଥିଲେ। ଅଷ୍ଟ୍ରେଲିଆର ପ୍ରଥମ ଇନିଂସରେ ଶୂନ୍ୟ ରନରେ ଆଉଟ ହୋଇଥିଲେ ମଧ୍ୟ, ସେ ବୋଲିଂରେ ଦମଦାର ପ୍ରତ୍ୟାବର୍ତ୍ତନ କରି ଓ୍ଵେଷ୍ଟଇଣ୍ଡିଜର ଓପନର କେଭଲନ ଆଣ୍ଡରସନଙ୍କୁ ଆଉଟ କରିଥିଲେ। ଏହା ତାଙ୍କର ଟେଷ୍ଟ କ୍ୟାରିଅରରେ ୩୯୬ତମ ଓ୍ୱିକେଟ ଥିଲା। ଓ୍ଵେଷ୍ଟଇଣ୍ଡିଜ ପ୍ରଥମ ଦିନ ଶେଷରେ ୧୬/୧ରେ ରହିଥିଲା।
ଓ୍ଵେଷ୍ଟଇଣ୍ଡିଜର ନିୟମିତ ଓପନର ଜନ କ୍ୟାମ୍ପବେଲ ଓ ମିକାଇଲ ଲୁଇସଙ୍କ ଆହତ ହେବା ଯୋଗୁଁ ଆଣ୍ଡରସନ ଓ ବ୍ରାଣ୍ଡନ କିଙ୍ଗଙ୍କୁ ଓପନିଂ ପାଇଁ ପଠାଯାଇଥିଲା। ଦ୍ୱିତୀୟ ଦିବସରେ କିଙ୍ଗ ଓ ଅଧିନାୟକ ରୋଷ୍ଟନ ଚେଜ ବ୍ୟାଟିଂ ଆରମ୍ଭ କରିବେ।
ଶାମାର ଜୋସେଫ ୪/୩୩, ଜୟଦେନ ସିଲସ ଓ ଜଷ୍ଟିନ ଗ୍ରୀଭସ ୩ଟି ଲେଖାଏ ଓ୍ୱିକେଟ ନେଇଥିଲେ। ପିଚ୍ ସିମର ଓ ସ୍ପିନରଙ୍କୁ ସହାୟତା କରୁଥିବା ଦେଖି ଅଷ୍ଟ୍ରେଲିଆର ଅଫ୍-ସ୍ପିନର ନାଥନ ଲିଅନଙ୍କ ବଦଳରେ ସ୍କଟ ବୋଲାଣ୍ଡଙ୍କୁ ଖେଳାଇବା ନିଷ୍ପତ୍ତି ଉପରେ ପ୍ରଶ୍ନ ଉଠୁଛି।
