ଜେରୁଜେଲମ: ଚିକିତ୍ସା ବିଜ୍ଞାନରେ ଏକ ବଡ଼ ସଫଳତା ଭାବେ ପ୍ରଥମ କରି ବିନା ଶୁକ୍ରାଣୁ(ସ୍ପର୍ମ)ରେ ଇସ୍ରାଏଲର ବୈଜ୍ଞାନିକମାନେ ଏକ ସିନ୍ଥେଟିକ୍ ଭ୍ରୂଣ (ଏମ୍ବ୍ରିଓ) ପ୍ରସ୍ତୁତ କରିଛନ୍ତି। ଗର୍ଭ ବାହାରେ ଏକ ପେଟ୍ରି ଥଳିରେ ଷ୍ଟେମ୍ କୋଷିକା ବ୍ୟବହାର କରି ଏହି ଭ୍ରୂଣ ତିଆରି କରାଯାଇଛି। ସିନ୍ଥେଟିକ୍ ଏମ୍ବ୍ରିିଓ ମଡେଲ ଦ୍ୱାରା ଏପରି ଭ୍ରୂଣରୁ ଟିସ୍ୟୁ ଏବଂ ପ୍ରତିରୋପଣ ନିମନ୍ତେ ବିଭିନ୍ନ ଅଙ୍ଗପ୍ରତ୍ୟଙ୍ଗ ବିକଶିତ କରାଯାଇପାରିବ ବୋଲି ବୈଜ୍ଞାନିକମାନେ ଆଶା କରିଛନ୍ତି। ଅଙ୍ଗ ପ୍ରତିରୋପଣର ଆବଶ୍ୟକତା ପୂରଣ କରିବା ଏହି ଗବେଷଣାର ଉଦ୍ଦେଶ୍ୟ। ସେଲ୍ ପତ୍ରିକାରେ ଅଧ୍ୟୟନ ବାବଦ ରିପୋର୍ଟ ପ୍ରକାଶ ପାଇଛି।
ଇସ୍ରାଏଲର ଓ୍ବେଇଜ୍ମାନ୍ ଇନ୍ଷ୍ଟିଚ୍ୟୁଟ ବୈଜ୍ଞାନିକଙ୍କ କହିବା ମୁତାବକ, ମୂଷାର ଷ୍ଟେମ୍ ସେଲ୍ରୁ ଅନ୍ତଃନଳୀ, ମସ୍ତିଷ୍କ ବିକଶିତ ହେବାର ଆରମ୍ଭ ପର୍ଯ୍ୟାୟ ଏବଂ ସ୍ପନ୍ଦନ ଥିବା ହୃତ୍ପିଣ୍ଡ ଆଦି ପ୍ରାରମ୍ଭିକ ଭ୍ରୂଣ ସଂରଚନାରେ ଉପଯୋଗ କରାଯାଇପାରିବ। କ୍ୟାନ୍ସର ଭଳି ରୋଗରେ ପୀଡ଼ିତ ରୋଗୀଙ୍କ ଚିକିତ୍ସାରେ ଏଭଳି ଭ୍ରୂଣ ବେଶ୍ ଉପଯୋଗୀ ହେବ। ଗତବର୍ଷ ଏହି ଗବେଷକ ଟିମ୍ ଏକ ମେକାନିକାଲ ଗର୍ଭ ପ୍ରସ୍ତୁତ କରିଥିଲେ। ଏହାକୁ ବ୍ୟବହାର କରି ଗର୍ଭାଶୟ ବାହାରେ ମୂଷାର ଭ୍ରୂଣ ବିକଶିତ କରିବାରେ ସେମାନଙ୍କୁ ସଫଳତା ମିଳିଥିଲା। ସଦ୍ୟ ବିକଶିତ ଭ୍ରୂଣରେ ଉକ୍ତ ମେକାନିକାଲ ଗର୍ଭକୁ ବ୍ୟବହାର କରାଯାଇଛି। ଷ୍ଟେମ୍ ସେଲ୍ଗୁଡ଼ିକରେ ପୂର୍ବରୁ କେତେକ କେମିକାଲ ପ୍ରୟୋଗ କରାଯାଇଥିଲା। ସେଥିରେ କେତେକ ଜେନେଟିକ୍ ପ୍ରୋଗ୍ରାମକୁ ବଦଳାଯାଇଥିଲା। ଗବେଷଣାରେ ନିଆଯାଇଥିବା ଷ୍ଟେମସେଲଗୁଡ଼ିକ ମଧ୍ୟରୁ ମାତ୍ର ୫% ହିଁି ଭ୍ରୂଣ ଆକାରରେ ବଢ଼ିଥିଲା। ମୂଷାର ପ୍ରାକୃତିକ ଗର୍ଭ ସହ ତୁଳନା କରାଯିବା ପରେ ତାହା ୯୫% ପର୍ଯ୍ୟନ୍ତ ମିଶୁଥିବା ବୈଜ୍ଞାନିକମାନେ ଦାବି କରିଛନ୍ତି। ତେବେ ଏଥିରୁ କେବଳ ମନୁଷ୍ୟ ଶରୀରରେ ପ୍ରତିରୋପଣ ହେବାକୁ ଥିବା ଅଙ୍ଗ ବିକଶିତ କରାଯାଇପାରିବ। ଏହାକୁ ବ୍ୟବହାର କରି ଜୀବନ ସୃଷ୍ଟି କରାଯାଇପାରିବ ନାହିଁ ବୋଲି ଗବେଷଣାରେ ଭାଗ ନେଇଥିବା ପ୍ରଫେସର ଜାକୋବ୍ ହନ୍ନା କହିଛନ୍ତି।
