ସହରରେ ପଶିଲା ହାତୀ, ଲୋକେ ରାତିସାରା ଅନିଦ୍ରା
8:14 pmSeptember 14, 2022September 14, 2022 / 05

କେନ୍ଦୁଝର,୧୪ା୯(ସ୍ବ.ପ୍ର.): କେନ୍ଦୁଝର ଜିଲାରେ ହାତୀ ଉପଦ୍ରବ ଥମୁ ନାହିଁ। ଗାଁ ଗଣ୍ଡାରେ ହାତୀ ଉପଦ୍ରବ କରିବା ପରେ ଏବେ ସହର ମୁହାଁ ହୋଇଛନ୍ତି। ଫଳରେ ସବୁଆଡ଼େ ଭୟର ବାତାବରଣ ସୃଷ୍ଟି ହୋଇଛି। ମଙ୍ଗଳବାର ରାତିରେ କେନ୍ଦୁଝର ସହରର ପୁରୁଣା ସହର ୧ ନଂ ଏବଂ ୨ ନଂ ଓ୍ବାର୍ଡରେ ଏକ ଗୋଠ ଛଡ଼ା ହାତୀ ପଶି ବ୍ୟାପକ କ୍ଷୟକ୍ଷତି କରିଛି। ହାତୀଟି ବାଇପାସ ରାସ୍ତା ଦେଇ ସିଦ୍ଧମଠ ଜଙ୍ଗଲରୁ ଆସି ପ୍ରଥମେ ସୁଲେଇଖମାର ଉପର ସାହିରେ କୁନା ନାଏକ ଏବଂ ଗୋକୁଳ ନାଏକଙ୍କ ଘର ଭାଙ୍ଗି ଥିଲା। ଏହା ପରେ ହାତୀ ମାଟିଆବନ୍ଦ ପୋଖରୀ ପାର୍ଶ୍ୱ ରାସ୍ତାରେ ଆସି ଭଟ୍ଟାସାହି ସ୍କୁଲ ପାଖ,ଗୌର ସାହି,ଗୁଣ୍ଡିଚା ସାହି, ମଦନମୋହନପୁର ସାହି,ହାଡ଼ବନ୍ଧ ସାହିରେ ବୁଲିବା ପରେ ବଡ଼ଦାଣ୍ଡ ଦେଇ ବଳଦେବଜୀଉ ମନ୍ଦିର ନିକଟ ସନବିମ ଫଟୋ ଷ୍ଟୁଡିଓ ନିକଟରେ ପହଞ୍ଚିଥିଲା। ବନ ବିଭାଗର ବାରଣ ସତ୍ତ୍ୱେ ଶହ ଶହ ଲୋକ ରାତ୍ରି ଅନିଦ୍ରା ହୋଇ ବନକର୍ମଚାରୀଙ୍କ ସହ ହାତୀ ଘଉଡ଼ାଇଥିଲେ। ହାତୀ ହୁଡ୍‌କୋ କଲୋନୀ ଦେଇ ଠାକୁରପାଟଣା, ରାଙ୍କି ସରାସ, କଣ୍ଡରାପଶି, ହରିଡାଗୋଠ, ଶିରିଶପାଳ ବାଦମପାଟି ଦେଇ କୋଡିପଶା ଡ୍ୟାମ ନିକଟ ସିଦ୍ଧମଠ ସଂରକ୍ଷିତ ଜଙ୍ଗଲକୁ ସକାଳ ୫ଟା ରେ ପ୍ରବେଶ କରିଥିଲା। ସ୍ଥାନୀୟ ଲୋକେ ରାତି ଅନିଦ୍ରା ହୋଇ ବନ ବିଭାଗ କର୍ମଚାରୀଙ୍କ ସହିତ ହାତୀ ଘଉଡାଇଥିଲେ।