ମୁମ୍ବାଇ: ବଲିଉଡର ମହାନାୟକ ଅମିତାଭ ବଚ୍ଚନ ବୁଧବାର ଅର୍ଥାତ୍ ଅକ୍ଟୋବର ୧୧ରେ ପାଳନ କରିବାକୁ ଯାଉଛନ୍ତି ତାଙ୍କ ୮୧ ତମ ଜନ୍ମ ଦିବସ। ଏହି ଅବସରରେ ଟେଲିଭିଜନ ରିୟଲିଟି ଶୋ’ ‘କୌନ ବନେଗା କରୋଡପତି’ର କମିଂ ଏପିସୋଡରେ ଏହି ବିଶେଷ ଦିନକୁ ପାଳନ କରାଯାଇଥିବା ଦେଖିବାକୁ ମିଳିବ। ତେବେ ଏହି ସେଲିବ୍ରେଶନ ବିଗ ବିଙ୍କ ପାଇଁ ଏକ ସରପ୍ରାଇଜ ଥିବା କୁହାଯାଇଛି। ଏହା ବ୍ୟତୀତ ଆଜିର ଦିନକୁ ସାରା ଭାରତରେ ତାଙ୍କ ପ୍ରଶଂସକମାନେ ପାଳନ କରୁଛନ୍ତି ବୋଲି ବି କୁହାଯାଇଛି। ଏହାର ଏକ ପ୍ରମୋ ଏବେ ଦେଖିବାକୁ ମିଳିଛି। ଯେଉଁଥିରେ ବିଗ ବି ଖୁବ ଇମୋଶନାଲ ହୋଇଯାଇଥିବା ଦେଖାଯାଇଛି।
ଏକ କ୍ଲିପରେ ଅମିତାଭ କହୁଛନ୍ତି, ‘ଆଉ କେତେ କନ୍ଦାଇବେ ଆପଣମାନେ’। ଅର୍ଥାତ୍ ଆଉ ମୋତେ କେତେ ଇମୋଶନାଲ କରିବେ ଆପଣମାନେ। ସେ ଆହୁରି ମଧ୍ୟ କହୁଛନ୍ତି, ମୁଁ କଣ୍ଟେଷ୍ଟାଣ୍ଡଙ୍କୁ ଟିସୁ ଦେଉଥିବା ବେଳେ ଅବ ମେରି ବାରି ଆ ଗୟି। ଏହାସହ ସେ ନିଜ ଆଖିର ଲୁହ ପୋଛିଛନ୍ତି ଓ ଏହି ସେଲିବ୍ରେଶନ ପାଇଁ କେବିସି ଟିମକୁ ଧନ୍ୟବାଦ ଦେଇଛନ୍ତି।
ସୂଚନାଯୋଗ୍ୟ, ୧୧ ଅକ୍ଟୋବର ୧୯୪୨ରେ ଜନ୍ମନେଇଥିବା ଅମିତାଭ ବଚ୍ଚନ ବହୁ ସଂଘର୍ଷ ପରେ ଆଜି ବଲିଉଡ ଦୁନିଆର ଶେହନଶାହା ଭାବରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି। କେବଳ ଦେଶ କାହିଁକି ବିଦେଶରେ ବି ରହିଛନ୍ତି ଅମିତାଭଙ୍କର ଅନେକ ପ୍ରଶଂସକ। ପ୍ରଥମେ ରିଜେକଶନର ସାମ୍ନା କରିଥିବା ବିଗ ବି କିନ୍ତୁ ପରବର୍ତ୍ତି ସମୟରେ ପାଲଟି ଯାଇଛନ୍ତି ବଲିଉଡର ମହାନାୟକ। ଗୋଟିଏ ପରେ ଗୋଟିଏ ହିଟ୍ ମୁଭି ଭେଟିଦେଇ ସେ ଦର୍ଶକଙ୍କ ମନରେ ଘର କରି ନେଇଛନ୍ତି।
