ହାଇଦ୍ରାବାଦ୍,୨୦।୧୧: ତେଲେଙ୍ଗାନାର ଜନଗାଓଁରେ ଏକ ନିର୍ବାଚନ ରାଲିରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା କେସିଆର, କଂଗ୍ରେସ ଏବଂ ଆସଦୁଦ୍ଦିନ ଓୱାଇସିଙ୍କୁ ଟାର୍ଗେଟ କରିଛନ୍ତି। ଏହି ତିନିଙ୍କୁ ପରିବାର ଭିତ୍ତିକ ଦଳ ବୋଲି କହିଥିଲେ।
ସାଧାରଣ ସଭାକୁ ସମ୍ବୋଧିତ କରି ସ୍ବରାଷ୍ଟ୍ରମନ୍ତ୍ରୀ ଶାହା ବିରୋଧୀ ଦଳ ଉପରେ ଆକ୍ରମଣ କରି କହିଛନ୍ତି, ତେଲେଙ୍ଗାନାର ଆଗାମୀ ବିଧାନସଭା ନିର୍ବାଚନ ଦେଶର ଭବିଷ୍ୟତ ସ୍ଥିର କରିବ। ଆପତ୍ତିଜନକ ରାଜନୀତିକୁ ପ୍ରୋତ୍ସାହିତ କରିବା ପାଇଁ ଏଠାରେ ମୁସଲିମ୍ ସଂରକ୍ଷଣ ଦିଆଯାଇଛି। କ୍ଷମତାକୁ ଆସିବା ପରେ ଭାରତୀୟ ଜନତା ପାର୍ଟି ତେଲେଙ୍ଗାନାରେ ୪ ପ୍ରତିଶତ ମୁସଲିମ୍ ସଂରକ୍ଷଣ ଶେଷ କରିବେ। ସରକାର ଗଠନ ପରେ ଏଠାକାର ଲୋକମାନେ ମାଗଣାରେ ଅଯୋଧ୍ୟାରେ ଭଗବାନ ଶ୍ରୀ ରାମଙ୍କ ଦର୍ଶନ ପାଇବେ।
ଭାରତ ରାଷ୍ଟ୍ରିୟ ସମିତି ନେତୃତ୍ୱାଧୀନ କେସିଆର ସରକାରରେ ପ୍ରଚଳିତ ଦୁର୍ନୀତି ଉପରେ ଶାହା ଟାର୍ଗେଟ୍ କରିଥିଲେ। ତାଙ୍କର ସମସ୍ତ କାରବାରର ତଦନ୍ତ କରାଯିବ ବୋଲି କହିଥିଲେ। ଯିଏ ଦୁର୍ନୀତି କରିଛି ସେ ଜେଲକୁ ଯିବ। ଓୱାଇସିଙ୍କ ଭୟରେ କେସିଆର ହାଇଦ୍ରାବାଦର ମୁକ୍ତି ଦିବସ ପାଳନ କରୁନାହାନ୍ତି। ଜନସାଧାରଣଙ୍କୁ ଦିଆଯାଇଥିବା ପ୍ରତିଶ୍ରୁତି ବିରୋଧରେ ସେ କାର୍ଯ୍ୟ କରୁଛନ୍ତି। ସେମାନଙ୍କର ବିଧାୟକମାନେ କେବଳ ଜମି ଦଖଲ କରନ୍ତି।
ସୂଚନାଯୋଗ୍ୟ ଯେ ତେଲେଙ୍ଗାନା ବିଧାନସଭାର ୧୧୯ଟି ଆସନ ପାଇଁ ଭୋଟ ୩୦ ନଭେମ୍ବରରେ ଅନୁଷ୍ଠିତ ହେବ। ଏହାର ଫଳାଫଳ ଡିସେମ୍ବର ୩ରେ ଅବଶିଷ୍ଟ ଚାରିଟି ରାଜ୍ୟ ସହିତ ଘୋଷଣା କରାଯିବ।
