ଓ୍ବାଶିଂଟନ୍,୧୨।୩: ଆମେରିକାର ଡୋନାଲ୍ଡ ଟ୍ରମ୍ପ ପ୍ରଶାସନ ଭାରତ, ଚାଇନା ଏବଂ ବାଂଲାଦେଶ ସମେତ ୧୬ ପ୍ରମୁଖ ବାଣିଜି୍ୟକ ଅଂଶୀଦାରଙ୍କ ବିରୋଧରେ ଏକ ନୂତନ ତଦନ୍ତ ଆରମ୍ଭ କରିଛି। ଏହି ତଦନ୍ତ ଆମେରିକା ବାଣିଜ୍ୟ ଆଇନ ୧୯୭୪ର ଧାରା ୩୦୧ ଅନୁଯାୟୀ କରାଯାଉଛି। ଏହି ଆଇନ ଅନୁଯାୟୀ, ଆମେରିକା ଯେକୌଣସି ଦେଶ ଉପରେ ଶୁଳ୍କ କିମ୍ବା ଆମଦାନୀ କର ବୃଦ୍ଧି କରିପାରିବ। ଗତ ମାସରେ ଟ୍ରମ୍ପ ପ୍ରଶାସନ ଦ୍ୱାରା ଲାଗୁ କରାଯାଇଥିବା ଶୁଳ୍କକୁ ଆମେରିକାର ସୁପ୍ରିମକୋର୍ଟ ବେଆଇନ ଘୋଷଣା କରି ବାତିଲ କରିବା ପରେ ଏହି ପଦକ୍ଷେପ ନିଆଯାଇଛି। ଏହା ପରେ, ଆମେରିକା ଏବେ ଏକ ନୂତନ ତଦନ୍ତ ମାଧ୍ୟମରେ ଚାପ ପ୍ରୟୋଗ କରିବାକୁ ଚେଷ୍ଟା କରୁଛି।
ଆମେରିକାର ବାଣିଜ୍ୟ ପ୍ରତିନିଧି ଜେମିସନ ଗ୍ରୀୟର କହିଛନ୍ତି, ଯଦି ତଦନ୍ତରେ ଅନିୟମିତତା ମିଳେ, ତେବେ ଅନେକ ଦେଶ ଉପରେ ନୂତନ ଶୁଳ୍କ ଲାଗୁ କରାଯାଇପାରେ। ପ୍ରଭାବିତ ହୋଇପାରୁଥିବା ଦେଶଗୁଡ଼ିକ ମଧ୍ୟରେ ଚାଇନା, ୟୁରୋପୀୟ ସଂଘ, ଭାରତ, ଜାପାନ, ଦକ୍ଷିଣ କୋରିଆ ଏବଂ ମେକ୍ସିକୋ ଅନ୍ତର୍ଭୁକ୍ତ। ଏହି ତଦନ୍ତ ବୃହତ ଉତ୍ପାଦନ କ୍ଷମତା ଥିବା ଦେଶ କିମ୍ବା ଯେଉଁମାନେ ଲଗାତାର ଭାବରେ ବୃହତ ବାଣିଜ୍ୟ ବଳକା ସହିତ ଆମେରିକାକୁ ସାମଗ୍ରୀ ବିକ୍ରୟ କରନ୍ତି ସେମାନଙ୍କ ପାଇଁ ଉଦ୍ଦିଷ୍ଟ।
ଏହି ତଦନ୍ତରେ ଅନ୍ତର୍ଭୁକ୍ତ ଅନ୍ୟ ଦେଶଗୁଡ଼ିକ ହେଉଛି ତାଇୱାନ, ଭିଏତନାମ, ଥାଇଲାଣ୍ଡ, ମାଲେସିଆ, କାମ୍ବୋଡିଆ, ସିଙ୍ଗାପୁର, ଇଣ୍ଡୋନେସିଆ, ବାଂଲାଦେଶ, ସ୍ବିଜରଲାଣ୍ଡ ଏବଂ ନରୱେ। ଆଶ୍ଚର୍ଯ୍ୟଜନକ କଥା ହେଉଛି, ଆମେରିକାର ଦ୍ୱିତୀୟ ସର୍ବବୃହତ ବାଣିଜି୍ୟକ ଅଂଶୀଦାର କାନାଡା ଏହି ତାଲିକାରେ ଅନ୍ତର୍ଭୁକ୍ତ ନୁହେଁ। ଆମେରିକା କହିଛି, ଏହା ଏକ ପୃଥକ ତଦନ୍ତ ଆରମ୍ଭ କରୁଛି, ଯାହା ବଳପୂର୍ବକ ଶ୍ରମ ବ୍ୟବହାର କରି ତିଆରି ଉତ୍ପାଦଗୁଡ଼ିକର ଆମଦାନୀ ଉପରେ ନିଷେଧ କରିବାର ସମ୍ଭାବନାକୁ ଯାଞ୍ଚ କରିବ। ଏହି ତଦନ୍ତ ୬୦ରୁ ଅଧିକ ଦେଶକୁ ଅନ୍ତର୍ଭୁକ୍ତ କରିବ।
Dharitri – Odisha’s No.1 Odia Daily
