ନ୍ୟୁୟର୍କ, ୧୭।୧୧: ଆମେରିକା ପକ୍ଷରୁ ୧୦୦ ଲକ୍ଷ ଡଲାର ମୂଲ୍ୟର ୧୪୦୦ରୁ ଅଧିକ ପ୍ରାଚୀନ କଳାକୃତିଗୁଡ଼ିକୁ ଭାରତକୁ ହସ୍ତାନ୍ତର କରାଯାଇଛି। ନ୍ୟୁୟର୍କରେ ଆୟୋଜିତ ଏକ ସମାରୋହରେ ଏହି ପ୍ରାଚୀନ କଳାକୃତିଗୁଡ଼ିକର ହସ୍ତାନ୍ତର କାର୍ଯ୍ୟକ୍ରମ ହୋଇଥିବା ନେଇ ସ୍ଥାନୀୟ ମ୍ୟାନ୍ହଟ୍ଟନ ଡିଷ୍ଟ୍ରିକ୍ଟ ଆଟର୍ନିଙ୍କ କାର୍ଯ୍ୟାଳୟ ପକ୍ଷରୁ ଏକ ପ୍ରେସ୍ ବିବୃତି ଜାରି କରାଯାଇ ସୂଚନା ଦିଆଯାଇଛି। ନ୍ୟୁୟର୍କରେ ଅବସ୍ଥାପିତ ଭାରତୀୟ କନସୁଲେଟ ଜେନେରାଲ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ। ସେହିପରି ଆଗାମୀ ମାସଗୁଡ଼ିକରେ ମଧ୍ୟ ଭାରତରୁ ଚୋରାଚାଲାଣ ହୋଇଥିବା ୬୦୦ରୁ ଅଧିକ ପ୍ରାଚୀନ କଳାକୃତିଗୁଡ଼ିକୁ ପ୍ରତ୍ୟାବର୍ତ୍ତନ କରାଯିବ ବୋଲି ଏହି ବିବୃତିରେ କୁହାଯାଇଛି। ନିକଟରେ ନ୍ୟୁୟର୍କ ମେଟ୍ରୋ ପଲିଟାନ ମ୍ୟୁଜିୟମ ଅଫ୍ ଆର୍ଟରେ ପ୍ରଦର୍ଶିତ ହୋଇଥିବା କିଛି କଳାକୃତି ମଧ୍ୟ ଏହି ୧୪୦୦ ପ୍ରାଚୀନ କଳାକୃତି ମଧ୍ୟରେ ସ୍ଥାନ ପାଇଛି। ଫେରାଯାଇଥିବା ଏହି ବସ୍ତୁଗୁଡ଼ିକ ମଧ୍ୟରେ ବାଲୁକା ପଥରରେ ନିର୍ମିତ ଏକ ଦିବ୍ୟ ନୃତ୍ୟଶିଳ୍ପୀଙ୍କ ମୂର୍ତ୍ତି ରହିଛି। ଉକ୍ତ ମୂର୍ତ୍ତିକୁ ମଧ୍ୟପ୍ରଦେଶରୁ ଚୋରାଚାଲାଣ କରାଯାଇ ଲଣ୍ଡନକୁ ଅଣାଯାଇଥିଲା। ପରେ ଏହାକୁ ବିକ୍ରି କରିଦିଆଯାଇଥିଲା। ନ୍ୟୁୟର୍କରେ ଚୋରାଚାଲାଣ ବେପାରକୁ ନେଇ ଚାଲିଥିବା ତଦନ୍ତର ଏକ ଅଂଶ ଭାବରେ ଏହି କଳାକୃତିଗୁଡ଼ିକୁ ଉଦ୍ଧାର କରାଯାଇଥିଲା ବୋଲି ମ୍ୟାନ୍ହଟ୍ଟନ ଡିଷ୍ଟ୍ରିକ୍ଟ ଆଟର୍ନିଙ୍କ କାର୍ଯ୍ୟାଳୟ କହିଛି।
ପ୍ରକାଶ ଯେ, ପ୍ରାଚୀନ କଳାକୃତିଗୁଡ଼ିକର ବେଆଇନ କାରବାରକୁ ନିୟନ୍ତ୍ରଣ କରିବା ଦିଗରେ ଗତ ଜୁଲାଇ ମାସରେ ଭାରତ ଏବଂ ଆମେରିକା ‘ସାଂସ୍କୃତିକ ସମ୍ପତ୍ତି ଚୁକ୍ତି’ରେ ସ୍ବାକ୍ଷର କରିଥିଲେ।
